a12.32Eks. 23.16.
b12.40Deud. 7.25.

2 Macc 12

Mehn Suhs kan nan Sopa Kamakamala

Mwurin inou en miniminpene nanpwungen mehn Suhs oh Siria eh wiawidahr, Lisias pwurala rehn nanmwarki oh mehn Suhs ko pwuralahng ar doadoahk nan mwetuwel kan. Ahpw ekei kepina me duwehte Timoty oh Apolonius, nein Kennaeus, iangahki Ieronimus oh Demopon, oh pil Nikanor, kaunen sounpei kan sang Saiprus, sohte mweidohng re en ahneki meleilei.

Ni ahnsowo, mehn Sopa ko wiahiong mehn Suhs ko me mihmi rehrail soahng suwed ehu. Re mwomwehda nanpwungmwahu ong mehn Suhs ko oh luke irail oh ar peneinei kan en iang irail mwemweit nansed dake sohp kei me re kaunopada. Eri, pwehki aramas koaros en kahnimwo ar pahn iang mwemweit, mehn Suhs ko sohte lemeiong me re pahn wia mehkot ong irail, re ahpw pwungkihda me re pahn iang ni kupwur mwahu. Ahpw ni ar lel nan madau, mehn Sopa ko uhdahte keselahng mehn Suhs riepwikio nan madau.

Ni Sudas eh rongada soangen mwekid suwed wet me wiawihong ienge mehn Suhs kan, e ahpw kairehki nah sounpei ko. Mwurin ar kapakap ong Koht, sounkopwung pwung, re ahpw mahweniong irail ko me kemehla mehn Suhs ko. Re kohla nipwong oh isikada wasahn peidi en sohpo, isikala sohp koaros, oh kemehla aramas koaros me re kilangada rukuruk wasao. Ewen kehl kan en kahnimwo loakidi, kahrehda Sudas pwurasang wasao; ahpw e koasoakoasoane me e pahn pwurodo ehu rahn oh kemehla aramas koaros wasao.

Sudas rongada me mehn Samnia pil koasoakoasoane re en kemehla mehn Suhs kan me koukousoan nan ar kahnimwo. Ih eri mahweniong Samnia nipwong, isikada wasahn peidi en sohpo oh sohp koaros wasao. Aramas kak mihte Serusalem kilang wasao eh lullul, me mwail silihsek uwen doh.

10 Ni Sudas oh ienge ko ar dohkihsang Samnia mwail ehu ni ar kohkolahng mahweniong Timoty, mehn Arepia 5,000 iangahki sounpein dak oahs 500 ahpw peiongirailda. 11 Lapalahn pei apwal ehu mwo, ahpw pwehki sawas en Koht re kalowehdi aramas en nan sapwtehn pwukat, me uhd peki re en ehuong mehn Suhs ko; re inoukihda me re pahn kihong mehn Suhs ko pelinmen kei oh sewese irail ni soahng teikan. 12 Sudas ese me mehn Arepia ko pahn katapan ong irail ni soahng tohto, ih eri pwungkihda en ehuong irail; mwurin mwo mehn Arepia ko pwuralahng nan ar impwal kan.

13 Sudas pil mahweniong kahnimw Kaspin. Kelen kahnimw wet me kehlail oh mehn liki sang wasa kei pil iang kousoan wasao; 14 re kin koapworopworki kehlail en kehlo oh uwen mwenge me re kihpenehr loale kak itar erein mahwen ehu eh pahn wiewiawi. Re ahpw kouruhrki Sudas oh nah sounpei ko, weriwerki ar kapailoke irail oh lahlahwe ar Koht. 15 Mehn Suhs ko ahpw kapakapohng Kaun-o Wasa Lapalahpie, kaunen nanleng oh sampah, me ketin karangkehdi kelen Seriko ni mwehin Sosua, ni eh sohte ketin doadoahngki lepin tuhke kalaimwun mehn doakoapeseng ewen kehlo de pil tehtehn mahwen. Irail eri mahweniong kehlo, 16 oh pwehki eh kupwur en Kaun-o re kalowehdi kahnimwo. Mehn Suhs ko kemehla aramas tohto me kahrehda lepin leh ehu me karanih wasao, me mweinele mwail pahkis ehu uwen tehlepe, inenen direkihla nta.

