Job 23

Sohp

I kahngohdiong oh kaulime Koht;
I sohte kak katokihedi ei lipahned.
Ia uwen ei men rapahki wasa me e ketiket ie,
oh ese ia duwen ei pahn kolahng wasa me ketiket ie.
I pahn kasalehda ei repenpwung mwohn silangi,
oh kasalehda ei kadehde kan pahn kupwure.
I men ese dahme e pahn mahsanih,
oh ia duwen eh pahn ketin sapeng ie.
Koht pahn ketin doadoahngki sapwellime kehl unsek pwe en ketin uhkihong ie?
Soh, e pahn ketin karonge ei sakarada.
I me mehlel; I kak patohwanohng Koht ei pwung;
e ahpw pahn ketin kasalehda ei mwakelekel met oh kohkohlahte.

I rapahkiher Koht ni Palimese, ahpw e sohte ket wasao;
I sohte diar ni ei rapahki ni Palikapi.
Koht ketin wiewia sapwellime doadoahk ni Paliepeng oh Palieir,
ahpw I sohte mwahn patohwan diar.
10 Ahpw iet pwe Koht mwahngih kahk koaros me I wia;
ma e pahn ketin song ie, e pahn ketin diarada ei mwakelekel.
11 I idawehn ni loalopwoat ahl akan me e kin ketin pilada,
oh sohte kin pireksang loale.
12 I kin kapwaiada sapwellime koasoandi ahnsou koaros;
I kin idawehn dahme e kupwurki, a kaidehn dahme nsenei.

13 E sohte kin ketin wekidala kupwure. Sohte emen kak uhwong
de kapweiekidi dahme e kupwukupwure en wia.
14 E pahn ketin kapwaiada dahme e ketin koasoanehdi ong ie;
koasoandio iei ehu sang nan sapwellime koasoandi tohto me e ketin kupwuredahr;
15 I rerrerki ei masepwehk mwohn silangi.
16 Koht Wasa Lapalahpie ketin kauwelahr kehl en nan kapehdi.
Iei Koht me I masakadahr, a kaidehn rotorot—
mehndahte rotorot eh kakunlahr meseiet.
Copyright information for `PON2006Z