a4.301 Sam. 17.41-54; 14.1-23.
b4.47Eks. 20.25; Deud. 27.5-6.
d4.52-54 1 Mak. 1.54.

1 Macc 4

Korkias eri ale oh kahrehda sounpein nansapw 5,000 oh sounpein dak oahs kid me keieu koahiek oh mwesel nipwong pwehn mahweniong karis en mehn Suhs ako. Aramas ekei sang nan kelen mahwen en Serusalem me wia ar sounkaweid. E koasoanehdi en mahweniong karis en mehn Suhs ako ni ar sasairki, ahpw Sudas rongada duwen mwekid wet, ih eri mwesel iangahki nah sounpei pilipil kan pwehn mahweniong sapwellimen nanmwarki kariso nan Emaus, nindokon Korkias oh nah sounpei ko ar saikinte pwurodohng nan ar kahnimwpalo. Ni ahnsou me Korkias oh nah sounpei ko lel ni en Sudas eh kahnimpwalo nipwong, re sohte diarada aramas emen wasao. Re kihkihong me Sudas oh nah sounpei ko tangehrdoaui, irail eri tapihada rapahkin irail nin nahna kan.

Ahpw ni eh rahnpeseng Sudas pa pwarada nan wasa patapato iangahki karis en sounpei 3,000, me sohte wisik tehtehn mahwen duwen me re inengieng. Re kilangada lapalahn karis dengngan en men liki kan oh sounpei kan me wisik mehn sansar oh dak oahs ar kapilirailpene. Sudas eri ndaiong nah sounpei ko, “Kumwail dehr masak ar tohto de pil perki mehkot ni ar pahn mahweniong kumwail. Kumwail tamataman duwen samatail ko ar kepitipitla nan Sehd Weitahtao ahnsou me nanmwarkien Isip pwakihkinirail sapwellime karis! 10 Eri met, kitail sohpeiong Kaun-o oh peki ni koapworopwor mehlel pwe en ketin kupwurkalahngan ong kitail oh kupwukupwure inou me e ketin wiahiong samatail ko, oh en ketin kamwomwala rahnwet karis me kitail pahn mahweniong. 11 Mehn liki kan koaros ahpw pahn kilang oh dehdehkihla me Israel ahneki Koht emen me kin ketin kapitirailla oh doareirailla.”

12 Ni mehn liki ko ar kilangada duwen mehn Israel ko ar mwekimwekid kohdohn mahweniong irail, 13 re tangieisang nan ar kahnimpwalo pwe re en mahweniong mehn Israel ko. Sudas oh nah sounpei ko ahpw peuk neirail sowi ko, 14 re ahpw poar pohrail oh mahweniong irail, lao mehn liki ko tangpeseng oh tangalahng wasa patapato, 15 a mehn mwuri koaros re kamakamkihla kedlahs. Mehn Israel ko eri pwakihala ar imwintihti ko lel Keser, nan patapat kan en Idumea oh nan kahnimw kan en Asdod oh Samnia. Sounpein imwintihti kereniong 3,000 me re kemehla.

16 Ni ahnsou me Sudas oh nah kariso pwurodo sang pwepwekio, 17 e ndahng nah sounpei ko, “Kumwail dehr noahroke dipwisou kan me lohdi nan mahwen, pwe mihmiehte mahwen laud mwohtail; Korkias oh nah karis mihmihte karanih kitail pohn nahna kan. Kumwail uh tengeteng oh peiong atail imwintihti kan. Mwurin atail pahn kaloweiraildi, eri, kumwail kakehr saledek ale dipwisou lohdi kan me kumwail anahne.” 19 Mwohn Sudas eh kaerala eh kapahreko, sounpei imwintihti men me mi pohn nahnao daudawihseli wasa ko ahpw kilengdi, 20 oh kilangada duwen tohn ar kariso ar tangpesengier oh ediniei me wie edied kasaledahr me ar kahnimpwalo luldahr. 21 Ni ar tehkadahr irair wet, re inenen masepwehkada, oh ni ar pil kilangada me nein Sudas karis kan onopadahr re en mahwen nan patapato, irail koaruhsie 22 ahpw tangdoaui tangalahng Pilisdia. 23 Sudas eri pwurala pwe en ale kepwe lohdi kan nan ar kahnimpwalo; nah aramas ako ahpw rikpene kiden kohl, silper, likou poh mei oh poh ntahnmwel oh kepwe kesempwal tohto. 24 Ni mehn Suhs ako ar pwurodo nan ar kahnimpwalo, re koulki koulen kaping pwoatet: “Kaun-o me warohng ale kaping, kitail kapikapinga ih; sapwellime kalahngan me poatopoat.” 25 Rahno eri wiahla rahn en powehdi ong mehn Israel kan.

