2 Macc 3

Akamai Nanpwungen Onias oh Saimon

Ahnsou me Onias
 ONIAS: Met iei Onias Kesilimen, nein Saimon Keriemen (tehk 4.4-6; Sir. 50.1-21).
wiewia Samworo Lapalap nan Serusalem, kahnimw sarawi oh meleilei oh paiamwahu, oh kosonned koaros kin pweida mwahu pwehki Onias eh inenen poadidi oh kin kailongki me suwed.

Nanmwarki kan en Siria oh Isip kin wauneki Tehnpas Sarawio oh kin ketikihong kisakis kaselel kan, oh Nanmwarki Seluhkus,
 SELUHKUS: Seluhkus Kapahmen, me wiewia nanmwarki men sang pahr 187-175 mwohn Krais. E pil kin mwarenki Pilopator, nein Antaiokus Kesilimen.
kaunen Eisia pwon, pil kin pwainkihla pein sapwellime mwohni pweipwand en meirong kan en Tehnpas Sarawio.

Ahpw ohl emen ede Saimon, kisehn kadaudok en Pilka, kaun lapalap en Tehnpas Sarawio, ahpw sarohdi pahn Onias ni eh akamaikihong koasoandi kan me pid wasahn netinet en kahnimwo. Ni ahnsowo Apolonius, nein Tarasius me wia kepina en Siria Laud. Saimon eri kohla reh oh padahkihong me dene uwen mwohni ieu mie nan wasahn nek mwohni en Tehnpas Sarawio me soh kak wadawad, dene pwehki mwohni ko eh sohte anahnepe ong mehn meirong kan, e konehng kohieng pahn manaman en nanmwarkio.

Eliodorus Pekederlahng Serusalem

Ni Apolonius eh pato pahn kupwur en nanmwarkio, e ahpw patohwanohng duwen mwohni ko, oh nanmwarkio ahpw koasoanehdi Eliodorus, sounsawas keieu manaman, en kohla ale mwohni ko. Eliodorus ahpw mwadangete mwesel pwehn kapwaiada kupwur en nanmwarkio, ahpw e koasoia me e pahn kolahng dawihete kahnimw kan en Siria Laud. Mwurin eh lel Serusalem oh Samworo Lapalapo kasamwo mwahu, e ahpw kawehwehda kahrepen eh seiloak oh ma mehlel dahme e rongehr. 10 Samworo Lapalapo ahpw kawehwehda me Saimon ohl suwed oh likamw men. Mehlel pwoat me mie mwohni, ahpw e wie nekinek mehn sewese liohdi kan oh me sepwoupwou kan oh elep nein Irkanus, nein Dopias pwutak, ohl kesempwal men ih. E pil padahkihong me uwen tohtohn mwohni me mi wasahn nek mwohnio mihmi ni paun en silper 30,000, oh paun en kohl 15,000. 12 E pil usehla oh koasoia me e sohte konehng mehlel aramas en kihsang nein aramas mwohni me re likihong Tehnpas Sarawi ndand wet nin sampah.

Eliodorus Koasoanehdi en Pedolong nan Tehnpas Sarawio

13 Ahpw Eliodorus nannantihkihte me mwohni ko pahn wisiklahng nan sapwellimen nanmwarki wasahn nek mwohni, nin duwen me nanmwarkio mahsanih. 14 Ih eri kilelehdi rahn ehu, oh kohla nan Tehnpas Sarawio pwe en tehk wadepen mwohni ko. Met ahpw kahrehda mwoarong laud nan kahnimwo pwon. 15 Samworo kan, mi nan ar likoun samworo, ahpw poaridiong nanpwel mwohn pei sarawio oh peki rehn Koht en ketin nekinekid mwohni ko, pwe iei ih me ketin koasoanehdi nan kosonned en nekidala nein aramas mwohni nan Tehnpas Sarawio. 16 Me kapahtou duwen Samworo Lapalap eh poh reireila, kasalehda duwen loale eh pwunodada, 17 duwen paliwere eh rerrerki eh masepwehk, kasalehda medek en nan kapehde. 18 Aramas akan tangasang nan imwarail kan pwe re en kolahng iang kapakap pwe Tehnpas Sarawio en dehr mwamwahlla. 19 Lih akan pirekipene lukoparail kan likoun nsensuwed, oh pokopokon nan ahl akan. Serepein pwulopwul kan me ar pahpa oh nohno saikinte mweidohng re en kohla mwohn aramas, pil tangalahng ni ewen kehl kan de ni kehl kan en kahnimwo, de re pil pwerpweriei sang ni wenihmwtok kan. 20 Ahpw wasa koaros me re kohla ie, re kin kapahda pehrail kan wie kapakap ong Koht. 21 Ia uwen kompoake mehlel kilang duwen Samworo Lapalapo eh pwunodadahr oh masepwehkadahr oh kilang duwen aramas koaros nan kahnimwo ar pingidahr oh wonohn wekidekdi nanpwel.

