Acts 23

A PAULUS kotin aupwil sili nan kapun o ap masani: Ri ai ko, i dadaurata me mau on Kot lao lel ran wet. A samero lapalap Ananias masani on men impa, ren pikir au a. Paulus ap masani on i: Kot pan kotin pikir uk malaun men koe, pwe koe momod wasa en, en kadeik ia da duen kapun o, ap tiakedi kapun o ni om indada, ren pikir ia. A men impa indada: Koe pan lalaue sapwilim en Kot a samero lapalap? Paulus ap masanier: Ri ai ko, i sasa, me i samero lapalap o, pwe a intinidier: Koe der nan au sued duen omail kaun lapalap o! A Paulus lao diaradar, me akai irail Sadusar, a akai Parisar, ap kapitie laud nan kapun o masani: Ri ai ko, nai Parisar amen o nain Parisar amen, ai kaporopor en me melar akan ar pan maureda, i me i pan paka deikada. A lao masanier met, Parisar o Sadusar akan ap akamai pena; ari momod o muei pasan. Pwe Sadusar kin inda, me dene sota me pan maureda, o pil dene sota tounlan, pil so nen, a Parisar kin kamelele karos. A weriwer laud wiauier. A saunkawewe kan, me kisan Parisar kasinenda kaparok katitiki: Sota me sued kot en aramas men et, me se diar. A ma nen eu de tounlan amen masani on i, kitail der palian Kot! 10 A lao moromoron kaualap, kaun lapalap o ap masak, me Paulus pan dapenok pasan, ap masani, me saunpei kai en kodilan koledi i, wado san nan pun ar o wa don nan im en saunpei. 11 A pon pena san ran o kaun o kotikot re a masani: Kaporopor mau, pwe duen om kadede ia nan Ierusalem, iduen koe pil pan kadede ia nan Rom. 12 A lao ran pasan, Sus akai ap inauki pena o kaukila, me re pan solar kan o nim meakot, re lao kamelar Paulus. 13 A irail, me wiadar inau wet, me paek sama. 14 Irail kodo ren samero lapalap o saumas akan katitiki: Se inauki pena o kaukila, me se solar pan kan o nim meakot, se lao kamelar Paulus. 15 Komail o toun kapun ari poeki ren kaun lapalap o, a en kadara don komail i. Dene komail pan raparapaki melel re a, a kit pan masamasan kamela i, mon a pan pwara don komail. 16 A wawan Paulus seri amen lao roner ar ruki i, ap pedelon on im en saunpei kai kaireki Paulus. 17 Paulus ap ekeredo kaun amen, masani on i: Kare won manakap men et ren kaun lapalap o, pwe meakot mia, me a men kaireki i. 18 I ari ukada i kare won i ren kaun lapalap o indada: Paulus me salidi, eker ia don i o poeki re i, i en wa don komui manakap men et, pwe meakot mia, me a men kaire kin komui. 19 Kaun lapalap ap koledi pa a o koieila wasa rir kalelapok: Da me koe men kaire kin ia? 20 I ari katitiki: Sus akai inauki pena, en poeki re omui, en kadara don kapun Paulus lakap, dene komui men pur on raparapaki mau due. 21 A komui der duki on irail, pwe ol paek sama, me rukiruki i, me inauki pena o kaukilar, me re solar pan kan o nim re lao kamela i. A irail auiaui ansau wet, me komui en mueid on irail i. 22 Kaun lapalap o ap kadarala manakap o masani on i: Der indan meamen, me koe kaire kin ia met! 23 A lao ekeredor kaun riamen, ap masani: Kaonopada saunpei riepuki, pwen kola Sasarea, o pil me dake os isiakan, o me wa katieu riepuki san ni klok duau en ponpon wet. 24 O pil kaonopada man akai, me re en kida poa Paulus, o ren kanakanai on walan i ren kopina Peliki. 25 A pil intiniedier kis in likau duen met: 26 Nai Klaudius Lisias kadar won komui main kopina Peliks ai ranamau. 27 Ol men et, me Sus oko saikidier, o metar kis a pan kamela re ’rail. A nai ukada saunpei kei dorela i ni ai ronada, me i men Rom amen. 28 A ni ai men kalelapok, da me re weiweilokedi i, i ap wadila ren ar kapun o. 29 Nai ari diaradar, me a panapanla pweki peidok en ar kapun. A sota me i diar, me a pun kak kame kila de salikidi. 30 I lao asadar, me Sus oko rukiruki ol o, i ap madan kadar won komui i, o i kakaliki on me panala i kai, en kaireki won komui duen i. Ran kaselel! 31 Saunpei ko ap ukada Paulus kalua i Antipatris ni pon o duen a kawad kin irail. 32 Mandan ran o re ki on me dake os akan, ren wala i, ap purelan im en saunpei. 33 Mepukat lao lel on Sasarea, ap ki on kisin likau ren kopina, o pil kasale on i Paulus. 34 A lao wadoker o idok, menia i, o manier, me a kisan men Silisia, ap masani: 35 I pan ron uk, lao me pan uk ala pil pwarador. I ari masani, i en nekinek nan tanpas en Erodes.

Copyright information for `PONPDN