a6.1 2 Nan. 15.7; 2 Kron. 26.23.
b6.3 Kaud. 4.8.
c6.4 Kaud. 15.8.
d6.9-10 Mad. 13.14-15; Mk. 4.12; Luk 8.10; Sohn 12.40; Wie. 28.26-27.

Isaiah 6

Koht ketin Malipe Aiseia en Wiahla Soukohp

Ni sounpar me Nanmwarki Usaia pwoula, I kilangada Kaun-o. E ket nan mwoale ile ieu, sapwellime likou ahpw kadirehla Tehnpas Sarawio. a  Mwohmw mpwumpwul kei ahpw uh kapilpene, emenemen irail ahneki pehnpihr weneu: riau mehn koaduhpwaldi masarail kan, riau mehn kidimpene paliwararail kan, a riau arail mehn pihr. Re ahpw kin kokoulki koul pwoatet:

“Sarawi, sarawi, sarawi!
KAUN-O, Wasa Lapalahpie, me sarawi!
Sampah pwon direkilahr sapwellime lingaling.” b 
Ngilarail kan ahpw itikada poahsoan en Tehnpas Sarawio, oh ediniei kadirehla nan Tehnpas Sarawio. c 

I ahpw patohwan, “Solahr ei koapworopwor! I rialahr pwe ei lokaia koaros me samin, oh I kin mihmi nanpwungen aramas me au samin; ahpw mesei kilangehr Nanmwarkio, KAUN-O, Wasa Lapalahpie.”

Emen mwohmw mpwumpwul ko eri pihrdohng ie, wa mwoalus ngkingken ehu me e tipwahsang pohn pei sarawio. Ih eri sairki eweiet mwoaluso, ketihtihki, “Pwehki met eh sairehr kilin ewomwen, omw sapwung kan pahn sohrasanguhkehr, oh dipomw kan pahn lapwadahr.”

Ngehi eri rongada kapitien Kaun-o me mahsanih, “Ihs me I pahn kadarala, oh ihs me pahn wia atail meninkeder?”

I ahpw sapeng, patohwan, “Iet ngehi, Maing, komwi ketin poaroneiehla.”

Ih eri mahsanihong ie I en patohla oh padahkihong aramas akan duwen mahsen pwoatet: “Mehnda ma kumwail rong kanahieng, ahpw kumwail sohte pahn dehdehki; mehnda ma kumwail pahn kilang mwahu, ahpw kumwail sohte pahn ese dahme wiewiawi.” d  10 E pil mahsanihong ie, “Ke pahn kakeptakaila kapehd en aramas pwukat, kaponehla salengarail kan, oh karotongehla masarail kan; pwe re dehr kilang, de rong, de dehdehki. Pwe ma re kilang de rong de dehdehki, re kakete sohpeidohng ie oh ale kamwahuparail.”

11 Ngehi eri patohwan, kalelapak, “Maing Kaun, ia erein met eh pahn wiawi?”

A e ahpw mahsanih, “Kahnimw kan lao pahn ohla oh sohla towe—lao ihmw kan pahn tehnla—lao sahpwo pahn wiahla sapwtehn ehu.
12 I pahn kadohwanewei aramas pwukat pwe sahpwo pwon en tehnla douluhl. 13 Mehnda ma eisek kis ehun aramas pahn luhwehdi nan sahpwo, ahpw irail pil pahn iang mwomwla. Re pahn rasehng tuken tuhke pwoat.”

(Tuken tuhke pwoatet kasalehda tepida kapw en sapwellimen Koht aramas akan.)

Copyright information for `PON2006A