Ephesians 4

NAI en Kaun a salidi men, kin panaui komail, pwe komail en kekeid inenweita ni koa eu, me komail paeker on, Ni karakarak melel, o opampap, o kanonama, o limpok pena nan pun omail. Ankelail on wia minimin eu ni Nen saupena ki sal en popol. War ta ieu, o Nen ta ieu, duen me komail paeker on ni kaporopor ta ieu, en omail paeker on. Kaun ta men, poson ta ieu, paptais ta ieu, Kot o Sam en karos me ta men me kotin poedi meakaros o daudaulole, o me kotikot lol atail karos. A kitail karos aleer atail pai en mak duen son en kupur en Kristus. I me a kotin masani: Ni a kotidalan poa, a kotin saliedi me salidi kan, o a kotiki on aramas pai kan. A iaduen, ma a kotidalan poa, kaidin a pil so kotidilar pa sed, wasa lolia mas o? 10 Me kotidila, i ota, me kotida wei ileila san nanlan kan karos, pwen kadirela wasa karos. 11 O a kotin kasapwilada akai, en wanporon akan o akai en saukop akan, o akai en waronamau kan, o akai en silepa o saunpadak kan. 12 Pwen kapunala saraui kan on wiawia dodok eu, me pan kauada war en Kristus. 13 Kitail karos lao lel on poson ta ieu, o lolekon ki Sapwilim en Kot, o wiala ol melel, me paroki on Kristus ni a unsokela, 14 Pwe kitail en solar tau en seri pwelel, me mokimokideki sili padak likam, me kin pwai kida kotaue en aramas akan o ar likam, o widiwidin me re kin wiada, pwen kaweid sapun. 15 A kitail en melel ni limpok, ap kakairida ni son karos on Kristus, me tapwi o. 16 Me war pon kakauda san o kokon akan karos kateneten pena ia; a kokon pukat papa pena, duen dodok en kokon akan eu eu, duen ar itar on, iduen war o kin kakairida o maular ni limpok. 17 I me i indai on komail o kadede kila Kaun o, me komail ender weweid dueta men liki kan kin wia ni aklapalap en nen ir. 18 Me nen arail rotorotalar, o re san maur en Kot, pweki ar sololekon me mi lol arail o pweki monion arail kapitakailar. 19 Me solar pam wasa, ap mueid on pein irail, en dender o inon ion kapwaiada son en saut akan karos. 20 A kaidin iduen, me komail asadar ren Kristus. 21 Ma komail roner duen i o padakki i, me tiak melel mi ren Iesus. 22 Komail ari muei san tiak en mas o aramas marin, me kin kawe kila pein i inon sued. 23 A komail en kawilikapada nen omail! 24 O danwar anekila aramas kap, me wiauier duen kupur en Kot, ni melel o pun o saraui. 25 I me komail en kasela likam amen amen ap lokaia melel on men impa, pwe kitail sau ta ieu. 26 Ni makar komail der wia dip, o katipin der kirila mon omail insenemaula. 27 Ender duki on tewil o! 28 Me pirap, ender pur on pirap, a mak eta, en dodok, kadokeki pa kan dipisou mau, pwen kaonop da kisakis on me samama kan. 29 Kasoi saut ender ko wei san nan au omail, a men kamau, pwen papaki on me karon akan me mau. 30 Komail der kamauke Nen saraui en Kot, me komail kilelekier on ran en kasapaledo! 31 A limelimek sued, o linaranar, o makar, o men pei, o lalaue en doo wei san komail, o pil son en sued karos. 32 A komail en kadek pena, o poka pena, o mak pena amen amen, dueta Kot kotin maki on komail ren Kristus.

Copyright information for `PONPDN