James 4

Xomxo wê xêyaa vin lec susu kɨbun ga ge vông vevac vô Anutu

Xame, xam kunacma dɨ nêl kɨyang vevac vôma ên va? Kehe bêga bê xam nêm nɨlôm ngaên vông xam nim nyag vôma dɨ xam kunacma dɨ hima lec. Ên xam xêmyaa vin lec susu vɨyang vɨyang gee ên xam nêb xam ob kô lê, lêc xam kôên ma, om xam nêbê xam ob hi xomxo i yib lec. Dɨ xam do mam vô susu vɨyang vɨyang gee, lêc tɨyiên ma wê xam ob kô ge, om xam kunacma dɨ hima lec. Xam o kô susu wê xam nêb xam ob kô ge lêm, dɨ kehe bêga bê xam o mi kɨtaa vô Anutu lec susu tigee lêm. Lêc buc ya xam kɨtaa vô Anutu ên xam nêb i vông susu vô xam lê, lêc Anutu vôngên ma, ên xam o kɨtaa i la nivɨha lêm. Nge, xam kɨtaa ên xam nêb Anutu i vông susu wê ob vô nivɨha vô xacxam va ge. Xam ge wê xam sea Anutu xolac ge mêge. Ên xomxo xêyaa obêc vin lec susu yuu môp kɨbun ga ge, od ge tɨyi xocbê he vông vevac vô Anutu ge, lêc mêd xam lungên tige, me? Ga a nêl vô xam ên a nêbê xomxo ti obêc vông nɨlô la vô susu kɨbun ga ge od tɨyi xocbê vông vevac vô Anutu. Ên kɨyang yêp vac xolac bêga nêbê, “Il kɨnud wê Anutu tung vac il nɨlôd ge, Anutu yê xôn nêb il vông i loc dɨluhu vô ici va.” Kɨyang nêl bêge, lêc xam mêd xo ên xam nêb Anutu nêl kɨyang ga kɨtyooên vô xam, me?

Lêc Anutu xêyaa vin lec il luu vêl om nêb ob ngɨdu il xôn, tɨyi xocbê kɨyang wê yêp vac xolac bêga ên nêbê, “Xomxo wê yong he vô Anutu ge, od Anutu obêc ngɨloo he vêl. Lêc xomxo wê vông he vô nipwo lec dɨ la vac Anutu kwa ngɨbi ge, od Anutu obêc xo vɨgwe pɨsiv ên he dɨ ngɨdu he xôn.” Om xam pɨlepac xam dɨ loc vac Anutu kwa ngɨbi. Dɨ xam le pɨlihi dɨ tii Seten** ên i pec vêl ên xam. Xam loc kwabo vô Anutu, ên xam obêc la kwabo vô Anutu ge od Anutu êno ob lam kwabo vô xam. Lêc xam ge tɨbii nipaên, om xam pɨlepac nɨlôm i vô paha lec i tɨyi xocbê xomxo lipac vɨgê vô paha lec ge. Xam nɨlôm ge vông yuu, om xam sea vɨlu wê nipaên ge dɨ vông nɨlôm yuu pɨyôp i loc dɨluhu vô Anutu. Dɨ xam nɨlôm i vô vɨyin dɨ xam byag ên nêm nipaên lê. Gwêbaga xam nap hɨxôn xêmyaa nivɨha, lêcom xam pɨlepac nɨlôm napên dɨ byag hɨxôn nɨlôm vɨyin ên nêm nipaên wê xam vông ge lê. 10 Xam pɨlepac xam vô Apumtau manôn, ên xam obêc vông bêge ge od Apumtau obêc hôm xam lec dɨ vông lê levac vô xam.

Il ob so vyad vô lige ngwe lêm

11 Xam lige, xam o lêc so vyam vô lime vông vinên lêm. Ên xomxo ti obêc so vya vô li ngwe, me yaxên i nêb i xomxo nipaên ti ge od ge tɨyi xocbê so vya vô xolac dɨ yaxên nêbê xolac ge nipaên. Dɨ xam obêc yaxên xolac bêge ge od xam o tɨmu vô xolac lêm. Nge, xam dô tɨyi xocbê xomxo wê nêb ob yaxên xolac mɨ yê bêc nivɨha me nipaên ge. 12 Lêc Anutu tibed wê tu xolac kehe ge dɨ i tibed wê ob yaxên xomxo ge. Om Anutu tɨyi wê ob hôm xomxo lec, dɨ i tɨyi wê ob kɨtya xomxo vêl ge. Lêc xam letya wê xam nêb xam ob yaxên lime ge?

13 Xam ngô lê. Xam ya yong xam dɨ nêl ên xam nêbê, “Gwêba me tɨtige od xe ob la vac vɨgwe levac tiganê, ên la dô klismas ti dɨ vông yuac bisnis ên kô mone levac lec.” Lêc a ob nêl vô xam bê 14 xam o xovô susu wê ob val vô xam tɨtige lêm. Dɨ buc wê xam ob dô mamvɨha ge, od xam ob dô bêna? Ge xam lungên, ên xam dô ge tɨyi xocbê ngwaxlu wê ob dɨdii loc myabo tya dɨ xôa ma lutibed ge. 15 Om xam lêc nêl kɨyang ngwe bêga bê, “Apumtau obêc tyuc lec nêb il dô madvɨha dɨ vông yuac ngwe ga me ngwe ganê ge, od il ob vông.” Xam obêc nêl ngwe bêge od obêc nivɨha. 16 Lêcom xam yong xam dɨ pɨmil xam, lêc kɨyang tibêge nipaên. 17 Om xam xovô lê. Xomxo ti obêc xovô môp nivɨha wê Anutu nêb il vông ge lê, lêc vôngên ma ge od i nên so.

Copyright information for `PTP