Mark 14

Xomxo levac wê Yuda gee nêb ob hi Yesu i yib

(Matyu 26:1-5 Luk 22:1-2 Jon 11:45-53)

Buc yuu obêc lam la vêl ge od xomxo Yuda ob myêl levac dɨ ya blet xêkɨzêc wê yis maên ge ên nêb ob xovô buc Pasova**. Mêd xomxo levac wê mi si daa gee hɨxôn xomxo wê xovô Moses xolac gee, he myag môp wê nêb ob hôm Yesu xôn xôpacên dɨ hi i yib ge. Lêc he nêl ên he nêbê, “Il ob hôm i xôn lec buc levac Pasova lêm, ên xomxo obêc yê il nipaên dɨ vông vevac vô il.”

Vêx ti too mia nivɨvea lec Yesu bazub

(Matyu 26:6-13 Jon 12:1-8)

Yesu la vɨgwe Betani dɨ la dô vac Saimon ben. Saimon ge wê kɨtyax mahɨzihɨzi ya ninɨvi ilage, lêc gwêbaga vô nivɨha lec. Mêd Yesu dô mɨ ya hɨxôn i, dɨ vêx ti kô butol nivɨha wê mia nivɨvea nivɨha le vac ge ti mɨ lam vô i. Mia tige mone levac. Mêd vêx tige tax butol mya dɨ too mia nivɨvea tige lec Yesu bazub. Lêc xomxo wê dô ge, he ya yê môp tige tɨyiên ma dɨ nêl vôma ên nêbê, “Bêna lêc vêx tige too mia tige sea? Mia tige tɨyi wê il ob vông mɨ tɨbii i kɨsuu lec mone yul yon dɨ il ob vông mone vô tɨbii wê nên susu maên gee lê, lêc vêx tige too sea.” Om he

xêyaa vô nipaên dɨ he kunac vêx tige.
Lêc Yesu nêl ên nêbê, “Bêna lêc xam vông vɨyin vô vêx tige? Xam vông i dô. Ên môp wê i vông vô a ge, nivɨha. Ên xomxo wê nên susu maên gee ob dô hɨxôn xam luta, om xam obêc nêb vông môp nivɨha vô he ge, od buc tɨbeac yêp tɨyi wê xam ob vông ge. Lêc a ga, a ob dô hɨxôn xam buc dia lêm. Vêx tige vông môp tɨyi xocbê yêp vô i ge, ên a gên o xib lêm, lêc i lam lipac mia nivɨvea lec a, om tɨyi xocbê viac a nignɨvi wê xomxo ob yev a vac lôva ge. A nêl hɨxôn nôn vô xam bêga bê vac vɨgwe vɨhati wê xomxo ob la nêl xolac vac ge, xomxo ob nêl vêx tiga kɨtong hɨxôn, om xomxo vɨhati ob xovô môp nivɨha wê i vông ge.”

Judas nêb ob vông Yesu vac xomxo levac vɨgê

(Matyu 26:14-16 Luk 22:3-6)

10 Judas Iskaliot ge Yesu nu ngɨvihi ti, lêc la vô xomxo levac wê mi si daa gee, ên nêb ob vông Yesu i loc vac he vɨgê. 11 Mêd he ngô kɨyang wê Judas nêl ge dɨ nɨlô vô nivɨha, om he hɨlu kɨyang xôn nêb ob vông mone ya vô Judas. Mêd Judas myag môp wê ob vông Yesu vac he vɨgê ge.

