b41.9Mad. 26.23; Mk 14.18; Luk 22.21; Sohn 13.18.
c41.13Mel. 106.48.

Psalms 41

Kapakap en Aramas Soumwahu
 TITLE NI MAHSEN EN IPRU:En Depit melkahka.

Meid pai irail kan me kin nsenohki apwalih me semwehmwe kan;
KAUN-O pahn ketin sewese irail nan arail apwal.
KAUN-O pahn ketin sinsile irail oh kolokol arail mour;
e pahn ketin kaperenihirailda nan sahpwo;
e sohte pahn ketin keseirailla pahn manaman en arail imwintihti kan.
KAUN-O pahn ketin sewese irail ni ar pahn soumwahu
oh e pahn ketin kakehlairailda.

I ahpw patohwan, “Maing KAUN, I patohwan dipadahr ong komwi;
komw ketin kupwur kalahngan ong ie oh ketin kakehlaiehda.”
Ei imwintihti kan kin koasoia soahng suwed kei duwen ngehi.
Re mwahuki I en mehla oh manoknokla douluhl.
Irail kan me kin patohdo tuhwong ie re sohte kin mehlel ong ie;
re kin pein kinehda koasoi suwed kan duwen ngehi
oh kin kohseli koasoiaseli wasa koaros.
Koaros me kin kailongkin ie kin mwengininginkipene duwen ngehi,
re kin medemedewe mehkot suwed ong ie.
Re kin nda, “Eh soumwahu laudlahr mehlel;
e solahr pahn kak pwurehng mwahula.”
Pil me uhdahn kompoakepahi mehlel, me I kin keieu likih,
me kin iang kang kenei mwenge,
e pil uhwongieier. b 

10 Maing KAUN, komw ketin kupwurkalahngan ong ie, oh ketin kakehlaiehda,
oh I ahpw pahn dupukohng ei imwintihti kan.
11 Re sohte pahn poweiehdi,
oh I pahn ese me komw kupwurperenkin ie.
12 Komw pahn ketin sewese ie, pwehki ei kin wia dahme pwung;
komw pahn kolokol ie mwohn silangmwi kohkohlahte.
13 Kapinga KAUN-O, Koht en Israel!
Kapinga ih met oh pil kohkohlahte!

Amen! Amen! c 
Copyright information for `PON2006Z