a11.1 Esek. 40.3; Sek. 2.1-2.
b11.2 Luk 21.24.
c11.4 Sek. 4.3,11-14.
d11.6 a 1 Nan. 17.1; b Eks. 7.17-19; c 1 Sam. 4.8.
e11.7 a Dan. 7.7; Kaud. 13.5-7; 17.8; b Dan. 7.21.
f11.8 Ais. 1.9-10.
g11.11 Esek. 37.10.
h11.12 2 Nan. 2.11.
i11.13 Kaud. 6.12; 16.18.
j11.15 Eks. 15.18; Dan. 2.44; 7.14, 27.
k11.18 a Mel. 2.5; 110.5; b Mel. 115.13.
l11.19 2 Mak. 2.4-8; a Kaud. 8.5; 16.18; b Kaud. 16.21.

Revelation of John 11

Sounkadehde Riemen

Eri, kisin lepin tuhke kis, mehnsohng, duwehte sokon pwoat, ahpw kohieng ie, oh mahsen ehu pil wiawihong ie, me mahsanih, “Uhda oh sohngedi tehnpas en Koht oh pei sarawien, ke ahpw wadekada tohtohn aramas akan me wiewia kaudok nan tehnpasen. a  Ieremen ke wia sohngpen likin kelen tehnpasen. Pwe wasa pwukan pengpenglahr rehn me rotorot akan, irail pahn tiakpeseng Kahnimw Sarawio erein sounpwong pahisek riau. b  I pahn kamanahla nei sounkadehde riemen, me pahn mi nan likoun lokolok, ira ahpw pahn kapahrengkihwei mahsen en Koht erein rahn kid riepwiki weneisek.”

Sounkadehde riemeno, iei tuhke olip riapwoat oh lamp riau me mihmi mwohn silangin Kaunen sampah. c  Ma emen men kauweirahla, kisiniei pahn kusieisang nan awara ko oh kamwomwala ara imwintihti kan. Eri, mehmen me men song kauweirahla, ih duwen met eh pahn mehla. Sounkadehde riemenet ahneki manaman en ritingedi pahnlahng pwe e dehr kin keteu nindokon ara kin kapakapahrengki mahsen en Koht. Ira pil ahneki manaman en kawekiong ni nta utuhnpihl kan; oh pil manaman en kalokehki sampah soangen kalokolok koaros ni ahnsou koaros me ira inengieng. d 

Ni ara kanekehla ara kadehde, mahn kamasepwehko me pwarada sang nan pwoahr loalo me soh kapi, pahn peiong ira. Oh e pahn kaloweirahdi oh kemeirahla. e  Kahlepara pahn wonohn nan kahnimw lapalapo, wasa me ara Kaun-o lohpwuwala ie. Eri, eden kahnimwo, ni karasaras, iei Sodom de Isip. f  Oh aramas en wehi koaros, sang kadaudok koaros, lokaia koaros, pahn kilikilang kahlepara ko erein rahn siluh elep, oh re sohte pahn mweidohng emen en sarepirahdi, 10 oh irail kan me kin kousoan sampah pahn perenkihda en me riemenet ara mehla. Re pahn kamadipwkihda oh kisakispene pwehki soukohp riement ara kahrehiongehr tohn sampah lokolok laud. 11 Mwurin rahn siluh elep mour sang rehn Koht ahpw pedolongehr rehra, ira eri pwourda oh kesihnenda; oh irail koaros me kilikilang ira, re inenen masepwehngkihda kowahlap. g  12 Ira eri rongada ngihl laud ehu me peidohng ira sang nanleng, me mahsanih, “Kumwa kohdahdo met!” Ira eri dakehdahla depwek nanleng mwohn mesen ara imwintihti ko. h  13 Ni ahnsowohte sampah ahpw rerrada; eisek kis ehun kahnimwo mwomwla, oh isikid uwen tohtohn aramas me mehkihla rerrero. A aramas ako me luhwe inenen masepwehkada kowahlap, re ahpw kapikapingahki roson en Koht nanleng. i 

14 Kahpwal lapalap keriau ahpwtehn imwisekla; eri met, kahpwal lapalap kesiluh pahn mwadang leledo!

Keisuhn Sowi

15 Tohnleng keisimeno ahpw peuk nah sowio; a iet mwoarong laud kei ahpw kadirehla nanleng me ndinda, “Atail Kaun oh sapwellime Mesaia uhd sapwellimanikiher manaman en kaunda sampah ahnsou wet, oh e pahn ketin kaunda erein dih koaros kohkohlahte!” j  16 A lapalap riehk pahmeno me kin aririh Koht sang nan dewerail ko, re ahpw poarkihdi masarail ko oh pwongih Koht, 17 patopatohwan,

“Maing Koht, Wasa Lapalahpie, me kin ketin mie met oh me ketin mieier mahs!
Se patohwan kapingkalahngankihong komwi omwi ketin kasalehda roson en omwi manaman,
oh omwi ketin tapihadahr kakaun!
18 Me rotorot akan inenen lingeringer kowahlap,
pwe ahnsoun omwi engieng eh leledohr,
e lelehr ahnsoun me melahr akan ar pahn pakadeida.
Ahnsoun omwi pahn ketin katingih sapwellimomwi ladu soukohp kan,
oh pil sapwellimomwi aramas akan, me tikitik oh me lapalap akan,
oh irail koaros me kin waunekin komwi.
Ih ahnsowo met, ahnsoun kauwehla irail kan me kin kauwehla sampah!” k 
19 Eri, tehnpas en Koht me mi nanleng ahpw ritida oh kohpwahn sapwellime inou lapo ahpw sansalda nan tehnpaso. Oh soahng pwukat ahpw iang kaudiahl wet: lioal pa piripir, ngihl kei pa posopos, sampah pa wie rerrer, keteu me rasehng keteu aihs takai pa mweremwer. l 

Copyright information for `PON2006A