Yesu ya bwoc sipsip hɨxôn nue ngɨvihi

(Matyu 26:17-25 Luk 22:7-14,21-23 Jon 13:21-30)

12 Buc wê xomxo Yuda ob ya blet wê yis** maên ge val, om buc taxlee ge wê he ob hi bwoc sipsip mɨ ya ên xovô buc Pasova** ge, om Yesu nue ngɨvihi kɨnêg vô i ên nêbê, “Xe ob la viac xumac nɨlô tina wê il ob xa yaên vac lec buc Pasova ge?” 13 Om Yesu vông nue ngɨvihi yuu la dɨ nêl vô yuu ên nêbê, “Muu loc vac vɨgwe Jelusalem, dɨ muu obêc mɨla vô xomxo vux ti wê kɨlê mia vac dêg ge, od muu loc vô i vɨxa, 14 dɨ obêc la vac xumac lôma ge od muu nêl vô xomxo ti wê i xumac ge bêga bê, ‘Xolac kehe nêb xii lam kɨnêg vô ông bê xumac nɨlô tina wê i hɨxôn nue ngɨvihi ob ya yaên vac lec buc Pasova ge?’ 15 Muu obêc kɨnêg bêge vô i ge od obêc hɨlung xumac nɨlô levac ti wê yêp kɨsii ge vô muu, dɨ susu wê il ob xa lec dɨ dô lec ge le vac xumac tige pyap, om muu viac yaên wê il ob xa ge vac xumac nɨlô tige.” 16 Yesu nêl bêge vô yuu om yuu loc mɨ la Jelusalem, dɨ mɨla yê tɨyi xocbê Yesu nêl ge, mêgem yuu la viac yaên wê he ob ya ge.

17 Hɨyôv hoo la dɨ vɨgwe ob buc, om Yesu hɨxôn nue ngɨvihi vɨgê yuu dɨ tô mɨ la yuu mɨla, 18 mêd he la dô mɨ ya, lêc Yesu nêl ên nêbê, “A nêl hɨxôn nôn vô xam bêga bê xam wê il xa yaên hɨxônma ge ti obêc nêl a kɨtong vô xomxo levac levac.” 19 Kɨyang tige vông he nɨlô vô vɨyin om he toto kɨnêg lax vô Yesu ên nêbê, “Mêd a yuubê, me?” 20 Mêd Yesu nêl vô he ên nêbê, “Xam vɨgê yuu dɨ tô mɨ la yuu ge, ti obêc nêl a kɨtong. Ge xomxo ti wê xii xôn vɨgêm ob la vac dipac nɨlô ge. 21 Vɨxôhɨlôg, Xomxo Nu** ob yib tɨyi xocbê xolac nêl ilage, lêc xomxo ti wê ob vông Xomxo Nu la vac tɨbii vɨgê ge, obêc kô myavɨwen nipaên lec tɨmuên. Om xomxo tige yubacên obêc ma ilage ge od obêc nivɨha.”

Yesu vông pasa** vô nue ngɨvihi

(Matyu 26:26-30 Luk 22:15-20 1 Kolin 11:23-25)

22 He dɨya, dêc Yesu hôm blet ti dɨ kɨtaa lec mêd hɨbu dɨ vông vô he dɨ nêl ên nêbê, “Hôm mɨ wa. Ga a nignɨvi.” 23 Nang dêc hôm kap wê wain le vac ge dɨ kɨtaa lec mêd vông vô he dɨ he toto num vac. 24 Mêd Yesu nêl vô he ên nêbê, “Ga a hi wê a ob kɨpyax sea ên a nêb i ngɨdu xomxo tɨbeac xôn, om ob vông kɨyang wê Anutu hɨlu pyap ge i vô nôn lec. 25 A nêl hɨxôn nôn vô xam bê a obêc num mia wain i tii vac nang lêm dɨ i loc tyip vô buc wê a ob num wain paha vac Anutu ben** ge.”

