b139.17 Sir. 18.5-7.

Psalms 139

Sapwellimen Koht Erpit oh Kupwurkalahngan
 TITLE NI MAHSEN EN IPRU: En Depit melkahka.

Maing KAUN, komw ketin kasawih ie, eri, komw ketin mwahngih ie.
Komw ketin mwahngih mehkoaros me I kin wia;
sang wasa doh, komw ketin mwahngih ei lamalam akan koaros.
Komw kin ketin mahsanih ie, ni ei kin doadoahk de kommoal, sohte lipilipil;
komw ketin mwahngih ei wiewia kan koaros.
Pil mwohn ei kin patoh,
komw mwahngiher dahme I pahn patohwan.
Komw kin ketin kapiliepene ni pali koaros;
komw kin ketin sinsilehkin ie sapwellimomwi manaman.
Omwi wehwehkin ie me inenen laud mehlel;
me apwal ong ie mehlel I en dehdehki.

Ia wasa I kak patohla ie, pwe I en pitsang komwi?
Ia wasa I kak patohwan tangala ie, pwe I en rirsang silangmwi?
Ma I pahn patohdahla nanleng, komwi pahn ketiket wasao;
ma I pahn patohdihla nan wasahn me melahr akan, komw pil kin ketiket wasao.
Ma I pahn pihrlahng palilahn palimesenleng
de kousoanla wasa keieu doh palikapi,
10 komw pil kin ketiket wasa ko pwe komwi en kin ketin kahluwa ie,
komw pil kin ketiket wasao ko pwe komwi en kin ketin sewese ie.
11 I kakete patohwanohng rotorot en koduhpwaliehdi
de marain en rotala,
12 ahpw mwohn silangmwi rotorot sohte kin rotorot,
oh nipwong kin marain duwehte nin rahn.
Rotorot oh marain kin duwepenehte rehmwi.

13 Komwi me ketin wiahda soahng koaros ni paliwereiet;
komwi me ketin kakonepene paliwereiet nan kapehd en inei.
14 I kin patohwan kapingahkin komwi omwi lammwin kowahlap;
wiepen nin limomwi kan me kapwuriamwei oh inenen mwahu mehlel.
I kin wehwehki duwen met.
15 Ni tih kat eh kakonokonpene
ni keneinei nan kapehd en inei,
ni ei tepin kekeirda wasa riro,
komw ketin mwahngihieier—
16 komw ketin mahsanihieier mwohn ei ipwidi.
Rahn akan en mouriet
kileldi nan sapwellimomwi pwuhk,
pil mwohn tepidahn keieun rahn.
17 Maing Koht, ia uwen eh apwal ong ie I en dehdehkihla audepen kupwuromwi kan;
ia uwen tohtohn audepen kupwuromwi kan! b 
18 Ma I song en wadekedi, re pahn tohtohsang piken ni oaroahr kan.
Ni ei patohwan pirida, I patohwan ieiang komwihte.

19 Maing Koht, ia uwen ei ngoangki komwi en ketin kemehla aramas suwed kan!
Ia uwen ei ngoangki aramas lemei en piseksang ie!
20 Re kin lahlahwei komwi;
re kin kasaminehla mwaromwi.
21 Maing KAUN, ia uwen ei kailongki irail kan me kin kailongkin komwi!
Ia uwen ei mwamwahliki irail kan me kin kahngohdiong komwi!
22 I kin kailongkin irail mehlel;
I kin wiahkin irail ei imwintihti.

23 Maing Koht, komw ketin kasawih ie, pwe komwi en mwahngih mohngiongiet;
komw ketin song ie, pwe komwi en mwahngih ei lamalam akan.
24 Komw ketin rapahki ma mie suwed ehu rehi
oh ketin kahluwa ie nan ahl en mour soutuk.
Copyright information for `PON2006A