Hebrews 5

Yesu ge Hetplis wê kɨtya il nêd nipaên vêl ge

Hetplis ge xomxo Islel ti wê Anutu vɨnoo i ên nêb i tu Hetplis, om yuac wê i vông ge bêga nêbê tu Islel vɨhati manôn dɨ la le vô Anutu manôn. Om mi tung daa dɨ si daa vô Anutu ên nipaên wê he Islel vông ge. Lêc xomxo tige, xomxo xêlehelehe wê môp nipaên tɨxuu i tɨyi xocbê tɨxuu il ge. Om ob lum nêl kɨyang vô xomxo wê lungên môp nivɨha dɨ sea Anutu vông môp mɨ la vac nipaên ge. Om buc wê obêc tung daa vô Anutu ên nipaên wê lie Islel vông ge, od ob tung daa ên nipaên wê ici vông ge hɨxôn.

Lê levac wê nêbê Hetplis ge, xomxo ti o tɨyi wê ici va ob kô lê tige lêm. Nge, Anutu vaci wê ob vɨnoo xomxo Hetplis tige, tɨyi xocbê Anutu vɨnoo Elon ilage ên nêb i tu Hetplis wê mugên taxlee ge.

Kɨlisi êno o yong ici va ên nêb ob tu Hetplis lêm. Nge, Anutu vaci vɨnoo i ên nêb i kô yuac Hetplis, dɨ nêl vô i ên nêbê,

  • “Ông ge a nug ông, om gwêbaga a ob vông ông lêm i vô levac.”
Nang dêc Anutu nêl vô Yesu tii vac nang ên nêbê,

  • “Ông kô yuac Hetplis wê ob yêp luta tɨyi xocbê Melkisedek ge.”
Vô buc wê Yesu lam dô kɨbun ga ge, od kɨtaa vô Anutu ên nêb i vô i vêl ên môp wê ob yib ge, dɨ tyuc la kɨsii dɨ byag hɨxôn. Yesu ngô ma Anutu kɨyang dɨ dô vac i kwa ngɨbi, om Anutu ngô kɨtaaên wê i vông ge. Yesu ge Anutu nu, lêc kɨlê myavɨnê levac, dɨ myavɨnê tige vông i vô nɨnya lehe vô Anutu kɨyang, dɨ vông i tu xomxo wê nipaên ti o yêp vô i lêm ge. Mêgem xomxo wê ngô Yesu kɨyang mɨ tɨmu vô ge, Yesu ob tu he nên levac wê ob kɨtya he nên nipaên vêl dɨ vông he la dô vac nivɨha wê luta lêc luta ge. 10 Anutu vɨnoo Yesu ên nêb i tu Hetplis tɨyi xocbê Melkisedek ge.

Il ob dô tɨyi xocbê nipɨpwo lêm

11 Xe nêb xe ob nêl kɨyang tɨbeac vô xam lec Melkisedek, lêc xam ob xovô kɨyang paha decdec lêm. Om xam vông yuac levac vô xe wê xe ob nêl kɨyang tige kehe kɨtong vô xam ge. 12 Xam ngô xolac mɨ xovô ilatɨkwê tɨyi wê xam ob nêl xolac vô xomxo gwêbaga. Lêc xam o tɨyi lêm. Om xomxo ob nêl xolac wê o vɨyin lêm wê xam ngô ilage i tii vac vô xam. Xam o tɨyi xocbê xomxo levac wê ob ya yaên xêkɨzêc ge lêm. Nge, xam tɨyi xocbê nume nipɨpwo wê gên lul ge. 13 Ên Anutu kɨyang wê vɨyin ge, xomxo vông vinên wê o vyac xovô kɨyang tige lêm ge, he tɨyi xocbê nipɨpwo wê gên lul ge, om he tɨyiên ma wê ob yaxên môp nivɨha dɨ nipaên ge. 14 Dom xomxo wê xovô Anutu kɨyang wê vɨyin ge, he tɨyi xocbê xomxo levac wê ya yaên xêkɨzêc ge. Ên he mi yaxên môp wê he vông ge tɨyi buc vɨhati, om he tɨyi wê he ob yaxên môp vɨhati mɨ xovô bê nivɨha me nipaên.

Copyright information for `PTP