Psalms 108

Kapakap en Sawas en Uhwong Imwintihti kan
 TITLE NI MAHSEN EN IPRU:En Depit melkahka; koul pwoat.

(Melkahka 57.7-11; 60.5-12)

Maing Koht, ni ei koapworopwor unsek,
I pahn koul oh kapinga komwi!
Ngeni, pirida!
Nei arp oh lair, kumwa pirda!
I pahn pangenda ketipin.
Maing KAUN, I pahn kasapahlkalahngan ong komwi nanpwungen wehi kan.
I pahn kapinga komwi nanpwungen aramas akan.
Sapwellimomwi limpoak poatopoat kipe wasa koaros nanleng;
sapwellimomwi loalopwoat kin leldawohng pahnlahng.

Maing Koht, komw ketin kasalehda sapwellimomwi lapalap pahnlahng,
oh sapwellimomwi lingan wasa koaros nin sampah.
Komw ketin komourkinkitala sapwellimomwi manaman; komw ketin sapeng ei tungoal kapakap,
pwe irail kan me komwi kin ketin loalloale re en kapitipitla.

Koht ahpw ketin poahngok sang nan mwoale sarawio, mahsanih,
“Ni manaman en powehdi I pahn pwalangpeseng Sekem
oh nehkpeseng Wahun Sukot rehn nei aramas akan.
Kilead ngehi me uhdahn pahn ahneki, Manase pil duwehte;
Epraim iei ei lisoarop en mahwen
oh Suda ei sokon en nanmwarki.
Ahpw I pahn doadoahngki Mohap duwehte nei dahl en epwinek,
I pahn kesehdiong pohn Edom ei suht,
kilel en eh uhdahn ahi.
I pahn kadekedengki ei powehdi mehn Pilisdia kan.”

10 Maing Koht, ihs me pahn kahreielahng nan kahnimw kehlailo?
Ihs me pahn kaluwaielahng Edom?
11 Ia duwe, mehlel me komw ketin soingkitalahr?
Komw sohte pahn ketin iang kahluwa at tungoal karis kan?
12 Komw ketin sewesei kiht pelian at imwintihti kan;
pwe sawas en aramas me mwahl oh sokatepe.
13 Ma Koht pahn ketin iang kitail, kitail pahn powehdi;
ih me pahn ketin kalowehdi at imwintihti kan.
Copyright information for `PON2006Z