Job 6

Sohp

Ma ei apwal oh pahtou kan pahn tenekda pohn mehn tenek kan,
re pahn toutou sang pihk en nansed,
ihme kumwail dehr pwuriamweiki ei pato mwahl akan.
Koht Wasa Lapalahpie ketin kasikihkinieier arep,
oh pwoisin en arep kan doupesengier nan paliwerei unsek.
Koht ketin kairakalahr sapwellime wiewia kamasepwehk kan pwehn uhkihong ie.

Ahs emen kin nsenamwahuki kangkang dihpw,
oh kou men kin nennenla ni eh kangkang dihpw meng.
Ahpw ihs me kak tungoale suhpw nampil, me sohte soahl?
Ia nemenemen wasa pwetepwet en nan kutoahr?
I sohte inangih soangen tungoal me duwehte met,
oh I kin soumwahuki soahng koaros me I kin tungoale.

Dahme Koht sohte ketikihong ie dahme I patohwan peki?
Dahme e sohte ketin sapengki ei kapakap?
E seu ketin wonlahte mwowe oh kemeiehla!
10 Ma I ese me e pahn ketin kemeiehla, I pahn lusuluski ei peren,
mehnda ma ei medek me mwuledek.
I patohwan ese me Koht me sarawi;
I sohte mwahn kin uhwong dahme e kin ketin koasoanehdi.
11 Ia ei kehl pwe I en kak momourki?
Dahme I momourki ni eh sohte ei koapworopwor?
12 Ia duwe, I wiawihda sang ni takai? Paliwerei wiawihkihda mete?
13 Solahr ei kehl me pahn doareiehla;
solahr wasa me I pahn sohpeila ie oh peki sawas.

14 Nan apwal duwehte met, I kin anahne kompoakepahi loalopwoat akan—
mehnda ma I soikalahr Koht de soh.
15 Ahpw kumwail, kompoakepahi kan, kumwail pitihiehdi rasehng piletik kan
me kin madada ahnsoun sohla keteu.
16 Piletik kan direkihla sinoh oh aihs,
17 ahpw ni ahnsoun karakar re kin sohrala,
oh nan warawar en piletik kan kin ngalangalada oh madekengla.
18 Pwihnen seiloak kan kin salongkihla ar raparapahki pihl;
re kin sansalongseli oh mehla nan sapwtehn.
19 Pwihnen seiloak kan sang Sipa oh Tema kin raparapahki,
20 ahpw ar koapworopwor kin sohrala limwahn piletik madada kan.
21 Kumwail rasehng piletik kan ong ie,
kumwail kilang ei lokolok oh pweiekiwei ni masepwehk.
22 Dah, I peki kumwail en kihong ie ehu kisakis
de pwainohng emen ni tiahk sapwung pwehn sewese ie,
23 de doareiesang imwintihti de emen me ahneki manaman en kaunda ni suwed?

24 Eri, kumwail padahkihdo oh kasalehiong ie ei sapwung kan.
I pahn nennenla oh rong kumwail.
25 Lokaia mehlel me kehlail,
ahpw amwail koasoi kan me soh katepe.
26 Kumwail lemeleme me dahme I ndinda duwehte kisinieng;
ahpw ia kahrepen amwail sapeng ei koasoi kan en soh koapworopwor?
27 Kumwail pahn pil petki lidu sepwoupwou kan
oh kepwehpwehkihla kompoakepahmwail kan!
28 Kumwail kilang nan meseiet, I sohte pahn lokaia likamw.
29 Kumwail inenen uklahr oh daulihalahr mehlel. Kumwail tokedihsang amwail mwekid sapahrek kan.
Kumwail dehr kadeikiehda. Pwe ngehi me pwung.
30 Ahpw kumwail medemedewe me I likilikamw—
kumwail medemedewe me I sohte kak ese dahme pwung oh sapwung.
Copyright information for `PON2006Z