b62.12Sohp 34.11; Ser. 17.10; Mad. 16.27; Rom 2.6; Kaud. 2.23.

Psalms 62

Sapwellimen Koht Epwel, iei ei Koapworopwor
 TITLE NI MAHSEN EN IPRU:En Depit melkahka.

I awiawih ni kanengamah pwe Koht en ketin komouriehla;
ihete me I kin koapworopworki.
Ihete me silepei oh sounkomourpei;
ih me soundoarepei;
sohte me kak poweiehdi.

Ia erein amwail pahn pelipelian aramas emen
me rasehng kehl ehu me kerengkpesengehr?
Ih me kumwail mwahuki en sikendihsang nan dewe me wahun;
kumwail kin perenki lokaia likamw.
Kumwail kin wia koasoi en kapaia,
ahpw nan mohngiongimwail kan kin keriahla.

Koht ohte me I kin likih;
ihete me I kin koapworopworki.
Ihete me silepei oh sounkomourpei;
ih me soundoarepei;
eri I sohte pahn lohdi.
Komourpei oh pil wauwi kin kohsang rehn Koht ohte;
ih me silepei kehlail;
ih me perehpei.

Kumwail nei aramams akan, kumwmail likih Koht ahnsou koaros.
Kumwail kasalehiong amwail apwal kan koaros,
pwe ih me atail wasahn ruk.

Aramas akan kin rasehng kisin mwahi kis;
sohte wadepen irail koaros, me laud akan oh me tikitik kan.
Ma re pahn tenekda, sohte pahn toutouwihr;
re marahrahsang angin esingek en aramas.
10 Kumwail dehr likih lemei;
pil dehr koapworopworki me kumwail pahn kepwehpwehkihla pirap;
mehnda ma kumwail pil kepwehpwehla,
a kumwail dehr koapworopworki.

11 I rongehr pak kei Koht eh mahsanih
me ih me ketin sapwellimaniki manaman
12 oh sapwellime limpoak me poatopoat.
Pein komwi, Maing ei Kaun, komwihte me kin katingih aramas nin duwen ar wiewia kan. b 
Copyright information for `PON2006Z