2 Macc 5

Kaudiahl en Mahwen ehu

Ni ahnsowo Antaiokus Kapahmen wia mahwen keriapak ong Isip. Erein rahn pahisek aramas akan nan Serusalem kin kilang kaudiahl kei en karis en sounpein dak oahs me kin mi nan likoun sounpei kohl oh pipihrseli nan wehwe. Soundak oahs wisik keteiu oh kin kolada neirail kedlahs kan. Re kin irekla oh mwomwen pahn mahwenpene nanpwungarail, piripirekekseli oh pepei. Mehn sansar kan kin loiloipene, ketieu kan pipihr duwehte keteu, oh arep kan pipihr nan wehwe. Soangen mehn pei koaros oh lingen kapwat kohl kan kin wie piripir ni ketipin eh kin dakerada. Aramas koaros nan kahnimwo ahpw kin kapakapki pwe kaudiahl pwukat en wia kilel en paiamwahu ehu.

Sason Mahweniong Serusalem

Rohng likamw pwoat ahpw lohkseli me dene Antaiokus pwoulahr. Sason ahpw ale sounpei tohto sang kid oh mahweniong Serusalem ni sohte pakairpen mahwen wet. Re pwakihasang sounpei ko me kin sinsile kehl kan en kahnimwo oh irail ahpw kalowehdi kahnimwo. Menelaus ahpw sopolahng nan kelen mahweno, me mi limwahn dohl en Tehnpas Sarawio, nindokon Sason oh nah sounpei ko ar kemekemehla iengarail mehn Suhs kan ni sohte mahk. Sason sohte medemedewe me powehdi pein uhdahn tohn eh wasa wia sapwung laud ehu. E medemedewe me eh pahn powehdi uhdahn tohn eh wasa pahn duwehte eh powehdi eh imwintihti kan, ahpw kaidehn lohdi en pein nah aramas. Ahpw Sason sohte alehdi manaman en kaunda wehio. E pwurehng sopolahng nan sapwen mehn Ammon kan oh ni imwilah eh koasoandi suwed kan kahrehiong ih en sarohdi oh namenekla, oh e mehla nan eh pwunod laud. Aretas, nanmwarkien mehn Arap kan, salihedi; aramas akan kin wiahki ih aramas suwed men oh kin kailongki pwehki eh pangala eh wehi; aramas koaros kin raparapahki, oh e kin sopohsang nan ehu kahnimw kolahng nan ehu. E pil tangala rukula Isip, mwuri Krihs, e kihkihong me e pahn diar eh nsenamwahu rehn mehn Saparta kan, me pil wia kisehn mehn Suhs. Eri, ohl menet, me pwakihasang aramas tohto nan uhdakarail, mehla nan wehin liki ehu ni eh wia aramas me soposoposeli mwahl. 10 Sason kemehla aramas tohto oh sohte sarepedi paliweren me e kemehla kan, a met sohte me mwahieiki eh mehla. Sohte me sarepedi oh e sohte seridi nan sousoun eh pahpa kahlap ako.

11 Ni ahnsou me rohng en dahme wiawiher nan Serusalem lelohng Antaiokus, e kupwukupwure me wehin Sudia pwon moromoradahr, oh e inenen engiengda duwehte mahn lawalo men. Ih eri mweselsang Isip oh ketila kalowehdi Serusalem ni mahwen mwuledek mehlel. 12 E ahpw ketin ruwese sapwellime sounpei ko en kemehla aramas koaros ni sohte mahk me re pahn kilangada oh pil kemehla mehmen me re diarada rukuruk nan imwarail kan. 13 Re kemehla aramas koaros—ohl, lih, pwutak oh serepein; re pil pelepeseng seri pwelel kan. 14 Mwurin rahn siluh mehn Serusalem 80,000 me sohla mie: 40,000 kamakamala nan mahweno oh pil 40,000 pil wisiksang oh netila nin duwen lidu kei.