26 He vông lɨlo ti pyap dɨ loc mɨ la lec kɨtôn Oliv**.

Yesu nêl ên nêb Pita obêc yax i vun

(Matyu 26:31-35 Luk 22:31-34 Jon 13:36-38)

27 Yesu nêl vô he ên nêbê, “Xam vɨhati nɨlôm obêc vô vɨyin dɨ xam ob sea a, i tɨyi xocbê kɨyang wê yêp vac xolac bêga nêbê, ‘A ob hi xomxo ti wê viac bwoc sipsip ge, om sipsip vɨhati obêc pec dɨ moo sea.’ 28 Xolac nêl bêge, dɨ a nêl vô xam bêga bê a obêc kɨdi lec magvɨha dɨ mug la Galili dɨ xam obêc tɨmu.” 29 Mêd Pita nêl vô Yesu ên nêbê, “Xomxo vɨhati obêc nêb sea ông ge od he ob sea, dɨ a mô ge, a ob sea ông lêm.” 30 Lêc Yesu nêl vô i ên nêbê, “A nêl hɨxôn nôn vô ông bê vô bucên tiga kokɨlêx obêc hi vya lu yuu lêm dɨ ông obêc yax a vun lu yon.” 31 Lêc Pita luu Yesu vya dɨ nêl kɨyang xêkɨzêc lax vô ên nêbê, “Ma vêl. A ob yax ông vun lêm. Dɨ tɨbii obêc hi a xib hɨxôn ông ge od pyap, lêc a ob yax ông vun lêm.” Dɨ nue ngɨvihi vɨhati nêl tɨyi xocbê Pita nêl ge.

Yesu la kɨtaa gê Getsemani

(Matyu 26:36-46 Luk 22:39-46)

32 Yesu he nue ngɨvihi loc mɨ la vɨgwe ti lê nêbê Getsemani, mêd Yesu nêl vô nue ên nêbê, “Xam dô ga ên a ob la kɨtaa.” 33 Om Yesu kô Pita yuu Jems hɨxôn Jon dɨ he la, lêc Yesu nɨlô vô vɨyin mabu, 34 om nêl vô yon ên nêbê, “A nɨlôg vô vɨyin levac tɨyi xocbê a ob xib ge. Om mon dô dɨ wê môp xôn dɨ le i yêp lêm.” 35 Mêd Yesu la teva tya dɨ la kɨpôm manôn vac kɨbun dɨ kɨtaa ên nêb obêc tɨyi ge od vɨyin tige i o lêc tulec i lêm. 36 Om kɨtaa bêga nêbê, “O mag, ông tɨyi wê ông ob vông môp vɨhati ge, om a nêb ông vô vɨyin tige vêl ên a, lêc ông o lêc vông i tɨyi wê a nêb ông vông ge lêm. Nge, ông vông i tɨyi xovôên wê ông vông ge.”

37 Pyap dɨ Yesu lax mɨ la vô nue ngɨvihi yon, lêc yê wê yon yêp nɨlô ma ge om nêl vô Pita ên nêbê, “Saimon, bêna lêc ông wêpê? Ông o tɨyi wê ông ob dô mamvɨha tya lê ge, me? 38 Om mon kɨdi lec mɨ kɨtaa, êdêc susu nipaên i o lêc yaxên mon lêm. Ên nɨlôm nêb ob vông yuac lê, lêc nimnɨvi vô vɨyin.”

39 Mêd Yesu lax mɨ la nang dɨ la kɨtaa tii vac, lêc kɨtaa tɨyi xocbê la kɨtaa lu ngwe tax ge. 40 Pyap dɨ lax mɨ la vô yon tii vac, lêc yê wê yon manôn yêp om yon yêp ge. Om Yesu tɨpi vô yon lêc yon o xovô kɨyang ti wê ob nêl vô Yesu ge lêm.

41 Mêd Yesu la kɨtaa dɨ vena lu ti wê vông yon ge, lêc yon yêp nɨlô ma om Yesu nêl vô yon ên nêbê, “Bêna lêc mon dɨwêp wêpênê? Ge pyap, ên buc wê xomxo ob vông Xomxo Nu** la vac tɨbii nipaên vɨgê ge val vô kwabo lec. 42 Om mon kɨdi lec ên il ob la. Mon wê, xomxo ti wê ob vông a la vac tɨbii vɨgê ge val le ge.”

