2 Thessalonians 3

ARI ri at akan, komail kapakapa kin kit, pwe masan en Kaun o en pwaida o linanla duen a wiauier re omail. O pwe kit en sapedokala san aramas solelapok kan; pwe poson kaidin pwais en aramas karos. A Kaun o me melel, me pan katene komail o nikid san ni me sued. Se kaporoporeki Kaun o re omail, me komail kin dadaurata o pan wiada, me se kakaliki on komail er. A Kaun o en kotin wiawia monion omial, pwe komail en direki limpok en Kot o kanonama en Kristus. Ri ai kan, se kakaliki on komail ni mar en atail Kaun Iesus Kristus, me komail en muei san saulan karos, me kin dadaurata padak, me komail roner san kit. Pwe komail asa duen idedauen kit, pwe kit sota wiadar sapun nan pun omail. O se sota ale san amen kan at mana, ap sota pwaipwai, pwe se dodok apwal ni pon o ni ran, pwe sen der katoutouki amen komail. A kaidin pwe a sota muei on kit, a pwe sen wia kin kit kilel en me komail en alale san. 10 Pwe ni at mimi re omail, iet me se kakaliki on komail, meamen me kan wia dodok, a pil sota pan mana. 11 Pwe se roner, me akai mi re omail, me kin weweid ni mesued ni ar solar kin dodok, a re apwali kisin tiak mal. 12 Ari, irail me due met, se indai on o panaui irail, pan Kaun Iesus Kristus, me irail en dodok, o nennenla o tunole pein kan ar mana. 13 A komail, ri ai kan, der panki omail wiawia mau. 14 A ma amen kan oke at padak nan kisin likau et, I me komail en kileledi, o komail der apwali i, pwe I en namenokela. 15 A komail der wiaki I imwintiti amen, a sauesa I duata ri omail amen. 16 A Kaun en popol en pein kotiti on komail popol ansau karos o ni son karos! Kaun o en kotikot re omail karos! 17 Nai Paulus ranamau ni manin pa i, me kisin likau karos kilelekidi, iduen ai intin. 18 Mak en atail Kaun Iesu Kristus en mi re omail karos!

Copyright information for `PONPDN