b8.23 1 Mak. 3.48.

2 Macc 8

Sudas Makapius Kahngohdi

(Tehk 1 Makapi 3.1-26)

Sudas Makapius oh ienge ko ahpw kohseli ni rir nan kisin kahnimw kan lao re kihpene ohl en Suhs 6,000 me dadaurete arail pelien lamalam. Re ahpw kapakap oh peki rehn Kaun-o en ketin kupwure irail sapwellime ko, me wiemwahllahr pahn wehi kan koaros, oh en ketin kupwure sapwellime Tehnpas Sarawio me mehn liki kan kasaminelahr, oh en kupwure Serusalem me ahnsou wet ohlahr oh kereniongehr kamwomwmwomwla douluhl. Re pil peki rehn Kaun-o en ketin kasalehda eh kin kalahdeki me suwed ni eh pahn ketin mweidohng dompen kamakamalahn sapwellime aramas akan, seri kan me sohte dipahr, oh lahlahwe kan me wiawihong Kaun-o.

Ni Sudas eh kapokonepenehr sounpei ko, mehn liki ko sohla kak pelianda, pwehki Kaun-o solahr engieng pahn Israel, ahpw e uhd ketin kupwurelahr. Sudas kin mahwenih kisin kahnimw kan ni ar sasairki oh isikada. E kalowehdi wasahn mahwen mwahu kei oh pwakihasang imwintihti kan ie, oh diarada me nipwong me keieu mwahu en kin wia eh mwekid kan. Aramas akan wasa koaros kin koasoakoasoia duwen eh kommwad.

Ni ahnsou me Pilip, kepinahn Serusalem, tehkada me en Sudas mwekid kan wie lalaudla, e ntingihada kisinlikou kis oh kadaralahng Tolemi, kepinahn Siria Laud, peki eh sawas en doare sapwellimen nanmwarki wehi. Tolemi eri mwadangete pilada Nikanor, nein Patroklus, me pil iang lengilengki “Kompoakepahn Nanmwarki.” E kadarala Nikanor iangahki sounpei tohtohsang 20,000 sang nan wehi teikan, pwe re en kamwomwala douluhl mehn Suhs akan. Tolemi pil pilada Korkias, kaunen sounpei koahiek men, pwe en iang Nikanor. 10 Nanmwarki Antaiokus pweipwandkihong mehn Rom paun en silper 150,000; Nikanor eri koasoanehdi en kapwungala pweipwando, ni eh pahn netikihla nin duwen lidu kei mehn Suhs me selidi nan mahweno.

11 Ih eri mwadangete pakairkihong kahnimw kan me mi limwahn oaroahr ma re men pwainda ar lidu mehn Suhs, pweinen emen pahn mi pahnengin paun en silper ehu. Ahpw e sohte ese kadeik me Koht Wasa Lapalahpie ketin nekinekidohng ih.

12 Sudas esehda me Nikanor iangahki nah karis kohkolahng Sudia, e ahpw pakairkihong nah sounpei ko. 13 Ahpw ekei nah sounpei ko me masepwehk oh sohte pwoson sapwellimen Koht pwuhng, re ahpw tangdoaui. 14 A ekei netikihla luhwen ar dipwisou kan, pwe Kaun-o en kupwure oh doarehsang ohl suwed Nikanor, me netikiniraillahr nin duwen lidu kei mwohn mahweno eh wiawi. 15 Re ahpw kapakap oh peki pwe ma re sohte warohng kalahngan wet, a en ketin kupwurehla oh kapitirailla pwehki inou me e ketin wiahiong ar pahpa kahlap ako, oh pwehki ih, Koht lapalap oh kalahngan ketin malipe irail pwe re en wiahla sapwellime. 16 Sudas eri kapokonepene nah sounpei 6,000 oh kakehlaka irail pwe re en dehr masepwehkada de salohda oh tang ni ahnsou me re pahn kilangada uwen tohtohn sounpein liki ko me kohkodohng irail ni soh kahrepe. Ahpw re en kommwad mahwen, 17 oh dehr manokehla sapwung kan me mehn liki kan wiahiong Tehnpas Sarawio, oh duwen ar kahrehiong Serusalem eh lokolok laud oh kauwehla tiahk en mehn Suhs kan. 18 Sudas ndaiong irail, “Re koapworopworki neirail tehtehn mahwen kan oh ar kommwad, a kitail koapworopworki Koht Wasa Lapalahpie, me kaidehn sounpei pwukatte me e kak ketin kamwomwala, ma e konehng, e pil kak ketin kamwomwala sampah pwon, ni eh pahn ketin kamwakidete sendinlime.”

