Job 27

Sohp

I kahukihla ni mwaren Koht Wasa Lapalahpie me ketin ieias,
me ketin soikala ei pwung oh ketikihong ie nan nsensuwed laud—
erein Koht eh pahn ketin kupwurehkin ie engin mour,
kilin eweiet sohte pahn patohwan mehkot suwed,
loweiet sohte pahn likamw.
I sohte pahn koasoia me kumwail aramas pwung;
I pahn keptakaila koasoakoasoia ei mwakelekel lao lel rahn en ei mehla.
I sohte pahn tokedihsang ei repenpwungki ei pwung;
pwe kadeikpen loalei me mwakelekel.

Irail kan koaros me uhwong ie
en ale lokolok duwehte me suwed akan, me sohte pwung kan.
Ia koapworopwor en aramas akan me sohte ar Koht
ni ahnsou me Koht pahn ketin malipeirail?
Ni ahnsou apwal eh pahn lelohng irail,
ia duwe, Koht pahn ketin karonge ar likwer?
10 Re uhdahn pahn inengieng soangen peren kan me Koht kin ketikihda;
re uhdahn pahn poaden kapakapohng.

11 Mweidohng ie I en padahkihong kumwail uwen lapalap en sapwellimen Koht manaman,
oh kawehwehda dahme Koht Wasa Lapalahpie ketin koasoanedier.
12 Ahpw soh, pwe pein kumwail kilangehr;
eri, dahme kumwail wiewiahki lokaia mwahl?
Sopahr

13 Met iei duwen Koht Wasa Lapalahpie
eh kin ketin kaloke me suwed, sounkam aramas akan.
14 Ele re pahn neitik pwutak tohto,
ahpw irail koaros pahn mehla nan mahwen;
kisin mwenge sohte pahn itarohng neirail seri kan.
15 Irail kan me pahn pitla pahn mehkihla soumwahu,
oh arail pwoud kan sohte pahn mwahieikin irail.
16 Me suwed akan pahn naineki silper tohto me sohte kak wadawad
oh arail likou pahn depasang uwen me aramas kin anahne;
17 ahpw ekei aramas mwahu me pahn likawih likou ko,
oh ekei aramas mehlel me pahn nainekihla silper ko.
18 Me suwed kan kin kauwada ihmw rasehng pesen likan
de rasehng imwen kersapw.
19 Ehu rahn re pahn wendi nan arail kepwe kan,
oh ni ar pahn pirida, arail kepwe kan pahn sohralahr.
20 Apwal mwuledek pahn lelohng irail rasehng lapake;
kisinieng en nipwong pahn ipirirailla;
21 kisinieng en palimese pahn ipirirail sang nan imwarail kan;
22 e pahn ipirirail ni mwuledek
nindokon ar pahn nannantihong en tangdoaui.
23 Kisinieng pahn pwakih irail nindokon ar pahn tangatang,
kamakamasak kin irail manaman en kamwomwala wasa.
Copyright information for `PON2006Z