Xomxo Yuda hôm Yesu xôn dɨ Yesu nue ngɨvihi pec sea

(Matyu 26:47-56 Luk 22:47-53 Jon 18:3-12)

43 Yesu gên nêl kɨyang tige dɨ lutibed Judas wê nu ngɨvihi ti ge val. Dɨ xomxo tɨbeac wê hôm yipac yuu vɨgo ge val hɨxôn. Xomxo tigee, xomxo levac wê mi si daa gee hɨxôn xomxo wê xovô Moses xolac gee dɨ Yuda levac levac ge, he vông he lam. 44 Judas nêl kɨyang ti vô xomxo tigee pyap ên nêbê, “Xomxo ti wê a obêc nga lia ge, od xam xovô bê ge xomxo tyo mê. Om xam hôm i xôn dɨ wê i xôn dɨ kô mɨ loc.”

45 Mêd Judas val dɨ la kwabo vô Yesu dɨ nêl vô i ên nêbê, “Xolac kehe” mêd nga i lia. 46 Om xomxo tigee yê dɨ la hôm Yesu xôn.

47 Mêd xomxo ti wê le kwabo ge hôm i yipac dɨ sev xomxo daa siên nên levac nu yuac ti nɨnya lihi vɨlu la vêl. 48 Mêd Yesu nêl vô xomxo wê hôm i xôn gee ên nêbê, “Xam xo ên xam nêbê a tɨbii yôdac ti om xam kɨlê yipac hɨxôn vɨgo dɨ lam hôm a xônê? 49 Tɨyi buc vɨhati a mi dô hɨxôn xam vac Anutu xumac ngɨbua dɨ a mi nêl xolac vô xam, lêc xam o hôm a xôn lêm. Om gwêbaga, kɨyang wê yêp vac xolac ge ob vô nôn lec.” 50 Mêd Yesu nue ngɨvihi vɨhati sea i dɨ pec mɨ la.

51 Xomxo ngɨvihi ti wê duc nivɨmihi yêp yaên kwem ti ge mɨla vô Yesu vɨxa, om tɨbii nêb ob hôm i xôn, 52 lêc ngɨvihi tyo pec mɨ la, dɨ nivɨmihi tô mɨ yêp dɨ i pec mɨ la xêtuac.

Yesu la le vô xomxo levac manôn

(Matyu 26:57-68 Luk 22:54-55,63-71 Jon 18:13-14,19-24)

53 Mêd he dɨdii Yesu mɨ la vô xomxo ti wê tu xomxo daa siên nên levac ge, mêd xomxo levac wê mi si daa gee hɨxôn xomxo wê xovô Moses xolac gee dɨ xomxo levac levac gee, he vɨhati kɨtucma mɨ lam. 54 Mêd Pita tɨmu vô Yesu vɨxa mɨ la, lêc le lam teva tya om mɨla vô xomxo daa siên nên levac ben wetôv dɨ mɨla nyuu ngwax hɨxôn xêhɨpue.

55 Mêd xomxo levac wê mi si daa gee hɨxôn xomxo kaunsil vɨhati kɨtucma mɨ dô, mêd he keac xomxo ya lam ên nêb he i lam nêl kɨyang wê Yesu mi vông vô he ge kɨtong, ên he nêb he ob tulec kɨyang soên wê Yesu mi nêl ge ên hi i yib lec. Lêc he o tulec kɨyang ti lêm, 56 ên xomxo tɨbeac vô nɨlô vô Yesu, lêc he nêl kɨyang kɨtyooên dɨ kɨyang wê he vông ge o tɨyima lêm. 57 Om he ya le kɨsii dɨ nêl kɨyang kɨtyooên bêga lec Yesu ên nêbê, 58 “Xe ngô wê xomxo tige nêl ên nêbê, ‘A ob dii xumac ngɨbua ti wê xomxo lox ya vɨgê ge vêl, dɨ buc yon obêc lam la vêl ge od a ob lox vac, lêc a vɨgêg ob lox lêm.’” 59 Lêc xomxo wê nêl kɨyang tige, vɨhati o nêl kɨyang tɨyima lêm.

