James 2

Ri ko, komail poson atail Kaun Iesus Kriitus en linan er lipiliki aramas amen. Pwe ma ol amen pan ian omail saraui, me kapwateki rin kold likau linan, o pil samama amen, me a tuken likau o sakanekan pedelon, A ma komail pan kilekilan me mi nan likau linan, o komail pan indan i: Re kotido kaipokedi met, wasa mau, ap indan me samama: Koe en uda mo, de met impan utipa! Iaduen komail lipilipil nan pun omail, o komail wiala saunkapun kan ni omail lamalam sued? Ri ai kompok kan, komail ron! Kot sota kotin pilada me samama nan sappa et, me kapwapwaki poson, o me pan sosoki wei, me a kotin inauki on irail, me pok on i? A komail mamaleki me samama o. Kaidin me kapwapwa kan kin wia sued on komail o panalan komail mol en kadeik kan? Irail sota kin lalaue mar isou, me komail maranekier? Ma komail kapwaiada kapun isou duen masan o: Koe en pok on men imp om dueta pein uk, nan komail wia me mau. A ma komail pan lipilipiliki aramas, komail kin wia dip, o kapun pan kadiarok on komail, me komail me dipan. 10 Pwe meamen kapwaiada kapun pon, ap kawela kusoned eu, nan i me tiakedi karos. 11 Pwe me kotin masanier: Koe der kamal, i me pil masanier: Koe der kamela aramas! Ari, ma koe sota kamal, a ma koe kamela aramas, nan koe me tiakedier kapun o. 12 Komail ari lokaia o wiawia duen irail, me pan pakadeikada ren kapun en kamaio. 13 A me sota kin kadek, pan lodi on kadeik apwal, a me kadek, kin suaiki kadeik o. 14 Ri ai ko, da katepan aramas amen, me pan inda, me a poson mia, ap sota a wiawia mau kan? Iaduen poson pan kak dorela i? 15 Ma ri atail ol de li amen mia, me solar a likau, o solar kan ar kisin mana kaukaule, 16 A ma amen komail pan indan i: Kola popol raneran o manamana! Ap sota, me komail pan ki on i, me mau on pali war a, da katepa? 17 Iduen poson, ma a kelep o sota wiawia ian, nan a melar. 18 A ele amen pan inda: Om poson mia, a ai wiawia kan mia; kasale on ia om poson, me sota wiawia kan mia, a nai pan kasale on uk ai poson ni ai wiawia kan. 19 Koe kamelele me Kot me ta men mia, me mau, nan tewil akan pil kin kamelele ap masakada. 20 A koe aramas aklapalap, ma koe men dedeki, me poson me mal kot, ma sota wiawia kan ian? 21 Iaduen sam atail Apraam? A sota pun kila a wiawia kan, ni a pan maironki sapwilim a kisin putak Isaak pon pei saraui? 22 I me koe kilan, me poson sauasa a wiawia kan, o poson unsok kilar a wiawia kan. 23 Ari masan o pwaidar: Apraam poson Kot, o i me a pun kilar o a maraneki: Kompoke pan Kot. 24 Komail ari kilaner, me aramas amen pan pun kila a wiawia kan a kaidin poson ta. 25 Pil dueta Raap, li sued amen, kaidin a wiawia kan, me a pun kilar, ni a kasamo men en kadar, o kadar ir ala ni apot al toror? 26 Pwe duen pali war mela, ma sota nen, iduen poson a mela, ma sota wiawia kan ian.

Copyright information for `PONPDN