1 Corinthians 14

KOMAIL anane limpok, pil inon ion pai nenin akan, a iet me kasampwal re ’rail, kokopada! Pwe me kin lokaia kida nil en wai, kaidin aramas akan, me a kin lokaia on, a on Kot, pwe sota amen kin dedeki; ari so, ni nen o a kin lokaia kida me rir akan. A me kin kokop, kin padaki on aramas akan, pwen kamaui, o panau o kamait ir ala. A me lokaiaki nil en wai, kin kamaui pein i, a me kin kokop, kin kamaui momodisou. I men, komail karos en asa lokaia ki nil toror, a mak eta, komail en kokopada, pwe me kin kokopada, me lapa san me kin kaparok ki nil toror, ma a so kak kasiriwukila, pwe momodisou en kamaukila. Ari ri ai kan, ma i pwara won komail, ap lokaia ki nil toror, da katepa on komail, ma I sota kaweweda de kasansaleda, de kokopada, de padak? Iduen meakan, me kin lokolokaia ap sota memaur, ma men kwai de arp sota pan nor pasan, is me pan kak dedeki, da me ira kauleki? O ma koronete pan popeuk pin, is me pan onopadan mauin? A iduen komail, ma komail pan lokaia ki nil toror, ap sota kaweweda, is me pan dedeki? Pwe omail lokaia pan me mal kot. 10 Son en lokaia toto nan sappa, a sota eu me so puloi. 11 A ma i sasa wewe en lokaia eu, i pan rason men wai men on me kin kaparok, o me kin kaparok, pan rason men wai men on ia. 12 A pil dueta komail, pwe komail kin anane pai nenin akan, komail ari pil nonki kakairida ni mepukat, pwen kamauie kila momodisou. 13 A ma amen lokaia kida nil en wai, i en kapakap ap pil kasiriwukila. 14 Pwe ma i wia kapakap ki lokaia nil en wai eu, nen i kin kapakap ap sota katepa on amen. 15 Ari, da me i pan wia? I pan kapakap ni nen i ap pil pan kapakap ni ai lamelam; i pan kapina ni nen i ap pil kapina ni ai lamelam. 16 A ma koe pan kapaiada ki nen o, iaduen me sota dedeki pan kak inda amen murin om kapina? Pwe a sasa me koe indinda. 17 Ei me mau melel om kapikapina, a sota kadepa on me teio. 18 I kin danke Kot, pweki i kin lokaiaki nil toror san komail. 19 Ari so nan momodisou i men kida lep in lokaia limau, me pwili san ai lamelam san lep in lokaia nen ni nil toror, pwen padaki on me tei kan. 20 Ri ai kan, komail der wiala seri ni omail lamelam, a ni me sued komail en rason kisin seri, a ni omail lamelam komail en unsokela. 21 A intinidier nan kapun: Lokaia o kil en aua toror, me I pan lokaiaki on kainok wet, a re pil sota pan duki on ia, me Kaun o kotin masani. 22 Nan i me lokaia toror mia, pwen kileledi kaidin me poson akan, a me soposon akan; a deideikop kaidin on me soposon akan, pwe on me poson akan. 23 A ma momodisou pan pokon pena wasa kis, o ma karos pan lokaia ni nil toror, a ma akai ian me sota dedeki, de akai me soposon, irail sota pan inda, me komail iakalar? 24 A ma karos kin kokop, o amen pan pwarado, me soposon, o me sota dedeki, karos pan kasansale on i dip a, o a pan pakasaui ren karos. 25 Iduen a me rir akan nan monion i pan sansaleda, o a pan tairokedi ni mas a, kaudoki on Kot, o pan inda, melel Kot kotikot re omail. 26 Ri ai kan, iaduen komail ni omail pokon pena, kaidin amen amen kin kida psalm eu? A amen kin kawewe, a amen nil toror, a amen kasansal eu, a amen kin kasiriwukila; a karos en wiaui, en kamauiada. 27 A ma amen pan wia nil en wai, me ta riamen, de ma me toto, re pan silimen, a irail pan irok wei a amen en kasirawukila. 28 A ma sota men kasiriwuk mia, i en nenenla nan momodisou; a en kasoi on pein i o Kot. 29 A riamen de silimen ren saukop akan pan kak kaparok, a me tei kan en kasauiada. 30 A ma amen, ren me momod wasa o, pan diar kasansal eu, men mas ap pan nenenla. 31 A komail karos kak kokop, irok weida, pwe karos en padakki o kamaitala. 32 A nen en saukop akan kin duki on saukop akan. 33 Pwe kaidin komoan me pin men Kot, a en popol duen ni momodisou en saraui akan karos. 34 Omail li akan en nenenla nan momodisou kan, pwe a sota muei on irail, en kaparok; a irail en papa, duen kapun me pil masani. 35 A ma irail men asa okotme, irail en kalelapok ren arail warok kan ni deu ’rail, pwe me kanamenok, li en kaparok nan momodisou. 36 De masan en Kot tapi san komail? De a ko won komail eta? 37 A ma amen lamelame, me a saukop amen, de me a nenin, a en asa wewe en me i intinki won komail, pwe mepukat kusoned en Kaun o. 38 A ma amen lolepon, i en lolepon. 39 Ari ri ai kan en inon ion kokop, o ender kainapwi lokaia nil toror. 40 A meakaros en wiaui nin tiak mau o pun.

Copyright information for `PONPDN