b7.9 Kaud. 2.23.

Psalms 7

Kapakap en Peki Pwuhng
 TITLE NI MAHSEN EN IPRUA: Koul me Depit koulkihong KAUN-O pwehki Kus mehn Pensamino.

Maing KAUN, ei Koht, I patohdo pahn kupwuromwi pwe komwi en ketin sinsile ie;
komw ketin kapitiehla oh doareiehla sang irail koaros me kin pwakipwakih ie,
pwe ma soh, re pahn duwehte laion me pahn waielahng
wasa me sohte emen kak doareiehla;
re ahpw pahn dapengiepeseng wasao.

Maing KAUN, ei Koht, ma I wiadahr sapwung ehu ong emen,
ma I pangala kompoakepahi men
de ma I wiahiong ei imwintihti men mehkot suwed ni sohte kahrepe;
ma I wiadahr ehu soahng pwukat—
eri ei imwintihti kan en pwakihiehla oh koliehdi,
pwe re en peleiepeseng oh kemeiehla
oh keseiediong nanpwel!

Maing KAUN, komw ketida nan omwi engieng!
Komw ketin uhwong sarlemei en ei imwintihti kan;
komw pein ketida oh sewese ie!
Pwuhng me komw kin ketin kupwurki,
komw ketin kapokonepene tohn wehi koaros rehmwi,
oh ketin kaunirailda sang powe.
Komwi me sounkopwung en aramas koaros.
Maing KAUN, komw ketin kasalehda ei pwung ni omwi pahn kadeikiehda;
komw mwahngih me sohte dipei.
Komwi Koht pwung men
me kin ketin wia kadeikpen at tungoal lamalam akan oh at tungoal ineng kan.
Komw ketin katokehdi wiewia suwed en aramas suwed kan
oh ketin katingih me mwahu kan. b 

10 Koht iei silepei,
e kin ketin doarehla irail kan me kin peikiong.
11 Koht iei sounkopwung pwung men
oh e kin ketin kaloke aramas suwed kan ahnsou koaros.
12 Ma re sohte pahn wekidala koasoandi kan en ar mour,
Koht pahn ketin kakengihala sapwellime kedlahs.
E ketin kadangehr sapwellime kesik ketieu oh ketin kaunopadahr en kadar;
13 e ketikidahr sapwellime tehtehn mahwen keper kan
oh kainenehier sapwellime arep kisiniei kan.

14 Tehk duwen aramas suwed kan ar kin koasoakoasone nan kapehdihr me suwed;
re kin koasoanehdi wiepen kahpwal oh kapwaiada ar widing kan.
15 Ahpw nan lidip kan me re kin kaunopohng meteikan,
re kin pein pwupwudiong loale.
16 Eri, pein arail suwed kin kaloke irail
oh pein arail lemei kin kauweirailla.

17 I kin patohwan kapingkalahnganki ong KAUN-O sapwellime pwung;
I patohwan koulki koulen kaping ong KAUN-O, Wasa Lapalap.
Copyright information for `PON2006A