26 Soupein mehn liki ko me tangdoaui sohte kamakamala ahpw kohla rehn Lisias oh pakairkihong soahng koaros me wiawiher. 27 Ni Lisias eh rongada met, e pwunodada mehlel oh mwoahtohtala, pwehki eh sohte kalowehdi Israel nin duwen me nanmwarki koasoanehdi.

28 Sounpar ehu mwuri Lisias ahpw kihpene karis en sounpei nansapw pilipil 60,000 oh sounpein dak oahs 5,000, pwehn mahweniong oh kalowehdi mehn Suhs ako. 29 Re ahpw kohla Idumea oh kauwada ar impwal kan Pedsur, wasa me Sudas iangahki karis en sounpei 10,000 tuhwong irail ie. 30 Ni Sudas eh kilangada kehlail en arail karis kan, e ahpw wia kapakap pwoatet: “Se patohan kapinga komwi, Sounkomourpen Israel. Komwi me ketin kauwehkihla kehlail en kodon men pehn sapwellimomwi ladu Depit oh ketikidiong karis en mehn Pilisdia kan pahn manaman en Sonadan, nein Saul, oh nah sounwa sapwellime tehtehn mahwen kan. a  31 Eri met, komw kupwure pwe sapwellimomwi kat en kalowehdi at imwintihti kan. Komw ketin kasaroweiraildi pwehki ar kin likih neirail sounpein nansapw akan oh sounpein dak oahs akan. 32 Komw ketin kadirehkinirailla masepwehk; kaluweteirailla pwehki ar aklapalapki ar kehlail; re en rerrerki ar pahn lohdi. 33 Se patohwan poakohng komwi oh waunekin komwi; eri komw ketin mweidohng kiht se en kemehla at imwintihti kan, pwe se en kin kokoulkihong komwi koulen kaping.”

34 Mahweno eri tepida oh ni eh uklahr mehlel, nein Lisias sounpei 5,000 mehla. 35 Ni Lisias eh kilangada duwen nah sounpei ko ar tangatangpeseng oh duwen kommwad en Sudas oh nah kariso, me onopadahr re en mehla de mourla ni wahu, e ahpw pweieklahng Andiok oh tapihada kihpene wasao ekei karis kapw pwe en pwuralahng Sudia iangahki karis kei me tohto sang mahs.

36 Sudas oh rie ko ahpw ndapene nanpwungarail: “Eri met, ni atail imwintihti kan ar lohdier, kitail kohdahla Serusalem pwe kitail en kamwakelehda Tehnpas Sarawio oh kasarawihala sapahl.” 37 Irail eri kapokonepene karis ko koaros oh kohdahla ni Nahna Saion. 38 Re ahpw diarada Tehnpas Sarawio eh duwelahr sapwtehn ehu, pei sarawio saminlahr, wenihmw ko mwasikala, nan kehl me mi masloale dipwidipwla oh kisintuhke tohto me wosada ie duwehla nanwel oh perehn samworo ko ohlahr. 39 Nan arail nsensuwed laud, re tehrpeseng ar likou kan oh mwahmwahiei, oh kidahng pehs pohn moangarail kan, 40 re ahpw poaridiong nanpwel. Ni sowi kan eh pepeuk, irail koaros ahpw sohpeidalahng nanleng oh sengiseng.

