Ezekiel 6

KAUN-O ketin Keriahla Dikedik en Eni kan

KAUN-O ketin mahsanihong ie, “Kowe, nein aramas, kilengwohng pohn nahna kan en Israel oh kihiong irail ei mahsen. Padahkihong nahna kan en Israel en rong mahsen en KAUN-O, Wasa Lapalahpie—en rong dahme ngehi, KAUN-O, Wasa Lapalahpie, ketin mahmahsanihong nahna kan, dohl kan, wahu loal kan, oh wahu tikitik kan; I pahn kadarodo kedlahs pwoat pwehn kamwomwala wasa kan me aramas kin kaudokohng dikedik en eni kan ie. Pei sarawi kan pahn mweredi oh pei sarawien warpwohmwahu kan pahn ohla. Aramas koaros wasao pahn kamakamala mwohn mesen ar dikedik en eni kan. I pahn kamwarakpeseng paliweren mehn Israel kan me melahr; I pahn kamwarakpeseng tihrail kan kapilkipene pei sarawi kan. Kahnimw koaros en Israel pahn kamwomwmwomwla, pwe arail pei sarawi koaros oh dikedik en eni koaros pahn mwerpeseng, arail pei sarawien warpwohmwahu kan pahn ohla, oh mekoaros me re wiadahr pahn sohrala. Aramas pahn kamakamala wasa koaros, oh irail kan me pahn pitla pahn esehla me ngehi, iei KAUN-O.

“I pahn mweidohng ekei en pitsang kamalahn aramaso oh mwarahkpeseng nan wehi kan, wasa re pahn kalipilipala ie. Re ahpw pahn tamaniehda wasao oh esehla me I kaloke irail oh kasaroweiraildi pwehki arail nan kapehd soaloalopwoat kan eh soikiehla oh mwohnkihla dikedik en eni kan sang ie. Oh re pahn kauwong pein irail ar lingeringer pwehki suwed oh tiahk sapwung kan me re wiadahr. 10 Re pahn esehla me ngehi, KAUN-O, oh ei kehkehlik kan kaidehn mehkot mwahl.”

11 KAUN-O, Wasa Lapalahpie, mahsanih, “Welik pehmw kan! Tomtomki nehmw kan! Sengiseng en pahtou pwehki soahng suwed, oh kasaut kan me mehn Israel wiadahr. Re pahn mehkihla mahwen de lehk lapalap de soumwahu. 12 Irail kan me mihmi wasa doh pahn soumwahuda oh mehla; irail kan me mi wasa keren pahn mehkihla mahwen; irail kan me pahn pitsang mehla pahn uhd mehkihla duhpek. Re pahn kehn engin ei engieng koaros. 13 Paliweren me melahr akan pahn mwarahkpeseng nanpwungen dikedik en eni kan oh kapilpene pei sarawi kan, re pahn mwarahkpeseng pohn dohl ile koaros, pohn kumwen nahna koaros, pahn tuhke losolos koaros oh pahn tuhke ohk laud koaros, wasa koaros me re kin wia ie ar meirong isihs ong ar dikedik en eni kan. Eri, aramas koaros ahpw pahn esehla me ngehi, iei KAUN-O. 14 Ei, I pahn kapahwei limei oh kamwomwala arail wehi. I pahn wiahkihla sapwtehn sang ni palieir en sapwtehno lellahng kahnimw Ripla ni paliepeng, I sohte pahn mahkohng wasa kis me mehn Israel kan kin kousoan ie. Eri, koaros ahpw pahn esehla me ngehi, iei KAUN-O.”

Copyright information for `PON2006Z