a11:9Psa 118:25-26
c11:17Psa 118:25-26
d11:23Mat 17:20; 1Kor 13:2
f11:25-26Mat 6:14-15

Mark 11

Yesu ku Jerusalem irurui na wawaya ivi kiikiiwei.

(Mat 21:1-11; Luk 19:28-40; Jon 12:12-19)

Yesu kana kivikivina yavata ibaba inenae da gisina kava ku Jerusalem ita nekiibau, ma Betani da Betipadi ku meyagisi ipisi, ti na Oliv koyana barabaranai. Ma kana kivikivina ruwa ivonatawesi da iti nao. Ivonesi bo, “Konae, ma nani meyagina maghinotai kona rurui na donki votuna wariwarimina kona kitai. Wawaya ke meyani ita geru tovoni. Uravina korupami ma korutinapiyei wike. Ma mikeda wawaya ini tarakiiyanemi bo, ‘Avi kubiine donki uravina koruparupami?’ na kovonesi bo, ‘Bada ekayokayowei. Ke mara gurina ma ina vovirei.’ ”

Ivi ruwa irui ku meyagai da keta baranai numa sago matuketinai donki wariwarimina ipanani ma ivi karei da uravina ita rupami. Ma wawaya viya ikitisi na ivonesi bo, “Avi kubiine nani donki uravina koruparupami?”

Ma ikikava Yesu ivonavonesi na nakanani ivonaveresi na wawayisi ivi vaghinei. Ma donki irutini ivovira Yesu kurina. Ma kii tarasovo ivi tawanepeyana donki ku tepana ma Yesu igeru. Ma wawaya peyarisi kii tarasovo ketiyai ikepana ma bade viya kiiragharaghasi dipiiyai iyaragha da ketiyai itawei. Ma kana koroto Yesu maghinonai ma murinai ibababa na ikarakarayogosi bo,

“Hosana! Kaigheghenim!
Bada avanai kepipisi! Tam na Bada ina vibiibiina kamonai! a 
10 Ita kaekiki David kana viteparara epipisi ma ina vikiivavona na Bada God ini biibiini!
Hosana! God, kiidamo makamakiim, kaigheghenim!”
11 Yesu irui ku Jerusalem, ma maninina inae ku Taparoro Numana. Ikitavirevire ma namada ravi ipika, tuna kubiine kana kivikivina ivi 12 yavata ikiibau ku Betani meyagina.

Yesu koweya imagi.

(Mat 21:18-19)

12 Mara itom ma Betani meyagina ikiibutawei inenae da Yesu vitonara ikarai. 13 Ikitataweyana da koweya inumoi ikitai. Ma iverubanenegi, ita kitai da iame bo kegha. Inekiibau na ipanani da amena kegha, iyamna ke kana mara da koweya itame. 14 Ma nani kiina imagi bo, “Ke meyani wawaya amem ina kam tovoni.”

Ma kana kivikivina ivi yanei da nakanani ivivi sisiya.

Yesu wawaya Taparoro Numana kamonai ikwavinisi.

(Mat 21:12-17; Luk 19:45-48; Jon 2:13-22)

15 Yesu inekiibau ku Jerusalem ma irui Taparoro Numana garina ku kamona. Ma vigimara wawayisi ma iyavo kava gwabisiyai igimagimara na kwavinisi ivi karei. Iyavo kava gabubu ivivi gimara bo mane ivivi vovivirana na i kemakema ivi kuririghana.
11:15Pasova kamna kubiine na wawaya i dobu bogii ma bogiiyai iriyesi ma i mane kitasi bogii ma bogiiyai. Wawaya viya i biga da mane ivivi vovivirana da Jiu damsi i ku mane. Ma ghamoghamo igimagimara suwara kubiine.
16 Ma keta igudui da wawaya ke kovokovoghina da i vigimagimara sawarisi yavata Taparoro Numana garina ku kamona ita rui. 17 Ma ivi beyebeyena kurisi, ma nani kamonai ivonesi bo, “Giruma katamana kamonai evonavona bo,

