Numbers 3

Nein Aaron Pwutak kan

Iet peneineien Aaron oh Moses ni ahnsou me KAUN-O ketin mahseniong Moses pohn Nahna Sainai. Aaron naineki pwutak pahmen: Nadap, iei ih me keieu laud, Apihu, Eleasar, oh Idamar. a  Moses keieiraildier oh kasarawihirailla ong samworo, ahpw Nadap oh Apihu kamakamala ni ahnsou me ira meirongkihong KAUN-O kisiniei keinepwi nan Sapwtehn Sainai. Sohte neira seri, Eleasar oh Idamar wiewiahki doadoahk en samworo nindokon Aaron eh momour. b 

Mehn Lipai kan Idihda pwehn Papah Samworo kan

KAUN-O ketin mahsanihong Moses, “Ekerodo kadaudok en Lipai oh kilelehdi pwe re en kin papah samworo Aaron. Re pahn wia doadoahk me anahnepe mie nan Impwal me I pahn kin ketiket loale oh wia en Aaron pwukao kan oh en mehn Israel kan koaros. Re pahn apwalih dipwisou kan en nan Impwalo oh wia doadoahk ong mehn Israel kan koaros. Ihte en mehn Lipai kan ar pwukoa, iei re en papah Aaron oh nah pwukat ko. 10 Ke pahn pilada Aaron oh nah pwutak kan pwe re en wiewia pwukoahn samworo; mehmen me pahn song en iang wia pwukoa wet pahn kamakamala.”

11 KAUN-O ketin mahsanihong Moses, 12 “Sang met kohla mehn Lipai kan pahn wiahla nei aramas. Ni ei kemehla mesenih en mehn Isip ko, I kasarawihong ie mesenih en ehuehu peneineien mehn Israel oh mesenih en nair mahn koaros pwe re en wiahla nei. Met I piladahr mehn Lipai kan pwe re en wiahla nei, wiliandi mesenih en mehn Israel kan. Re wialahr nei aramas. Ngehi me KAUN-O.” c 

Wadawad en mehn Lipai kan

14 KAUN-O mahsanihong Moses nin Sapwtehn Sainai 15 en ntingihedi mehn Lipai ko nin duwen ar peneinei, kilelehdi ohl koaros me mahki sounpwong ehu kohda. 16 Moses eri kapwaiada. 17 Lipai naineki pwutak silimen: Kerson, Kohad oh Merari, irail me pahpa kahlap en peneinei kan me weuwa adarail ko. Kerson naineki pwutak riemen: Lipni oh Simei; Kohad naineki pwutak pahmen: Amram, Isar, Epron, oh Ussiel; oh Merari naineki pwutak riemen: Mahli oh Musi. Irail me wia pahpa kahlap en peneinei kan me weuwa adarail kan.

21 Peneineien Kerson kispeseng wiahda peneineien Lipni oh Simei. 22 Ohl koaros mehn Lipai me mahkier sounpwong ehu kohda patpene wiahda me 7,500. 23 Peneinei wet pahn kauwada imwarail impwal kan ni palikapi en Impwalo. 24 Eliasap, nein Lael me pahn wia kaunen peneinei wet. 25 Irail pahn pwukoahki Impwalo, pwelengen masloale oh liki, kahdeng en wenihmw, 26 kahdeng en kehl me kapilpene Impwalo oh pei sarawio, oh kahdeng en wenihmwen kehlo. Irail me pwukoahki doadoahk koaros me pid dipwisou pwukat. 27 Peneineien Kohad kispeseng wiahda peneineien Amram, Isar, Epron, oh Ussiel. 28 Ohl koaros mehn Lipai me mahkier sounpwong ehu kohda patpene wiahda me 8,600. 29 Peneinei wet pahn kauwada imwarail impwal kan ni palieir en Impwalo, 30 Elisapan, nein Ussiel me kaunen peneinei wet. 31 Irail me pwukoahki Kohpwahn Inowo, tehpelo, dewen lampo, pei sarawi ko, oh kepwehn kamwakel me samworo kin doadoahngki Wasa Sarawio, oh kahdeng en wenihmwen Wasa Sarawiheo. Irail me pwukoahki doadoahk me pid dipwisou pwukat. 32 Kaunen mehn Lipai ko iei Eleasar, nein Aaron. Ih me kin kaun irail me wiewia ar pwukao kan nan Wasa Sarawio.

33 Peneineien Merari kispeseng wiahda peneinei kan en Mahli oh Musi. 34 Ohl koaros mehn Lipai me mahkier sounpwong ehu kohda patpene wiahda me 6,200. 35 Peneinei wet pahn kauwada imwarail impwal kan ni paliepeng en Impwalo, oh Suriel, nein Apieil me kaunen peneinei wet. 36 Re kileldi en pwukoahki uhr en Impwalo, ndape kan, lepin uhr ko, poahsoane, oh soahng teikan koaros. Re pwukoahki doadoahk koaros me pid dipwisou pwukat. 37 Re pil pwukoahki lepin uhr, poahsoane, tuhkehn kateng, oh sahl en likin kehlo.

38 Moses oh Aaron oh nah pwutak ko pahn kauwada imwarail impwal kan mwohn Impwalo ni palimese. Re pahn wia en mehn Israel kan ar kaudok nan Wasa Sarawio. Ma emen tohrohr pahn song en wia doadoahk pwukat pahn kamakamala. 39 Ohl koaros mehn Lipai me mahkier sounpwong ehu kohda me Moses ngtingihedi ni wadepen peneinei duwen me KAUN-O mahsanih, irail me 22,000.

Mehn Lipai Wiliandi Mesenih en mehn Israel kan

40 KAUN-O mahsanihong Moses, “Ngehi me naineki mesenih en mehn Israel kan koaros. Eri ngtingihedi eden mesenih pwutak koaros en Israel, sang me sounpwong ehu kohda. Ahpw mehn Lipai koaros me I naineki wiliandi mesenih koaros en Israel. Ngehi me KAUN-O! I pil naineki pelimen koaros en mehn Lipai.” 42 Moses eri kapwaiada mehkoaros me KAUN-O mahsanihong oh ntingihedi mesenih ohl koaros me mahkier sounpwong ehu kohda; 43 eri irail koaros patpene me 22,273. 44 KAUN-O ketin mahsanihong Moses, 45 “Met kasarawihong ie mehn Lipai kan wiliandi mesenih ohl koaros en mehn Israel, oh nein mehn Lipai pelinmen kan wiliandi nein mehn Israel mesenih en mahn akan. 46 Pwehki mesenih en mehn Israel kan ar tohtohkihsang mesenih en mehn Lipai kan aramas 273, ke pahn pwainda mesenih 273-o. 47 Emenemen mesenih pahn pweipweiki mwohni silper limau nin duwen me koasoandier. 48 Ke pahn kihong Aaron oh nah pwutak ko mwohni wet.” 49 Moses eri kapwaiada mahsen wet oh ale 50 mwohni silper 1,365 51 oh kihong Aaron oh nah pwutak ko.

Copyright information for `PON2006Z