a1:5Psa 2:7; 2Sam 7:14; 1Chr 17:13
b1:6Deut 32:43
c1:7Psa 104:4
d1:8-9Psa 45:6-7
e1:10-12Psa 102:25-27
f1:13Psa 110:1

Hebrews 1

Yesu Keriso na God Natuna.

Mara katamaninai God ina keta ipeyari bogii ma bogiiyai da ivivi sisiya peroperoveta kurisi. Ma bade ti ivivi damadamani ita kaekiki mau kurisi. Ma karako weni marasiyai God ivi sisiya na Natuna Yesu sisiyisi ivi damani kurita. Dobu karenai Natuna tepanai bera kudubina iyamoni, ma bade ivinei da kudubina ini rapenei ma ini badei. Yesu gweyurina na God kana kadara evonavonapotei, ma ivi ruwa na sago. Ma Yesu vonana ivi rewapana kirakai da gamona etereterei na bera kudubina emakamakai, ke ita wapawapa. Ma wawaya i berabero kudubina ikowatawei ikovi, ma muriyai ighae da ina Mamai rewapana kirakiina na katagheyanai imakai.

God Natuna ighe kirakai, ke aneya nakanani.

God Natuna ighe kirakai da aneya kudubisi ighekuyowesi. Ma bade kana vava na God iverei ma nani vavana na irakata kirakai, ke aneya kii vava nakanani. Ikikava God, Yesu ivi sisiyei na ke meyani ina aneya sago kurina nakanani iti sisiya. Ivona bo,

“Karakava Tuna ini mamiyeku,
ma taku ani natunei.”
ma muriyai ivona bo,

“Tam na natuku,
karako na taku am Mamai.” a 
Ma God, Natuna sago kava ivokiibuwei ku dobu na ivona bo,

“Aneya kudubisi God Natuna ina vokavakavari.” b 
Ma aneya ivi sisiyesi na ivona bo,

“Ina aneya iberisi da ti na bigabiga kava.
Ti na ke sago avai, nakanani ma yanunu bo keyama yebayebarina.” c 
Ma God Natuna ke nakanani, kurina ivona bo,

“Tam na God, ma am vikiivavona ina makii nonowa!
Am vibadana na maninina kavakava.
Bera maninisi nuwanuwam eviiviiya, da berabero na ke am kayowana tovona.
Tuna kubiine Taku am God avinem ma nuwabiibai oirina ku gayamim atepoi na avi matakira da turaturam kamosiyai na kughe kirakai.” d 
10 Ma bade God, Natuna kurina ivona bo,

“O Bada, mara karenai na Tam dobu kuyamoni,
Tam imamuwai kunuma kuyamoni.
11 Tam na ke kuna wapa, makamakii nonowim.
Ma dobu da kunuma karakava ina wapa, ina sirusiru da nakanani ma gara,
12 Kuna vopetami da nakanani ma tarasovo,
nakanani ma mowamowasi kuna votawei ma gara vuna kuna kotei.
Ma Tam na ke nakanani,
am yawasa damona kegha. Makamakii nonowim.” e 
13 Ma bade ikikava God, Yesu kurina ivi sisiya na ke meyani ina aneya sago kurina nakanani iti sisiya. Yesu kurina ivona bo,

“Katagheyakuwai kemakai
da kam ghavighaviya kudubina
ku kae gaburim ana teresi.” f 
14 Ma vaghina, takovi da aneya na ke Yesu nakanani. Ti na kanukanuma, God ina bigabiga kava. Ivonataweyana da iyavo kava yawasa makamakii nonowina ina viiya na ini vitesi.

Copyright information for `PWG