Job 12

Sohp

Ei, kumwail me ngilen aramas akan.
Ma kumwail pahn mehla, kupwurokong pahn pil iang kumwail sohrala.
Ahpw pwehki eh mie ei mehn madamadau duwehte me kumwail ahneki;
I sohte dohsang kumwail ni ire wet;
aramas koaros wehwehki dahme kumwail ndahier.
Kompoakepahi kan pil kouruhrkinieier met;
re kouruhr, mehndahte ei pwung oh mwakelekel;
ahpw mie ahnsou ehu me Koht ketin karonge ei kapakap.
Sohte amwail apwal, ihme kumwail kepitkin ie;
kumwail wokiher aramas emen me nektehn pwupwudi.
Ahpw sounpirap akan oh aramas akan me sohte ar Koht kin momour ni popohl,
mehnda ma ihte ar kehlail me re kin wiahki ar koht.

Pil soahng tohto me menpihr kan oh mahn akan kak sukuhlihkin kumwail;
kumwail peki loalokong en mahn en sampah kan oh mahn en nansed akan.
Irail koaros wehwehki me nin limen KAUN-O me kapikirailda.
10 Iei Koht me kin ketin kaweid mour en sapwellime mahn akan;
mour en aramas koaros kin mihmi nin lime.
11 Ahpw nin duwen lowemwen eh kin perenki song nemen kisin mwenge,
salengomw pil perenki rongorong ngilen mahsen kan.

12 Aramas mah ahneki kupwurokong,
ahpw Koht sapwellimaniki kupwurokong oh manaman.
Aramas mah kan kin erpit;
Koht sapwellimaniki erpit oh manaman en kamwakid wasa.
14 Ma Koht pahn kauwehla, ihs me kak pwurehng onehda,
oh ihs me kak kasaledekihala aramas emen me Koht ketin salihedi?
15 Pihl kin madada, ni ahnsou me Koht kin ketin kapweiekidi keteu;
e kin lapakehda ni ahnsou me e kin ketin kadaredi keteu.

16 Koht me ketin roson oh kin ketin powehdi ahnsou koaros;
me likamw oh sounwia likamw koaros kin mihmi pahn sapwellime manaman.
17 E kin ketikihsang kupwurokong en kaun akan
oh kin ketin kupwurehda kaun akan en mwomwen pweipweila.
18 E kin ketin kasapwilidi nanmwarki kan oh salihiraildi;
19 e kin ketin kahaktikitikihala samworo kan oh aramas lapalap akan.
20 E kin ketin kanennenihala aramas likilik kan,
oh ketikihsang kupwurokong en me mah kan.
21 E kin ketin kanamenekihala me lapalap akan
oh katokihedi kehlail en kaun akan.
22 E kin ketin kamarainihada wasa rotorot akan me rasehng wasa rotorot en mehla.
23 E kin ketin kakehlahda oh ketikihong manaman ong wehi kan,
ahpw mwuhr e kin ketin kalowehdi oh kamwomwirailla.
24 E kin ketin kupwurehda arail kaun akan en mwomwen pweipweila
oh ketin mweidohng irail en sansalongseli wasa kan;
25 re dedehmseli wasa nan rot oh wasawasasseli duwehte aramas sakaula kan.
Copyright information for `PON2006A