Mark 3

Yesu tomowa gibegibesina ivi yawasi.

(Mat 12:9-14; Luk 6:6-11)

Viyakam marana sago na Yesu ivovirame ku kiki numana. Ma numana kamonai na tomowa sago imana gibegibesina. Ma Perisi damsi viya keta iekwekwai da ikikava Yesu iti wavui. Tuna kubiine ikitakita bogai da nani gibegibesina iti yawasi bo kegha. Viyakam maranai iti yawasi na vonaviyoyovana iti kiigiiyei. Ma Yesu gibegibesina ivonei bo, “Kepisi wike da koroto maghinosiyai kuna miiri.” Ma Perisi damsi ivi tarakiiyanesi bo, “Vonaviyoyovana kamonai na aviyavisina ivi vaghinei da viyakam maranai kata berai? Bera biibiisi bo bera beroberosi? Wawaya tiyawasisi bo takiiviberosi?”

Ma ti na kawasi ipota.
Yesu ikitavirevire ma nuwanuwana ipughu kurisi. Ma bade nuwanuwana idugara kirakiiyei da nuwanuwasi na gudugudusi. Ma nani gibegibesina ivonei bo, “Kevororona.” Ivororona ma imana iyawasa. Ma Perisi damsi ikiibau inae Kiivavo Herodi ina wawaya kurisi. Ma yavata ivivi ogatara da ikikava Yesu iti raboboi.

Koroto ghamana Yesu ikivini.

Yesu ma kana kivikivina ikiibau inae ku Gariri Tokana. Ma Gariri damsi peyarisi ikivini. Ma bade koroto ghamana Yesu sisiyina ivi yanei da dobu rabarabai ipisi. I dobu na Judiya dobuna, Jerusalem, Idumeya dobuna, Taya ma Saidon kwanatusi ma dobu viya Jodan okowina nevanai. Koroto irakata kirakai da Yesu kana kivikivina ivonesi da waka gisina ita tinapiyei da maranai koroto ita riyatawei na ita geru. a  10 Wawaya ipeyari namada ivi yawasisi tuna kubiine gubagubagisi peyarisi ivivi riya kurina da ita votovoni. 11 Ma wawaya viya kanuma beroberosi gwabisiyai irunuma na ti damsi Yesu ikitai ma maghinonai itawotawotesi ma ikiikiirara bo, “Tam God Natuna!”

12 Ma Yesu iyeghisi da ke iti mamatara da tuna iyai.

Yesu ina aposol ivi 12 ivinesi.

(Mat 10:1-4; Luk 6:12-16)

13 Yesu ighae ku koya barana ma ina kayowana wawayisi ikwatusi da ita pisi kurina na wawayisi ighae. 14 Ma ivi 12 ivinesi da ti na ina aposol
3:14 Aposol:Aposol iyamna wawaya da ivonatawei.
da yavata ita makai ma ita baba. Ma bade ita vonatawesi da ita dima,
15 ma rewapana ita veresi da kanuma beroberosi ita kwavinisi.

16 Tomotomowisi ivi 12 kii vava na weni. Saimon, tuna na Yesu ivi vavei Pita, 17 ma Zebedi natunatuna Jemes ma Jon, ti na Yesu ivi vavesi Bowanajesi, vavana iyamna warikeyakeya natunatuna. Ma bade 18 Anduru, Piripo, Batoromiya, Matiu, Tomas, Arupiyasi natuna Jemes, Tadiyas, Saimon, tuna Zelote
3:18 Zelote:Zelote damsi ikayokayowei da Israel kamonai Rome i vibadana ita kutawei.
wawayina,
19 ma Judas Iskariyot, tuna wawayina karakava Yesu ini wawanei.

Yesu ma Berusiburu.

(Mat 12:22-32; Luk 11:14-23; 12:10)

20 Yesu ku numa irui, ma bade koroto ghamana iriyei kurina da ke kovokovoghina da tuna ma kana kivikivina yavata ita kam. 21 Ma ina rakaraka ivi yanei da ikikava Yesu imakamakai na ipisi da ita rutinatawei. Ma ivona bo, “Yesu ineghanegha.”

22 Ma vonaviyoyovana vibeyebeyena wawayisi viya Jerusalem kwanatunai ipisi ma ivonavona bo, “Berusiburu Yesu itowatepani. Tuna na kanuma beroberosi i kiivavo ma rewapana iverei da kanuma beroberosi erurukwavina.” d 

23 Ma Yesu ikwatusi ipisi kurina ma miibiiyai ivi sisiya kurisi, ivona bo, “Avi kubiine Seitan ina vomiiri da Seitan ina kwavini? 24 Mikeda dobu sago kamonai wawaya ita totoi da ti mani kavakava kamosiyai iti ghaviya na i rewapana ita gisi ma peyarisi ita peku. 25 Bo mikeda rakaraka sago kamonai wawaya iti kawapata na ke kovokovoghina da nani rakarakana ita miirikikina. 26 Ma bade nakanani Seitan tuna mani ina wawaya yavata iti kawapata na ke kovokovoghina da ita miirikikina, ita peku.”

27 Ma Yesu miiba sago iterei, ivona bo, “Wawaya ita rui tomowa rewapanina ina ku numa da ina sawara ita yapi na kunona tomowina imana ma kaena ita patumi ma muriyai da ina numa ita rikai da ita yapi.”

28 “Ma vonavaghata avonavonemi da God wawaya i berabero ma i avabero bogii ma bogiiyai ina notatawei 29 ma berabero sago kava na ibero kirakai da ke meyani ina notatawei. Iyavo kava Kanuma Vovokaravina ini avaberowei na i berabero na makamakii nonowina.” e  30 Wawaya ivonavona da kanuma berona Yesu itowatepani, tuna kubiine weni sisiyisi iterei.

Yesu ina maduwa ma titina yoghoyogho.

(Mat 12:46-50; Luk 8:19-21)

31 Ma Yesu ina maduwa ma titina yoghoyogho inekiibau da matarai imiimiiri, ma sisiya ivonatawei da Yesu ita kiibau. 32 Koroto ghamana Yesu imakiigwagwari ma wawaya ivonei bo, “Am maduwa ma titim yoghoyogho matarai na ekwekwim.”

33 Ma Yesu ivonapotesi bo, “Aku maduwa ma titiku yoghoyogho na iyavo?” 34 Ma nani korotona ikitaviraviresi ma ivonesi bo, “Aku maduwa ma titiku yoghoyogho na weni. 35 Iyavo kava God ina kayowana evovotekatekei, ti na titiku yoghoyogho ma novunovuku ma aku maduwa.”

Copyright information for `PWG