‘Aku numa na nipowana numana dam ma dam kubiisi.’
‘Ma tami koberai da tuna yapiyapi damsi i numa.’ ” c 
18 Ma taparoro babadisi i babada ma vonaviyoyovana vibeyebeyena wawayisi ina sisiya ivi yanei na ivi karei da keta iekwekwai da ikikava iti raboboi. Ma Yesu iyabuyabumanei iyamna ina vibeyebeyena ivi rewapana kirakai da koroto kudubina itinavivirisi.

19 Ma ravi ipika na Yesu kana kivikivina yavata Jerusalem kwanatuna ikiibutawei.

Koweya kiina isivi.

(Mat 21:20-22)

20 Mara itom na Yesu kana kivikivina yavata ibaba inenae ku Jerusalem ma ikitai da koweyina Yesu imagi na isivisivi ma ipoki. 21 Ma Pita nani koweyina inotapanani na Yesu ivonei bo, “Bada, kekitai. Koweyina kuimagi na ikaragavovori.”

22 Ma Yesu ivonesi bo, “God kovi tumaghanei. 23 Vonavaghata avonavonemi da iyai weni koyana ita vonei bo, ‘Kenae, ku yegai kuna tawem,’ ma aviyavisina isisiyei na nani kamonai notaragharagha gwabinai kegha da nuwanuwana kudubinai ini tumaghana da nani berana ina tupuwa na God ina berai. d  24 Tuna kubiine avonavonemi da aviyavisina ami nipowana kamonai koinowi na kovi tumaghana da ami kayowana namada gwabimiyai, God ina veremi. 25 Ma kuna vomiiri da kuta nipowana na kuna notapanani da nuwanuwam kamonai kwinam ina berabero patana da kutatani emakamakai na kenotatawei. Kuna notatawei na am Mamai kiidamowai bade am berabero ina notatawei.”
11:25Mara katamaninai giruma damsi peyarisi ves 26 ke ita terei. Ma viya na weni nakanani igirumi: ‘Ma i berabero ke kuna notatawei na bade ami Mamai kunumai am berabero ke ina notatawei.’
,
f 

Taparoro babadisi Yesu ina rewapana ivi taravirei.

(Mat 21:23-27; Luk 20:1-8)

27 Yesu kana kivikivina yavata ivovirame ku Jerusalem. Ma Yesu Taparoro Numana garina kamonai ibababa na taparoro babadisi i babada, vonaviyoyovana vibeyebeyena wawayisi ma Jiu damsi i babada ipisi kurina ma ivonamatakitakitei bo, 28 “Avi rewapanina kuviini ma iyi nani rewapanina iverem da weni berasi keberaberai?”

29 Ma Yesu ivonesi bo, “Aku vitarakiiyana sago kava ana terei kurimi. Kona vonapoteku na bade ana vonemi da aku rewapana imapatana aviiya da weni berasi aberaberai. 30 Jon ina rewapana na imapatana iviiya da ibabataito? Kunumai ipisi bo wawaya gwabisiyai? Kovoneku.”

31 Ma kamosiyai ti mani ivivi sisiya bo, “Mikeda kata vona da ina rewapana kunumai ipisi na ina kayovoneta bo, ‘Avi kubiine Jon ke koti tumaghanei?’ 32 Ma bade kata vona da rewapana wawayota gwabisiyai iviiya na iyavo kava i nota da Jon na peroveta na ti damsi nuwanuwasi ita pughu kurita.” Koroto ghamana iyabuyabumanesi, iyamna wawaya peyarisi inotanotai da Jon na God ina peroveta. 33 Tuna kubiine Yesu kurina ivona bo, “Ke katakovi.”

Ma ivonesi bo, “Nakanani da bade ke ana vonemi da iyi rewapana ivereku da weni berasi aberaberai.”

Copyright information for `PWG