Revelation of John 15

O I kilaner pil kilel eu nanlan, me lap o kalom: Tounlan isimen, a kalokolok isu mi re ’rail, pwe onion en Kot kaimwisokki ir la. O i kilaner sed klas eu, me doleki kisiniai o irail me kaloedi man o dikedik en man, o wadawad eh mar a, uda ni kailan sed o, o arp en Kot mi re arail, O irail kauleki kaul en Moses ladu en Kot amen, o kaul en Sippul indinda: Omui wiawia kan me lapalap o kalom. Main Kot, me pun o melel omui wiawia kan, komui Nanmarki en wei kan, Kaun en meakaros. Is me so pan landa komui, Main, o wauneki mar omui? Pwe komui ta me saraui, pwe wei karos pan pwrarado poni komui, pwe omui wiawia pun me sansaleda. Murin mepukat i kilaner nan im en kaudok kadedepa mi nanlan me ritida. O tounlan isimen pedoi wei san nan im en kaudok kalokolok isu re ’rail, kapwateki likau min o puetepuet, o ir piraki ni pan ati waiwai kold. O amen ren man pamen panalan tounlan isimen dal kold isu, direki onion en Kot, me ieiasata soutuk. O im en kaudok me topkila adiniai tapida san linan en Kot o a manaman; o sota amen me kak pedelon on nan im en kaudok o lao kalokolok isu en tounlan isimen wiuuier.

Copyright information for `PONPDN