15 Ahpw Antaiokus sohte itarki wiewia pwukat. Pwe e pil eimahda oh pedolong nan Tehnpas Sarawi me keieu sarawi nan sampah pwon, Menelaus me kaweid, ohl me pangala eh pelien lamalam en mehn Suhs oh eh wehi. 16 Ni lime kan eh samin oh sohte sarawi, e ahpw ketikihsang dipwisou sarawi kan mehn doadoahk ahnsoun kaudok oh dipwisou teikan me nanmwarki teikan kisekisehki Tehnpas Sarawio pwehn kalaudehlda lingene oh wahupe. 17 E inenen perenkihda eh kalowehdier Serusalem, oh e sohte dehdehki me Kaun-o ketin mweidohng sapwellime Tehnpas Sarawio en saminla pwehki dipen aramas en Serusalem kan eh kahngiangihada kisin ahnsou kis. 18 Ma aramas en Serusalem kan sohte wiahda dihp ngeder, Antaiokus pahn ale kalokolok oh irairdihsang en dehr wia soangen mwekid suwedo. E uhdahn pahn ale lokolok duwehte me wiawihong Eliodorus, me Nanmwarki Seluhkus ketin kadarala pwe en dawih wasahn nek mwohni en Tehnpas Sarawio. 19 Ahpw Kaun-o sohte ketin pilada sapwellime aramas akan pwehki eh ketin poakohng Tehnpas Sarawio; e ketin kauwada Tehnpas Sarawio pwehki eh ketin poakohng sapwellime aramas akan. 20 Ihme kahrehda Tehnpas Sarawio iangki ale lokolok en aramas akan, ahpw mwuri e pil iang ale ar paiamwahu. Kaun-o ketin kesehla Tehnpas Sarawio ni eh engienda, ahpw e pahn ketin onehda sapahl ni kupwure eh pahn meleileidi.

Pil Ehu Mahwen ong Serusalem

(Tehk 1 Makapi 1.20-63)

21 Antaiokus eri ketikihsang paun en silper 135,000 sang nan Tehnpas Sarawio oh mwadangete ketiketlahng Andiok. Nan eh aklapalap, e kupwukupwure me e kak tangahki were sohp kan nansapw de kahluwa sapwellime sounpein nansapw kan nansed. 22 E idihada aramas ekei ong ni doadoahk en kepina pwe re en kahpwalihala aramas akan. E ketikihdi Pilip nan Serusalem, mehn Prikia, ohl me suwed sang mehlel Antaiokus. 23 Oh e ketikihdi Andronikus ni Nahna Kerisim. Likin mepwukat, Menelaus, me wiakauwe mehlel ienge mehn Suhs kan sang kepina teikan. Antaiokus inenen kalahdeki mehn Suhs akan, 24 kahrehda e kadarala karis en sounpei pweipweida 22,000 sang Misia ong Serusalem pahn kaunepen ohl suwed Apolonius oh ruwese re en kemehla ohl koaros en nan kahnimwo oh netikihla lih akan oh pwutak kan nin duwen lidu kei. 25 Apolonius eri lel Serusalem oh mwomwehda me e kohkihla meleilei. Mwuhr, ni rahnen Sapad ehu, ahnsou me mehn Suhs akan kin wiahki rahnen kommoal, e wiahda kapar ehu en nah sounpei kan me wisik tehtehn mahwen likin kahnimwo. 26 E ahpw mwadengete ruwese nah sounpei ko en kemehla aramas koaros me kohieilahng kilang ar kaparo. Irail eri tangolong nan kahnimwo oh kemehla kiden aramas.

27 Sudas Makapius oh aramas duwemen ahpw sopolahng ni kisin nahna kan, wasa re mihmiseli ie duwehte mahn lawalo kan. Re kin kangkangete wahntuhke kan me kin wosada wasao, pwe re dehr kasamineirailla.

Copyright information for `PON2006A