17 Sudas oh ienge ko eri mweselsang kahnimw Kaspin. Ni ar dohkilahr mwail 95, re ahpw lellahng Karaks, wasa kis me mehn Suhs kei koukousoan ie limwahn kahnimw Top. 18 Ahpw re sohte diar Timoty, pwehki eh mweselsangehr wasao. Ihte me Timoty wia wasao, e kihdi pwihnen sounpei kehlail ehu pwe re en sinsile ewen kehlo. 19 Riemen nein Sudas kaunen sounpei, Dosihdeus oh Sosipater, mahweniong kelen mahweno oh kemehla sounpei 10,000 me sinsile wasao. 20 Sudas eri nehkpeseng nah sounpei ko ni pwihn kei, kihong Dosihdeus oh Sosipater en wia kaunepen ehuehu pwihn, e ahpw pwakihala Timoty, me naineki sounpei alu 120,000 oh sounpein dak oahs 2,500. 21 Ni Timoty eh esehda me Sudas pwakipwakih kohla, e ahpw kadarala lih oh seri kan iangahki ar kepwe kan pwe re en tiengla nan kahnimw en Karnaim, kahnimw ehu me apwal aramas en mahweniong de kohla ie pwehki elen kolahng wasao eh nohn wetikitik oh takain. 22 Ahpw ni imwintihti ko ar kilangada nein Sudas keieun kariso ar pwerdo, re masepwehkada pwehki ar kilangada kaudiahl ehu sang rehn Koht, me kin ketin mahsanih mehkoaros. Re inenen masepwehkada oh tangseli oh me tohto rehrail ohkihla nein iengarail kan kedlahs kan. 23 Sudas oh ienge ko eri pwakihirailla uwen ar kak oh kemehla imwintihti 30,000. 24 Karis me Dosihdeus oh Sosipater kaunda eri poarokedi Timoty. Ahpw eh mwersuwed e ngidingidkihong irail me dene tohto kisehrail me e salihedi oh e pahn kemeirailla ma re pahn wiahiong mehkot. 25 Eri, mwurin eh inoukihong irail me e pahn kasaledekihala kisehrail ko, re ahpw kasaledekihala.

26 Mwuhr Sudas mahweniong kahnimw en Karnaim oh tehnpas sarawien koht lih Atarkatis me mi wasao, kemehla aramas 25,000 27 oh kamwomwala douluhl kahnimwo oh tehnpaso. Mwuri eh mahweniong Epron, kahnimw kehl kehlailo, wasa me Lisias oh tohn wehin liki tohto koukousoan ie. Mwahnakapw kehlail kan pwukoahki sile mwohn kehl ko oh pepei ni ar kommwad, a nan kahnimwo dipwisoun mahwen tohto mihmi ie. 28 Ahpw mehn Suhs ako kapakap ong Kaun-o pekipeki sawas, Kaun-o me kin ketin kauwehla karis en imwintihti kan. Irail eri kalowehdi kahnimwo oh kemehla aramas 25,000. 29 Re ahpw mwekidsang wasao kolahng Ped San, kahnimw ehu me dohkihsang Serusalem mwail isihsek limau ni paliepeng. 30 Mehn Suhs en wasao kadehdehiong Sudas duwen kupwuramwahu en tohn kahnimwo ong mehn Suhs akan oh ar wiewia mwahu ahpw mehlel ni ahnsou apwal. 31 Sudas oh ienge ko ahpw kapingkalahngkihong aramas akan ar kupwuramwahu oh kadek, oh koangngoangehkin irail re en usehlahte ar kupwuramwahu ong riarail mehn Suhs kan ni ahnsou kohkohdo kan. Irail eri mwesel pwuralahng Serusalem, wasa re lel ie mwohnte Sarawien Dolung Wahnsahpw.

