2 Corinthians 4

KIT sota kin panada, pweki at koa dodok me se aleer ki mak o. Pwe kit muei saner sued okiok kan o se sota weweideki widin o sota liasosa ki masan en Kot; pwe ni at kapwareda melel kit kin kamaui pein kit on insen en aramas karos mon Kot. A ma at ronamau me malar, nan a malan men lokidokila kan. Me kot en sappa wet karotonal a nan monion en me soposon akan, pwe ren der kilan marain en ronamau duen linan en Kristus me mom en Kot. Pwe kit sota kin padaki duen pein kit, a duen Kristus Iesus, me i Kaun, a kit ladu ’mail pweki Iesus. Pwe Kot me masanier, marain en pwarada san ni rotorot, me kotin kamarainiedar nan monion it, pwe sen maraineki o dedeki linan en Kot ni silan en Iesus Kristus. A kit kin kolekol pai wet ni dal pwel, pwe manaman en kaindinda Kot a so kit. At apwal akan me andere kit pena, a se sota kin masak; sota wasa, me se pan kak pitila ia ap sota lodi. Pan kamekam, ap sota kamela; pan kalokolok, ap sota mela; 10 O kit kin wewa sili ni war at en Iesus a matala, pwe maur en Iesus en pil sansal ni war at. 11 Pwe kit, me memaur, kin kilele on mela ansau karos pweki Iesus, pwe maur en Iesus en pil sansaleda ni uduk atail. 12 Nan i mela kin kelail on kit, a maur on komail, 13 A kit aleer nen en poson ota, duen a intinidier: Nai me poson, I me i padaki wei. Kit me pil posonlar ap padapadaki. 14 Se asaer, me i, me kotin kaiasadar Kaun Iesus, pan pil kotin kaiasada kitail ian Iesus, o pan kotin kasansaleda kitail o komail mo a. 15 Meakaros wiauier pweki komail, pwe mak o ni a laude kilar me toto, en kalaudela melel danke, pwen kaliwanada Kot. 16 I me se sota kin panada, a ma at pali liki en aramas pan soredi, pali lol it kin kokoda ni ran karos. 17 Pwe atail ansau apwal me motomot o tikitik; ap kare on kitail linan soutuk eu me lapalap melel, 18 Pwe kitail sota kin kilekilan meakan me sansal, a meakan me so sansal. Pwe me sansal me katuk, a me so sansal me soutuk.

Copyright information for `PONPDN