1 John 3

God natunatuna.

Kovi yana, ita Mamai God ina nuwaviina irakata kirakai da ivoneta da tota natunatuna. Vonavaghata da tota na God natunatuna. Tuna kubiine iyavo kava dobu yawasina kamonai emakamakai na ke itakovi da tota nakanani, iyamna ti damsi na God ke itakovi. a 

Turaturaku, tami nuwanuwaku. Vonavaghata da namada tota na God natunatuna, ma ke katakova da ikikava kitata ina virei, tuna ke iti debei kurita. Ma takovi da maranai Keriso ina vovira na ina rudeba da takitai da tuna kitana ikikava. Ma bade tota kitata ina virei da tuna maghimaghighina. Iyavo kava Keriso itumaghanei ma ekoyakoyaghi na mara nonowa nuwanuwasi dadabuna ekiikiipupuni da ina ruyaghari, iyamna Keriso na yagharakiikiina.

Iyavo kava bera beroberosi eberaberai na God ina vonaviyoyovana ikiigiiyei, iyamna berabero kudubina na nani vonaviyoyovanina emiimiirikupukuputei. Ma koakovi da Keriso ipisi da ita bera beroberosi ita viitawei, ma tuna gwabinai na berabero kegha. b  Tuna kubiine iyavo kava Keriso yavata inuwasago na berabero ke ina berai, ina voterei. Ma iyavo kava bera beroberosi patana da eberaberai na Keriso ke itakovi.

Natunatuku, tami nuwanuwaku. Kokitaruvimi da ke sago iyai ini nowe beromi da ami keta koni wapai. Iyavo kava bera maninisi kava eberaberai na God ku matana ti na wawaya maninisi, Keriso nakanani. Ma iyavo kava bera beroberosi eberaberai, ti na Seitan ina wawaya, iyamna Seitan berabero ivi karei ma patana da eberaberai. Ma God Natuna ipisi da Seitan ina bera iti kovi tuwanonowi.

Iyavo kava itupuwame da ti na God natunatuna na berabero ke ita beraberai, iyamna God yavata inuwasago ma berabero ivoterei, iyamna i Mamai na God. 10 Yawasa weni nakanani takitai na takovi da iyavo kava na God natunatuna ma iyavo kava na Seitan natunatuna. Meni wawayina bera maninisi ke ita beraberai bo varesina yavata ke ita vivinuwaviina, tuna na ke God natuna.

Tinuwaviinavivirana.

11 Tami ami vitumaghana karenai na sisiya sago kovi yanei, sisiyina na weni. Tinuwaviinavivirana. c  12 Ma ke kona berai da Kein nakanani, tuna Seitan ina wawaya kubiine da tina kikei ikiivunui. Ma avi kubiine ikiivunui? Iyamna ina yawasa kamonai na bera beroberosi iberaberai ma tina kikei na bera maninisi iberaberai. d 

13 Varevaresiku, maranai wawaya dobuwai ina barakamtawemi na ke ami nota ina peku. 14 Keresiyana varevaresita yavata tinuwaviinavivirana, tuna kubiine takovi da tota na rabobo takiibutawei da yawayawata. Ma iyai ke ita vivinuwaviina na ivi debe meyei da tuna nakanani ma wawaya raborabobona. e  15 Ma meni wawayina varesina ibarakamtawei, tuna na nakanani ma kiivunuwa wawayina. Ma koakovi da kiivunuwa wawayina na yawasa makamakii nonowina ke ina panani. 16 Takovi da nuwaviina vaghata na weni. Yesu Keriso ivere meyei kubiita. Ma tota bade ita yawasa taverena varevaresita kubiisi. 17 Meni wawayina sawara gwabinai emakamakai ma ikitai da varesina nuwapoya kamonai ma ke iti kamyuyuwei na tuna mani idebe meyei da God ina nuwaviina gwabinai kegha. 18 Natunatuku, tami nuwanuwaku. Ita nuwaviina na ke sisiyina kava tisisiyei ma ku tepana na berasi yavata taberai, tuna na nuwaviina vaghata.

Ere tepatorata God kurina tanae.

19 Nuwaviina berasi taberai na takovi da vonavaghata gwabitiyai. Ma tuna nuwanuwata inubai da ere nuwanubata God kurina tanae, 20 namanaki da nuwanuwata kamonai damita taviiviiya da berabero wawayita. Tota ere tepatorata God maghinonai tamiiri, iyamna God ighe kirakai da aviyavisina nuwanuwata kamonai ighekuyowei. Ma tuna ita yawasa kudubina iakova yavui. 21 Turaturaku, tami nuwanuwaku. Nuwanuwata yagharina na ita nota ini rewapana maranai God kurina tanipowana, 22 ma aviyavisina tinowi kurina na peyarina ina vereta, iyamna ina sisiya bagibagisi tavovotekatekei ma ina kayowana kava taberaberai. 23 Ma ina sisiya bagibagina kurita na weni. Natuna Yesu Keriso titumaghanei ma varevaresita yavata tinuwaviinavivirana. Ikikava Keriso ivoneta na nakanani taberai. f  24 Ma iyavo kava God ina sisiya bagibagisi evovotekatekei, ti na God yavata inuwasago. Ma ina Kanuma Vovokaravina ivereta na tuna idebei kurita da God na nuwanuwata kamonai ma tota na God nuwanuwana kamonai.

Copyright information for `PWG