a94.11 1 Kor. 3.20.

Psalms 94

Koht Sounkopwung en Aramas Koaros

Maing KAUN, komwi Koht men me kin ketin kaloke aramas;
komw ketin kasalehda sapwellimomwi engieng!
Komwi me sounkopwung en aramas koaros;
komw ketida oh ketikihong me aklapalap akan dahme konehng irail!
Ia erein aramas suwed kan ar pahn nsensenamwahu?
Maing KAUN, ia erein?
Ia erein me dipan kan ar pahn akalapalap
oh akahksuweiki ar tiahk suwed kan?

Maing KAUN, re kin kauwehla sapwellimomwi aramas akan;
re kin katoutouwihala irail kan me kisehn sapwellimomwi.
Re kin kemehla liohdi kan oh me sepwoupwou kan,
oh kin kihsang mour en mehn liki kan me kin kousoan nan at wehi.
Re kin kahski dene, “KAUN-O sohte kin mahsanih kiht;
Koht en Israel sohte kin ketin tehk wasa.”

Kumwail nei aramas akan, ia duwe, kumwail meid loalopwon oh pweipwei?
Iahd kumwail pahn loalokongla?
Koht me ketikihong kitail salengatail kan—e ahpw sohte kak ketin karonge wasa?
Ih me ketikihong kitail masatail kan—e ahpw sohte kak mahsanih wasa?
10 Ih me kin ketin angiangih wehi kan—eri dah, e sohte pahn ketin kaloke irail?
Ih me kin wia sounpadahk en aramas koaros—eri dah, e sohte ketin kupwurokong?
11 KAUN-O ketin mwahngih dahme aramas akan kin medemedewe;
e kin mwahngih duwen mwahl en audepen nan kapehdirail kan. a 

12 Maing KAUN, ia uwen peren en aramas me komw kin ketin kaweid,
me komw kin ketin padahkihong sapwellimomwi kosonned!
13 Komw kin ketin kommoalehdi sang nan eh apwal
lao pwoahr loal kin weiweida mehn lidipiedi aramas suwed.
14 KAUN-O sohte pahn ketin kesehla sapwellime kan;
e sohte pahn ketin kesehla irail kan me kisehn sapwellime.
15 Pwuhng pahn pwurehng dierekda nan mwoalen kopwung kan,
oh aramas pwung koaros pahn utung.

16 Ihs me uhda oh uhpalikin ie rehn aramas suwed kan?
Ihs me iang ie uhwong irail kan me kin wiahda me suwed?
17 Ma KAUN-O sohte ketin seweseiehda,
I uhdahn mwadangdilangehr rehn me melahr akan.
18 I patohwan, “I pwupwudier”;
ahpw Maing KAUN, sapwellimomwi limpoak poatopoat me koliehda.
19 Ni ahnsou me I kin pwunodada oh pahtoula,
komw kin ketin kansenamwahwihiehla oh kapereniehda.

20 Komw sohte kin ketin kupwurki sounkopwung mwersuwed kan,
me kin kamanahla kosonned sapahrek,
21 me kin wiahda koasoandi me uhwong aramas mwahu
oh kin pangalahng mehla aramas akan me sohte diparail.
22 Ahpw KAUN-O kin ketin doare ie;
ei Koht kin ketin sinsile ie.
23 E pahn ketin kalokehkin irail ar loallap suwed
oh ketin kamwomwirailla pwehki diparail kan;
KAUN-O atail Koht pahn ketin kamwomwirailla.
Copyright information for `PON2006A