Sudas Kalowehdi Korkias

(Tehk 1 Makapi 5.45-54)

32 Mwurin Sarawien Dolung Wahnsahpw (mehn Krihs kin kahdaneki Pendekos) Sudas oh ienge ko mwadangete mwesellahng mahweniong Korkias, kepinahn Idumea. a  33 Korkias mahwenkihong Sudas oh ienge ko sounpei alu 3,000 oh sounpein dak oahs 400. 34 Mehn Suhs kei ahpw mehla nan mahwen wet. 35 Mehn Suhs men sang nan kahnimw en Top, ede Dosihdeus, ohl en dak oahs kehlail men ih, e ahpw poarehng koledi en Korkias eh likowo, wuradekihseli nan eh momour, e men poar mourihedi ohl soh katepe menet; emen sounpein dak oahs sang Drasia ahpw tangalahte lupukasang pehn Dosihdeuso, kahrehiong Korkias eh pitla oh sopolahng kahnimw en Marisa.

36 Mwurin Esdrias oh ienge ko ar pepei ahnsou reirei oh pwangadahr mehlel, Sudas sohpeiong Kaun-o oh peki en ketin kasalehiong irail me e ketin ieiang irail oh ketin kakahluwa arail kariso. 37 Eri, ni Sudas eh koulki koulen mahwen ehu ni mahsen en sapweo, mehn Suhs ako mwadangete peiong Korkias oh ienge ko oh pwakihirailpeseng.

Kapakapki me Melahr nan Mahwen

38 Mwurin mahweno Sudas kahrehda nah sounpei ko oh kolahng nan kahnimw en Adullam; rahno mandahn rahnen Sapad ehu, irail eri pein kamwakeleirailda duwen tiahk en mehn Suhs oh kommoal sang doadoahk. 39 Mandahsang rahno, e inenen karuaru en kihpene paliweren me melahr nan mahweno oh sarepiraildi nan sousoun arail peneinei kan. 40 Re ahpw diarada kisin sansal en koht kan me re kin kaudokiong nan Samnia eh wie ekiek nan en me melahr ako koaros ar likou kan, sansal me Kosonnedo keinapwih mehn Suhs en dehr weuwa. Aramas koaros ahpw esehda me kahrepe wet me kahrehda ar mehla. b  41 Irail koaros eri kapinga sapwellimen Koht mwekid kan, sounkopwung pwung, me kin ketin kasalehda me rir kan. 42 Re ahpw peki en ketin kasohrehla dihp wet. Ni ahnsowohte Sudas, ohl waun meno, koangngoangehki aramas koaros iangahki nah sounpei ko re en dehr wiahda dihp, pwehki ar kilangkiher masarail kan dahme wiawihong irail ko me wiahda dihp. 43 Sudas eri rikasang rehn nah sounpei ko koaros uwen mwohni ehu me mihmi ni uwen paun en silper kereniong pahieu, oh kadarlahng Serusalem pwehn wiahki meirong en tomwki dihp. Sudas wia mwekid wet pwehki eh kamehlele me me melahr akan pahn pwurehng iasada. 44 Pwe ma e sohte kamehlele me me melahr akan pahn pwurehng iasada, e pahn wia tiahk en pweipwei oh soh katepe en kapakapki me melahr akan. 45 Ahpw, ma e wia koasoandi wet pwehki keting mwahu oh lingan me wie nekinekohng irail kan me pahn mehla nan ar wiewia mwahu, eri, koasoandi wet wia madamadau sarawi oh mwahu ehu. Kahrehda, Sudas koasoanehdi me meirong en tomwpen dihp pahn kin wiawi pwehn kasaledekala me melahr akan sang nan diparail kan.

Copyright information for `PON2006A