Acts 18

MURIN mepukat a kotila san Aten o kotilan Korint, A lao diaradar Sus amen me ad a Akwila me ipwidier Pontus, me apton kodo san Italien o a paud Prisila, aki Klaudius masani, me Sus oko karos en kokoke san Rom, i ari kotilan re ’ra. O kotikot re ’ra, ian dodok, pwe ira son ta ieu wiada im likau. O ni ran en sapat karos a kin kotin padapadak nan sinakoke o kalekalolekone men Sus o men Krik kan. A Silas o Timoteus lao kodido san Masetonien, Paulus kotin sopisokki kaualap padak o, pwe a kadede on Sus akan, me Iesus me Kristus. A irail lao akamai o lalaue, a ap sipededi sapwilim a likau masani on irail: Dip omail en kapokon on pein komail. Nai me makelekel san met, i pan kola ren men liki kan. I ari kotila san wasa o ap kotilan nan im en amen me ad a Sust me kin kaudok on Kot, me im a pat on sinakoke. A Krispus, saumas en sinakoke posonla Kaun o, ianaki karos toun im a; toun Korint me toto lao ronada, ap posonla o paptaisela. Kaun o ap kotin masani on Paulus ni a auramen ni pon: Der masak, padapadak ender nenenla! 10 Pwe Nai ian uk, o sota me pan sair uk, pwen kame uk, pwe nai aramas me toto nan kanim wet. 11 I ari kotikot wasa o par eu o saunipon wonu kaweweda masan en Kot nan pun arail. 12 Ni muein Kalion kakaundar Akaia, Sus akan ap wiaki eu, saikidi Paulus o wa don i mon mol en kadeik o, 13 Indada: Lap men et kin pitipiti aramas, ren kaudok on Kot ap palian kapun. 14 Paulus lao men masanda, Kalion ap masani on Sus oko: Komail Sus oko, ma sapun eu de me sued kot, i pan ron komail. 15 A ma akamai duen lamalam, o ad akan, o omail kapun, nan pein komail pan wia, pwe nai sota men saunkapun pan mepukat. 16 I ari siken ir wei san ni mol en kadeik o. 17 A karos ap saikidi Sostenes, saumas en sinakoke o woki i mon mol en kadeik o. A Kalion sota insenoki mepukat karos. 18 Paulus lao kotikot wasa o ran toto, ap kotin kamurimuri on saulan kan o ianala sop pot kotilan Sirien; Prisila i Akwila ian i. Mas a kotin kotedar tapwi nan Kenkraa, pwe a inau mia. 19 I ari supi on Episus, pwilikidi on ira wasa o, a pein i kotilon on nan sinakoke o kaparok on Sus oko. 20 Irail poeki i, en mimieta re ’rail ansau warai, a sota kotin duki on. 21 O a kotin kamurimuri on irail masani: I udan ian kamadip kokodo nan Ierusalem. A ma Kot pan kotin mueid on ia, i pan pure don komail. A ap kotin mas el san Episus. 22 A lao kotin keredi Sasarea, ap kotidala ranamau on momodisou ap kotilan Antiokien. 23 A kotikot wasa o ansau kis, ap kotila kakan sili nan wein Kalatia, o Prikien, kakelada tounpadak kan karos. 24 A men Sus amen, me ad a Apolus, me tikidar Aleksandrien, iei ol kadek lokaia, o me ereki kisin likau kan, a ko don Episus. 25 Men et aleer padak ni al en Kaun o, o a kelail ni nen e, a padapadak o kaweweda mau meakan duen Iesus; a paptais en Ioanes me a asa. 26 I ari tapiada aima padapadak nan sinakoke. A Akwila o Prisila lao ron i, ap uke don ira i, kawewe on i al en Kot. 27 A lao men kola Akaia, saulan kai ap intin won tounpadak kan, poeki re ’rail, ren kasamo i. I lao pwarado, ap sauasa irail, me poson kilar mak en Kot. 28 Pwe a manaman on Sus akan, kasale on irail san kisin likau kan me Iesus me Kristus.

Copyright information for `PONPDN