Acts 24

He Yuda vông kɨyang vô Pol

Buc vɨgê vɨlu lam la vêl dêc Ananaias wê xomxo daa siên nên levac ge hɨxôn Yuda levac ya dɨ xomxo ti wê ob nêl xomxo nên kɨyang vô gavman ge lê nêbê Tetalas, he la vô gavman levac Piliks ên he nêb he ob vông kɨyang vô Pol. Om Piliks keac Pol lam dɨ Tetalas nêl kɨyang kɨtyooên ya lec Pol bêga nêbê, “Xomxo levac Piliks, ông viac xe nivɨha om xe dô nimvɨha dɨ vevac ti o tyip vac xe bom lêm, dɨ ông kɨtya môp nipaên vêl dɨ vông xe dô vac môp nivɨha wê ob vô nivɨha vô xe ge. Om môp tige vông xe xêmyaa vô nivɨha dɨ xe hi vɨxam ên ông tɨyi buc vɨhati.

“A ob nêl kɨyang dia vô ông lêm, lêc a kɨtaa ông bê ông xêmyaa i vô nivɨha dɨ ông ngô kɨyang bo ti wê a ob nêl vô ông ga. Xomxo tige, xe xê ên xe nêb i xomxo judaên, ên la vông Yuda vac vɨgwe vɨhati he nɨlô juda dɨ he o dô nivɨha lêm, dɨ xomxo kɨdu ti wê nêbê Nasalet ge ici va tu he nên xomxo levac. Dêc nêb ob vông Anutu xumac ngɨbua i vô nipaên om xe la hôm i xôn. [Ên xe nêb xe ob vông kɨyang vô i lec kɨyang wê yêp vac Moses xolac ge, lêc tɨbii vevac levac Lisias val tii xe sea dɨ kô Pol mɨ la, dɨ nêl ên nêbê xomxo wê nêb ob vông kɨyang vô Pol ge, he i lam nêl kɨyang vô ông.] Om ông obêc kɨnêg xomxo tyo ge od ông obêc ngô kɨyang wê xe nêl lec i ge vɨhati vac i mya.”

Tetalas nêl bêge dɨ Yuda vɨhati ngɨdu i kɨyang xôn dɨ nêl ên nêbê kɨyang vɨhati ge vɨxôhɨlôg nôn.

Pol nêl kɨyang vô Piliks

10 Mêd Piliks too kwa vô Pol ên nêb i nêl i kɨyang, om Pol nêl ên nêbê, “A xovô wê ông viac kɨyang wê xe Yuda vông ge vac ilage dɨ i val tyip gwêbaga hɨxôn, om a xêgyaa nivɨha ên wê a ob nêl kɨyang wê a vông ge vô ông. 11 Ông obêc kɨnêg vô xomxo ya ge od he ob nêl vô ông bê a la Jelusalem dɨ la kɨtaa vô Anutu dɨ buc vɨgê yuu dɨ tô mɨ la yuu lam la vêl dɨ i val gwêbaga. 12 Dɨ he Yuda o yê wê xe ngaênma lec kɨyang ya vac xumac ngɨbua ge lêm, dɨ a o kɨtuc xomxo tɨbeac vac xumac lɨlo me lec wetôv dɨ vông he xêyaa vô myavɨnê lêm. 13 Kɨyang kɨtyooên wê he nêl lec a ge, he o tɨyi wê he ob nêl kɨyang kehe kɨtong mɨ ông xovô bê kɨyang nôn lêm.

14 “Lêc a ob nêl a kɨtong seac bêga bê kɨyang wê he Yuda yê tɨyiên ma ge, vɨxôhɨlôg, a mi tɨmu vô. Lêc a tɨmu vô môp tige dɨ a kɨtaa vô Anutu wê buge mi kɨtaa vô ilage, dɨ a vông i vin Moses xolac hɨxôn plopete kɨyang wê yêp vac kɨpihac ge vɨhati. 15 Dɨ a vông i vin dɨ dô bin kɨyang wê nêl ên nêbê xomxo vɨhati, nipaên yuu xôn nivɨha, obêc kɨdi lec mavɨha tii vac. Dɨ he Yuda êno vông i vin kɨyang tige mɨ dô bin. 16 Om a vông môp nivɨha tɨyi buc vɨhati ên a nêb a nɨlôg i yêp nivɨha, dɨ Anutu hɨxôn xomxo he i yê a nivɨha.

17 “A la dô klismas ya la vêl vac vɨgwe ya, nang dɨ a la Jelusalem ên a nêb a ob vông mone vô lige Yuda wê nên susu maên gee dɨ a nêb a ob tung daa vô Anutu. 18 A viac môp tige om a tɨmu vô môp wê ob vông a vô paha lec ge, pyap dɨ he Yuda yê wê a la vac Anutu xumac ngɨbua ge. Xomxo tɨbeac o dô hɨxôn a dɨ vô nidɨdun levac lêm, 19 lêc he Yuda wê lam gê Esia ge he val hôm a xôn. Xomxo tigee, a nêg kɨyang ti obêc yêp vô he ge od he i lam nêl vô ông dɨ obêc nivɨha. 20 Lêc obêc ma ge od xomxo wê dô gae he i nêl a nêg soên wê he tulec vô buc wê a la le vô he kaunsil manôn ge. 21 Kɨyang tibed wê a le vô kaunsil manôn dɨ a nêl bêga ên a nêbê, ‘A vông i vin ên a nêbê Anutu obêc tɨpi vô xomxo yibên kɨdi lec i tii vac om gwêbaga xam vông kot vô a lec kɨyang tige tibed.’”

22 Pol nêl bêge, lêc Piliks xovô kɨyang yuu môp wê xomxo vông vinên vông ge om nêl vô he Yuda ên nêbê, “Xam dô dɨ xomxo levac Lisias obêc val ge od a obêc tɨtô kɨyang wê xam vông ge.” 23 Mêd Piliks nêl vô tɨbii vevac tige ên nêbê, “Viac Pol nivɨha dɨ ông wê i xôn dɨ i o lêc dô kɨzêc lêm, dɨ ông o lêc vɨbu lie wê nêb ob lam vông susu ya vô i ge lêm.”

Pol dô vac xumac kalabuhu tɨyi klismas yuu

24 Buc ya la vêl dêc Piliks yuu vɨnê Dlusila keac Pol lam vô yuu. Dlusila ge Yuda vêx ti. Om yuu ngô kɨyang wê Pol nêl lec môp wê xomxo ob vông i vin Yesu Kɨlisi ge kehe kɨtong. 25 Dêc Pol nêl kɨyang lec môp nivɨha hɨxôn môp wê xomxo ob kol he ên nipaên ge dɨ nêl lec wê Anutu obêc tɨtô xomxo nên kɨyang vô buc tɨmuên ge. Piliks ngô kɨyang tige dɨ xona om nêl vô Pol ên nêbê, “Kɨyang pyap om ông loc, dɨ obêc buc ngwe nang dɨ a obêc keac ông lôm i tii vac.” 26 Dêc Piliks xo vac nɨlô ên nêbê mêd Pol obêc vông mone ya vô i om keac Pol la vô i tɨyi buc tɨbeac dɨ yuu keac mɨ dô.

27 Klismas yuu lam la vêl dêc Posias Pestas la kô vɨgwe wê Piliks vông ge. Dɨ Piliks xo nêbê he Yuda i yê i nivɨha, om sea Pol dô vac kalabuhu dɨ i loc mɨ la.

Copyright information for `PTP