1 John 5

Dobu yawasina taghegavovori.

Wawaya iyavo kava itumaghana da Yesu na God ina Vivinevine Wawayina, ti damsi kudubisi na God natunatuna. Ma iyavo kava tomowa magurina nuwanuwana eviiviiya na bade natunatuna yavata nuwanuwasi ina viiya. Ma ikikava God natunatuna kurisi tinuwaviina na weni. God nuwanuwana taviiya ma ina sisiya bagibagisi tavotekatekei. Ina sisiya bagibagisi tavotekatekei na tidebe meyeta da ita nuwaviina God kurina emakamakai. Ma nani sisiyisi na ke vitana, a  iyamna iyavo kava God natunatuna na yawasa berona ighegavovori. Keriso titumaghana kirakiiyei na yawasa berona dobuwai titugudai. Meni wawayina itumaghana kirakai da Yesu na God Natuna, tuna wawayina kava dobu yawasina ina ghegavovori.

God ivi mamatara da Yesu Keriso na iyai.

Yesu Keriso ipisi na okowai ibabataito ma korosiyai tarana isororo. Ma ke okowa kava, ma tara yavata ivi matakira kurita. Ma bade Kanuma Vovokaravina nuwanuwata kamonai imamatareta da vonavaghata takovi. Bera ivi aroba imamatareta, sago na Kanuma Vovokaravina, sago na okowa, ma sago na tara. Ivi aroba i sisiya na sago, evonavoneta da Yesu na God Natuna. Wawaya dobuwai imamatara na tanotanotai da vonavaghata isisiyei. Ma God ivi mamatara kurita na ina vimamatara ivi rewapana kirakai, ke wawayota nakanani. Ma takovi da aviyavisina ivi sisiyei Natuna kubiine na vonavaghata. 10 Ma meni wawayina God Natuna itumaghanei na weni sisiyina nuwanuwana kamonai emakamakai. Ma meni wawayina God ina sisiya ke ita vivitumaghanei na evonavona da God na viviberona. Ma God ina vimamatara kamonai na tuna mani Natuna ivi sisiyei. 11 Ma sisiyina ivi mamatarei kurita na weni. God yawasa makamakii nonowina ivereta ma nani yawasina na Natuna gwabinai taviiya. b  12 Ma iyavo kava God Natuna gwabisiyai na yawasa makamakii nonowina namada iviiya. Ma iyavo kava God Natuna ke gwabisiyai na yawasa makamakii nonowina ke ita viiya.

Yawasa makamakii nonowina.

13 Weni sisiyisi agirugiruma kurimi da tami iyavo kava God Natuna koitumaghanei na kotakovi da yawasa makamakii nonowina namada koviiya. 14 Ma titepatora da God kurina tamiiririya ma ina kayowanai kava tinowi kurina na takovi da ini yaneta. 15 Ma ini yaneta kubiine aviyavisina kurina tinowi na takovi da ina vereta.

16 Ma iyi tam kuakovi da varesim berabero eberaberai na God kurina kuna nipowana da ini yawasi. Ma berabero sago kava emakamakai na tuna ibero kirakai da damona na wawaya kanumina ina rabobo. Wawaya nani bera berona ina berai na ke ata vonavonemi da kuna nipowana wawayina kubiine, ke ruvaruvana. 17 Bera dowadowasi peyarina yavu na berabero God ku matana. Ma berabero viya ke ina berita da God yavata tibogebogeta da kanumita ina rabobo.

18 Takovi da meni wawayina ina tupuwame da tuna God natuna na bera beroberosi ina voterei, ma Keriso nani wawayina etaratarapapari da Seitan ke ina kiiviberoi.

19 Ma takovi da tota na God natunatuna. Ma dobuwai iyavo kava ke God ina rakaraka kamonai na peyarisi Seitan ibadesi.

20 Bade takovi da God Natuna ipisi na akova ivereta da God vaghata akovina taviiya. Ma Natuna Yesu Keriso yavata tinuwasago, tuna kubiine God yavata tinuwasago. Tuna kava na God vaghata ma yawasa makamakii nonowina everevereta.

21 Natunatuku, tami nuwanuwaku. Sawara yamoyamonisi ke kona vokavakavarisi.

Copyright information for `PWG