41 Sudas eri koasoanehdi pwe ekei nah sounpei ko en mahweniong ohl ako me mihmi nan kelen mahwen en Serusalem, nindokon eh wiewia kamwakelpen Tehnpas Sarawio. 42 E pilada samworo kei me koahiek oh poadidiong Kosonnedo. 43 Irail pwukat eri kamwakelehda Tehnpas Sarawio ong kaudok oh wahsang takai ko me saminlahr wasao walahng wasa kis me samin ong kaudok. 44 Re ahpw wiekupwurki dahme pahn wiawihong pei sarawien meirong isihs me pil saminlahr, 45 re ahpw koasoanehdi re en kauwehla, pwe e dehr wiahla mehn kanamenek poatopoat ong irail. Irail eri kauwehla pei sarawio, 46 oh nekidala takai ko wasa mwahu kis ni keilen dohl en Tehnpas Sarawio, soukohp emen lao pahn pwarodo oh koasoanehdi dahme pahn wiawihong takai ko. 47 Irail eri ale takai me sohte perperda kei, nin duwen me Kosonned en Moses koasoanehdi, oh kauwada pei sarawi kapw ehu duwehte mehn mahso. b  48 Re ahpw onehda sapahl loale oh likin Tehnpas Sarawio oh kasarawihala kehl ko. 49 Re wiahda dahl sarawi kapw kei oh walahng nan Tehnpas Sarawio, dewen lampo, pei sarawien warpwohmwahu oh pil tehpel en pilawa sarawi ko. 50 Re isikada warpwohmwahu pohn pei sarawio oh pil isikada lamp ko me mi nan dewen lampo, nan Tehnpas Sarawio ahpw marainda. 51 Re pil kihdiong pohn tehpelo lopwon en pilawa ko, oh langahda kahdeng kan, ih duwen met ar kaimwisekala doadoahk koaros en onehda sapahl Tehnpas Sarawio.

52 Ni rahn karieisek limau en kaduwau en sounpwong, sounpwong en Kislep, pahr 148
 PAHR 148: Sounpar wet pahrekiong pahr 164 mwohn Krais.
iei rahnen kataman en mehn liki ko ar kasaminehla pei sarawio. Ni rahno meirong ahpw wiawi pohn pei sarawi kapw me re wiadahr nin duwen me Kosonnedo koasoanedier. Pei sarawi kapwo kasarawihla sapahl oh koul kan ahpw pil wiawi iangahki keseng en arp kan, simpal kan oh soangen keseng teikan. d 
55 Aramas ako koaruhsie ahpw poaridiong nanpwel oh pwongih Koht kapikapinga ih, pwehki eh ketin kupwuredahr re en powehdi ar imwintihti kan.

56 Erein rahn waluh re wiewiahki sarawien kasarawi sapahl en pei sarawio. Re ahpw kin pereperen isihsik warpwohmwahu, wiewia meirong isihs, meirong en kaminimin oh meirong en kapingkalahngan. 57 Re kapwatahkihda mwohn Tehnpas Sarawio elin kapwat kohl oh soangen kapwat teikan; re onehda sapahl wenihmw ko oh perehn samworo ko oh kihong wenihmw ni pere ko. 58 Mehn Suhs ko wiadahr sarawi lapalap pwukat, ni ar kilangehr duwen paisuwed me mehn liki ko wadohngirailehr, eh sohralahr. 59 Sudas oh rie ko oh mehn Israel ko ahpw koasoanehdi pwe katamanpen kasarawi sapahl en pei sarawio en kin wiawi ni peren lapalap nan sounpar koaros erein rahn waluh, sang ni rieisek limau en sounpwong en Kislep.

60 Ni ahnsowo re kapilkipene Nahna Saion kehl ile ieu oh wasahn iroir kehlail kei mehn sile sang mehn liki kan en pedolong oh pwurehng kasaminehla kahnimwo. 61 Sudas kihdiong nan kahnimwo karis en sounpei ehu pwehn kin sinsile Tehnpas Sarawio. E pil kakehlakahla kahnimw en Pedsur, pwe en mie en mehn Israel kehl kehlail sallahng Idumea.

Copyright information for `PON2006A