60 Mêd xomxo daa siên nên levac tige kɨdi mɨ la le vac he mahɨgun dɨ kɨnêg vô Yesu ên nêbê, “Xomxo nêl kɨyang nipaên lec ông, om ông ob nêl kɨyang ti lax vô he, me?” 61 Lêc Yesu le mya pɨlihi dɨ o nêl

kɨyang ti lax vô he lêm. Om xomxo levac tige kɨnêg vô i tii vac ên nêbê, “Anutu wê il mi pɨmil ge, ông Kɨlisi** wê i nu ge, me?”
62 Om Yesu nêl ên nêbê, “A Kɨlisi, Anutu nu. Dɨ xam ob wê a Xomxo Nu**, a ob la dô vô Anutu, xêkɨzêc kehe, vɨgê hɨyôv, dɨ a ob vena vac vɨyobtoc kɨsii ganê.” 63 Mêd xomxo levac tige nɨlô vô nipaên om lêx ici va ngakwi dɨ nêl ên nêbê, “Om il ob keac xomxo ya mɨ he i lam nêl kɨyang hɨxôn i tii vac lêm. 64 Ên ici va so vya vô Anutu mɨ xam ngô pyap. Om xam nêb il vông bêna vô i?” Mêd he vɨhati nêl ên nêbê, “Yesu vông nipaên om il ob hi i yib.”

65 Mêd xomxo ya pɨsuv myaluc lec Yesu mêd vɨyum i manôn xôn ya nivɨmihi dɨ hi i dɨ nêl vô ên nêbê, “Nêl xomxo ti wê hi ông ge lê kɨtong.” Mêd xêhɨpu wê viac Anutu xumac ngɨbua ge kô i mɨ la dɨ la hi ya vɨgê.

Pita yax Yesu vun

(Matyu 26:69-75 Luk 22:56-62 Jon 18:15-18,25-27)

66 Pita gên le kɨbun lec wetôv mêd vêx ti wê vông yuac vô xomxo daa siên nên levac ge val, 67 lêc yê wê Pita dɨnyuu ngwax mɨ dô ge om yê i manôn dɨ nêl vô i ên nêbê, “Ông ge wê ông mi dô hɨxôn Yesu Nasalet ge.” 68 Lêc Pita nêl ên nêbê, “A lungên, dɨ a o xovô kɨyang wê ông nêl ge lêm.” Mêd Pita tɨtêc vêl ên he mɨ la le vô vuayen nɨnya [dɨ kokɨlêx hi vya taxlee.] 69 Mêd vêx yuac tige yê Pita tii vac nang om nêl vô xomxo wê dô kwabo ge ên nêbê, “Xomxo tige wê mi dô hɨxôn Yesu he nue.” 70 Lêc Pita yax Yesu vun nang dɨ nêb i lungên.

Mêd he dô myabo tya nang mêd xomxo wê dô ge nêl vô Pita ên nêbê, “Vɨxôhɨlôg, xe xovô ên xe nêbê ông ge Yesu nu ngɨvihi ti, ên ông ge xomxo Galili ti.”
71 Lêc Pita nêl kɨyang xêkɨzêc ên nêbê, “A le vô Anutu manôn dɨ a nêl hɨxôn nôn bêga bê a o xovô xomxo ti wê xam nêl ge lêm.” 72 Mêd lutibed kokɨlêx hi vya tii vac nang. Om Pita xovô kɨyang wê Yesu nêl vô i bêga nêbê, “Kokɨlêx obêc vô vya lu yuu lêm dɨ ông obêc yax a vun lu yon.” Pita xovô kɨyang tige om byag levac.

Copyright information for `PTP