19 Sudas eri usehla oh koasoiaiong irail ahnsou kan me Koht ketin sewese ar pahpa kahlap ako: duwen imwintihti 185,000 ar mwomwla ni mwehin Senakerip; 20 oh pak ehu nan Papilonia mehn Suhs 8,000 sewesehda mehn Masedonia 4,000, oh kalowehdi mehn Kalesia 120,000 oh kihsang dipwisou tohto, mepwukat koaros pweidahr pwehki sapwellimen Koht sawas.

21 En Sudas eh koasoi kan ahpw kakehlahda nah sounpei ko oh kahrehiong ar inengieng mehkihla ar pelien lamalam oh ar wehi. Ih eri nehkpeseng nah kariso ni pwihn pahieu, 22 kereniong sounpei 1,500 nan ehuehu pwihn, iangahki ih oh rie kan: Saimon, Sosep, oh Sonadan me kaunda ehuehu pwihn. 23 Mwurin ar ndaiong Eleasar en wadek pwuhk sarawio ni ngihl laud, e ahpw ruwesehki nah sounpei ko re en wia mahsen rir
 MAHSEN RIR: E kin mie mahsen rir ehu me sounpei kan kin koasoanehdi re en doadoahngki ni ahnsoun mahwen pwe ni emen eh pahn tuhwong emen, e pahn idek reh mahsen riro, eri, ma e ese iei ih ienge.
wet nan mahwen: “Sapwellimen Koht sawas,” oh pein ih ahpw mwekidlahng mahweniong Nikanor. b 

Sudas Kalowehdi Nikanor

(Tehk 1 Makapi 3.55—4.27)

24 Koht Wasa Lapalahpie ahpw ketin uhpalihkin irail; re kemehla imwintihti tohtohsang 9,000, oh pil me tohto me ohla oh luhwe ko tangdoaui. 25 Re adihasang mwohni ko rehn aramas ako me kodohn pwain irail nin duwen lidu kei. Re ahpw pwakihala imwintihti ko lel wasa doh, oh pwurodo, 26 pwehki rahnen Sapad kereniongehr tepida. 27 Ni ar kihsangehr en imwihtihti ko ar tehtehn mahwen kan oh kihsang en me mehla kan ar dipwisou, re ahpw wiahda sarawien Sapad, kapikapinga Koht oh wiewia ar kasapahl kalahngan pwehki eh ketin doandoare irail lao lel rahno, oh ketin kasalehiong irail kilel keieu en sapwellime kupwur mahk. 28 Ni rahnen Sapado eh imwiseklahr, re ahpw nehk dipwisou lohdi ko ong me iang ale lokolok, liohdi kan oh me sepwoupwou kan; luhwe ko re nehkpeseng nanpwungen ar peneinei kan. 29 Mwurin mwo re ahpw ehupene oh pekipeki rehn Koht me sapwellimaniki kalahngan en ketin kupwurehla sapwellime ladu kan.

Sudas Kalowehdi Timoty oh Pakidihs

30 Mwuri, mehn Suhs ako pil mahweniong nein Timoty oh Pakidihs neira karis kan oh kemehla sounpei tohtohsang 20,000. Re kalowehdi kelen mahwen ile kei, oh kihsang dipwisou tohto, re ahpw nehkpeseng ni pahrek ong pein irail, oh ong liohdi kan, ong me sepwoupwou kan, ohl mah kan, oh irail ko me ale kalokolok. 31 Re kihpene ni keneinei nein imwintihti ko tehtehn mahwen kan oh nekidala wasa mwahu kei, oh luhwen dipwisou lohdi ko re walahng Serusalem. 32 Re kemehla kaunen nein Timoty sounpei ko, ohl suwed me kahrehiong mehn Suhs nan lokolok laud. 33 Nindokon ar wiewia kasarawihpen ar powehdi nan kahnimw en samarail mehn mahs ako, re ahpw isikala ohl ako me isikada ewen kelen Tehnpas Sarawio nan ar momourte. Me iang kamakamala iei Kalisdenihs, me rukula nan kisin ihmw kis; ih eri ale dupuken eh wiewia suwed kan.

34 Ih duwen met ohl suwed Nikanor, me lukehdo sounnetinet kid kei pwe re en pwainda mehn Suhs kan, 35 eri, e lohdi pahn aramas akan me e kin kailongki douluhl sang ni sapwellimen Koht sawas. E kesepwekehla eh kapwat lingan akan oh sopohla kelehpw duwehte lidu me kin sopohla. E ahpw kohla lel Andiok. Ihte me e pweida ie ni eh kamwomwala pein nah sounpei kan. 36 Ohl menet, me songosong en pwainla pweipwand ong Rom ni eh pahn netikihla aramas en Serusalem kan, kasalehda me mehn Suhs kan sohte kak lohdi. Koht me Sounpoadoaraparail manaman, pwehki ar kin peikiong sapwellime kosonned kan.

Copyright information for `PON2006A