Kaun-o ketin Doarehla Sapwellime Tehnpas Sarawio

22 Nindokon aramas koaros ar pekipeki rehn Kaun-o Wasa Lapalap en ketin sinsile mwohni ko me likilikpe kohieng Tehnpas Sarawio, 23 Eliodorus wenlahte nan eh koasoandio. 24 Ahpw ni ahnsowohte me ih oh ienge ko lellahng ni wenihmwen wasahn nek mwohni, Kaun-o me sapwellimaniki manaman koaros ketin kapwarehda kaudiahl ehu me kahrehda irail ko koaros me eimah en iang Eliodorus pedolong, re masepwehkada rerrer oh luwetkihla ar kilangada manaman en Kaun-o. 25 Nan kaudiahlo re kilangada oahs emen oh mehmen dake oahso. Oahso kapwatki mehn dak oahs oh me dake oahso likawih likoun mahwen kohl oh kapwat en mahwen, e inenen kamasepwehk. Oahso pa mwadangete tangalahng Eliodorus, e ahpw kesihnenda oh kikim Eliodorus. 26 Mwuri, Eliodorus pil kilangada mwahnakapw riemen, me mwomwen kehlail oh kaselel, ira likou kaselel, oh emen kesihnenda palimeing oh emen palimaun en Eliodorus oh ira pakipakirih sohte tokedi. 27 Eliodorus ahpw mwadangete pwupwudiong nanpwel lipwongmas, ienge ko ahpw pwekadahng pohn mehn ro ehu, 28 oh wahsang wasao. Ohl menet ahpwtehn pedolong wasahn nek mwohnio iangahki pwihn lapalap ehu, oh nah sounsilasil ko, ahpw met e wisiwisik kohiei solahr kak wia mehkot. Eri, irail koaros ahpw pohnesehla manaman lapalap en Koht.

Onias Kapakapki Eliodorus pwe en Kehlailda

29 Eri, Eliodorus wonohnehr sohla kak lokaia oh solahr koapworopworpen me e pahn pwurehng mwahula sang ni wiepen limen Koht wet. 30 Ahpw mehn Suhs akan kapikapinga Koht pwehki soahng kapwuriamwei me e ketin wiahda pwe en doarehkihla sapwellime Tehnpas Sarawio oh kahredahr peren laud ong aramas akan me ahpwtehn pingida oh masepwehkada. 31 Ekei kompoakepahn Eliodorus ko ahpw mwadang peki rehn Samworo Lapalap Onias en kasakaski ong Wasa Lapalahpie pwe en ketin kupwurehla oh ketikihong mour Eliodorus, me kereniongehr mehla. 32 Samworo Lapalap eri wiahda meirong ehu ni koapworopworpen me Koht pahn ketin kupwurehla Eliodorus, pwe e sohte men nanmwarki en kupwukupwure me mehn Suhs kan me wiahiong soahng wet ong ohl menet me e kadarodo. 33 Nindokon Onias eh wiewia meirongo, mwahnakapw riemeno pil pwurehng pwarada likilikawihete soangen likou me ira likawih ni ara keieun pwaradao, ira ahpw ndaiong Eliodorus, “Kapingkalahngan ong Samworo Lapalapo; ih me kahrehda Kaun-o eh ketin kupwureiuk. 34 Tamataman me Kaunen nanleng me ketin kalokeiuk. Eri met, kohla oh lohkihong aramas koaros wiepen nin lime manaman.” Ni ara wiahier koasoi pwukat, ira ahpw sohrasang mwohrail.

Eliodorus Kapinga Koht

35 Eliodorus eri wiahda meirong ehu ong Kaun-o oh inou tohto, pwehki eh ketin doarehla eh mour. E ahpw kamwurimwuriong Onias oh pwurala iangahki nah sounpei ko rehn nanmwarki. 36 Ih eri padahkihong aramas koaros dahme Kaun-o, me lapalapasang koht akan koaros ketin wiadahr.

37 Ni nanmwarki eh keinemwe rehn Eliodorus ihs me pahn keieu mwahu en pekederla Serusalem mwuri, e ahpw sapengki, 38 “Ma mie sapwellimomwi imwintihti de mehmen me komw mwahngih me koasoakoasoane en kauwehla sapwellimomwi wehi, a komw poaronehla wasao. Pwe e pahn pwurodo loken kamakam, ma e mour pwurodo; pwe mie manaman ehu sang rehn Koht me kin doadoahk wasao. 39 Koht en nanleng kin ketin apwahpwalih Tehnpas Sarawio; e kin ketin kauwehla oh kamwomwala mehmen me kin kohdo pwe en wiahiong Tehnpas Sarawio mehkot suwed.” 40 Met iei koasoiepen duwen wasahn nek mwohni en Tehnpas Sarawio eh silasildi sang Eliodorus.

Copyright information for `PON2006A