Psalms 55

Kapakap en Emen me Kompoakepah Pangala
 TITLE NI MAHSEN EN IPRU: En Depit koul.

Maing Koht, komw ketin karonge ei kapakap;
komw dehr ketin sohpeisang ei pekipek!
Komw ketin karonge ie oh sapeng ie;
I inenen weikengkilahr ei pwunod akan.
I masepwehngkidahr ngihl kamasepwehk en ei imwintihti kan,
oh I ohkilahr tiahk kalok en aramas suwed kan.
Re kin kahrehiong ie apwal laud;
re kin lingeringer pahi oh kailongkin ie.

I masepwehkadahr kowahlap,
oh ahd en mehla katoutouwihielahr.
Masak kipeiedier oh I wie rerrerki;
I patohwan milahr nan masepwehk mwuledek.
I ahpw men ei pehnpihr en mie duwehte mwuroi.
I pahn pihrla oh diar wasahn ei kommoal.
I pahn pihrlahng wasa me doh
oh mihla nan sapwtehn.
I men mwadang en diarada ei wasahn rukusang
kisinieng laud oh engin melimel.
Maing ei Kaun, komw ketin kapingada lokaia en ei imwintihti kan!

I kilikilang tiahk en kamaramas oh moromor nan kahnimwo,
10 ni rahn oh nipwong tiahk suwed kan kin kohkohseli pohn kelen kahnimwo,
kadirehki dihp toutou oh kahpwal laud.
11 Wasa koaros mwomwlahr;
nanial akan inenen diren widing oh kehnaudek.

12 Ma imwintihti men me kin kapweikengih ie,
I pahn kanengamahiong;
ma peliei men me kin mwamwahlikin ie,
I kak rukusang.
13 Ahpw soh, pwe kowe me ei werek,
iengei oh kompoakepahi mehlel.
14 Kita kin koasoakoasoipene ni limpoak mehlel;
kita kin ehupene ni ata kin kaudok nan Tehnpas Sarawio.
15 Ei imwintihti kan en mehla mwohn ahnsoun arail mehla;
re en mourte kohdihla nan sapwen me melahr akan!
Mehkot suwed kin mihmi nan imwarail kan oh nan mohngiongirail kan.

16 I ahpw patohwan likwerih KAUN-O Koht pwe en ketin sewese ie,
eri e pahn ketin komouriehla.
17 Nimenseng, nin souwas oh nipwong
kaulim oh sengloal en nan kapehdiet kin leldalahng mwohn silangi,
eri e pahn ketin karonge ngileiet.
18 E pahn ketin doareiehla oh kapwureiehdo
sang nan mahwen me I kin wia
ong ei imwintihti ngedehrie.
19 Koht, me ketin kakaun sang mwohn tepin kawa,
pahn ketin karonge ie oh ketin kaloweiraildi;
pwe re sohte men wiliakapwala,
oh sohte kin masak.

20 Ei werek en mahso kin pelianda kompoakepah kan;
e kauwehla eh inou kan.
21 Eh koasoi kan me iou,
ahpw nan kapehde diren kailok;
eh lokaia kan me kansenamwahu,
ahpw keng rasehng kedlahs.

22 Mweidohng KAUN-O omw kahpwal akan,
eri e pahn ketin doareiukala;
pwe e sohte kin ketin mweidohng me lelepek kan en lohdi.

23 Ahpw komwi, Maing Koht, pahn ketikilahng nan sousou aramas loallap suwed oh aramas likamw pwukan
mwohn ar pahn lel ni elep en ar mour.
Ahpw ngehi, I pahn likih komwi.
Copyright information for `PON2006A