1 Thessalonians 2

Pol vông yuac gê Tesalonaika

Xam lige, xacxam va xovô ên xam nêbê ilage wê xe loc dô hɨxôn xam ge od yuac wê xe vông vac xam mahɨgun ge o tô vac lêm, ên xam ngô xe kɨyang dɨ vông i vin. Dɨ xam xovô pyap ên xam nêbê buc taxlee ge xe mɨla dô vɨgwe Pilipai, lêc he ya vông vɨyin levac vô xe dɨ nêl kɨyang nipaên lec xe hɨxôn. Mêgem xe sea he dɨ pec mɨ loc vô xam Tesalonaika, mêdec xomxo mangwe vac xam bom vông vɨyin vô xe ên wê xe nêl xolac vô xam ge. Mêlêc il nêd Anutu ngɨdu xe xôn om xe nêl Anutu xolac vô xam dɨ xonaên ma. Kɨyang wê xe nêl vô xam ge, xe o nêl kɨyang soên ti lêm, dɨ xe o xo kɨyang tɨbeac nêb xam ngɨdu xe xôn lêm, dɨ xe o nêb xe ob kɨtyoo xam lêm. Ge o kɨyang wê xe nêl ge kehe lêm, dom kehe mô bêga nêbê Anutu yê dɨ xovô pyap ên nêb nipaên ti o yêp vac xe nɨlôm lêm, om nêbê xe tɨyi wê xe ob vông yuac xolac nêlên ge. Mêgem xe mi nêl xolac vô xomxo, lêc xe o nêl xolac ên xe nêb xomxo i yê xe nivɨha lêm. Nge, xe nêl xolac dɨ vông yuac ên xe nêbê Anutu vaci wê dɨyê dɨ xovô xe nɨlôm ge i yê xe nivɨha. Xam xovô pyap ên xam nêbê xe o nêl kɨyang hɨzi vô xam lêm, dɨ Anutu vaci yê pyap dɨ xovô bêga ên nêbê xe o vɨyum kɨyang madoên vac kɨyang nivɨha lêm. Dɨ xe o vông yuac ên xe nêb xam pɨmil xe lêm, me xomxo ba he i pɨmil xe lêm. Lêc xe ga Kɨlisi nue sinale xe, om xe tɨyi wê xe ob nêl dɨ xam vông xe lêm vô levac. Lêcom xe o nêl bêge vô xam lêm. Nge, xe dô mamlehe vac xam mahɨgun dɨ viac xam tɨyi xocbê nipwo ti ta viac i ge. Xe xêmyaa vin lec xam om xe nêb xe ob nêl Anutu xolac nivɨha vô xam, dɨ xe nêb xe ob ngɨdu xam xôn lê, lêc xe obêc xib lec yuac wê xe vông ge od pyap, ên xe xêmyaa vin lec xam. Xam lige, xam xovô pyap ên yuac levac wê xe mi vông vac xam mahɨgun vô vɨdiiên yuu bucên vɨhati ge. Xe vông yuac xêkɨzêc lec xolac nêlên dɨ vông nêm yuac bisnis hɨxôn ên xe nêb xe ob kô mone ên kɨsuu xom yaên lec dɨ xe ob vông vɨyin vô xam ên xe xom yaên lêm.

10 Xam xovô pyap dɨ Anutu êno yê dɨ xovô môp wê xe mi vông tɨyi buc vɨhati wê xe mɨloc dô hɨxôn xam wê xam vông i vin ge. Môp vɨhati wê xe mi vông ge môp ngɨbua dɨ môp bôbac, dɨ ti o so lêm. 11 Dɨ xam xovô ên xam nêbê xe viac xam toto tɨyi xocbê nipwo wê ma viac i ge. Mêgem xe dɨdii xam vac môp nivɨha, dɨ nêl kɨyang wê ob ngɨdu xam xôn ge vô xam, dɨ xe viac kɨyang nivɨha vô xam, 12 ên xe nêb xam tɨmu vô môp nivɨha vɨhati wê Anutu vông ge. Anutu ge wê tyuc xam ên nêb xam lam vac i ben dɨ lam dô vac xêseac wê i vông ge hɨxôn i nue vông vinên vɨhati.

Tɨbii Tesalonaika le xêkɨzêc vac vɨyin

13 Tɨyi buc vɨhati xe pɨmil Anutu lec môp ngwe wê xam vông ilage bêga nêbê ilage xam ngô Anutu xolac wê xe nêl ge dɨ kô pɨlihi ên xam nêbê kɨyang ge o xomxo pɨvulac pɨleva ti lêm. Nge, xam nêbê ge Anutu kɨyang nôn vɨxôhɨlôg. Om xam nêl vɨxôhɨlôg, ên ge Anutu kɨyang nôn mê. Kɨyang tige dɨvông yuac xêkɨzêc vac xam wê xam vông i vin ge nɨlôm. 14 Xam lige, xam tɨyi xocbê konglegesen vɨyang vɨyang wê he Yuda** vông, wê dô vac vɨgwe levac Judia ge. Ên he vông i vin Yesu Kɨlisi dɨ tu Anutu nue, lêc he lie ya vông vɨyin vô he. Om xam tɨyi xocbê he, ên xam lime ya vông vɨyin vô xam lec vông vinên wê xam vông ge. 15 Xomxo Yuda gee wê mae bue ilage hi plopete yib. Nang dêc he hi Apumtau Yesu yib, dɨ gwêbaga he vông vɨyin vô xe lec xolac dɨ tii xe la, dɨ he vông Anutu yê he nipaên, dɨ he vông vevac vô xomxo vɨhati, 16 ên he le vac xe môp xôn ên nêb xe o la nêl Anutu kɨyang vô tɨbii vɨyang ba lêm. Anutu kɨyang tige tɨyi wê ob vô xomxo vêl ên he nên nipaên. Lêc he Yuda le vac xe xôn. Om he nên nipaên vô levac vô he ên môp nipaên wê he vông ilage dɨ vông gwêbaga hɨxôn. Mêgem Anutu xêyaa myavɨnê lam yêp vô he gwêbaga.

Pol nêb ob yê he i tii vac nang

17 Xam lige, xomxo Yuda** tii xe vêl ên xam, om xe lam dô teva ên xam buc myabo dɨ xe o xê xam mamnôn lêm. Lêc xe xo xam tɨyi buc vɨhati dɨ xe myag môp wê xe ob lôc mɨ loc xê xam i tii vac nang ge, dɨ xe nɨlôm vô vɨyin ên wê xe o loc xê xam lêm ge. 18 Ên xe nêb xe ob lôc vô xam, lêc xe o tɨyi lêm. A Pol, a myag môp lu tɨbeac ên a nêb a ob lôc vô xam, lêc Seten** le vac môp xôn ên a. 19 Lêc xe nêb xe ob xê xam mamnôn, ên buc tɨmuên wê Yesu obêc lop mɨ lôm dɨ il le vô i manôn ge od Yesu obêc yê letyae dɨ vông vɨzid nivɨha vô xe lec wê xe nêl xolac vô he ge, dɨ letyae obêc vông xe xêmyaa vô nivɨha, dɨ xe obêc nêl kɨyang vô Yesu lec letyae ên nêbê he vông xe yuac vô nôn lec? Xacxam va mê. 20 Ên xam ge wê xam vông xe lêm vô levac dɨ vông xe xêmyaa vô nivɨha.

Copyright information for `PTP