a7:6-7Isa 29:13
b7:10Exod 20:12, 21:17; Lev 20:9; Deut 5:16

Mark 7

Yawasa dadabuna ma yawasa maninina.

(Mat 15:1-9)

Mara sago Perisi damsi ma vonaviyoyovana vibeyebeyena wawayisi Jerusalemuwai ipisi Yesu kurina ma imiirigwagwari. Nuwanuwasi ipughupughu iyamna ikitai da Yesu kana kivikivina ikamkam wapawapa, ke imasi ita tepokowakowai ma muriyai da ita kam.

Jiu damsi peyarisi i kiki katamana inununura bubuni ma kamosiyai na Perisi damsi ine kirakai. Ke meyani ita kam wapawapa. Kunona okowa vivibiibiinina ita viiya da imasi ita tepokowakowai ma muriyai da ita kam. Ma sago na vigimara gawarina ina kiibutawei na maninina imasi ina tepokowakowai ma muriyai da ina kam. Ma bade nakanani vivitava ma kamkam sawarisi mara nonowa na ina tepokowakowa. Weni berasi peyarisi ivi matakira da i kiki katamana bogii ma bogiiyai ivovotani.

Vaghina ma Perisi damsi ma vonaviyoyovana vibeyebeyena wawayisi Yesu ivi tarakiiyanei bo, “Avi kubiine kam kivikivina ita kiki katamanina ke ita nunuri? Ekamkam ma imasi ke ita tepotepokowai.”

Ma ivonapotesi bo, “Peroveta Aisaya ivona bubuna maranai tami miiriruwaruwami ivi sisiyemi. Rorova mara katamaninai igiruma da God ivona bo,

‘Weni wawayisi kawasiyai evonavona da evovokaraviku,
Ma nuwanuwasi inetaweyana,
Nuwatepasiyai evovokavakavariku na iyamna kegha.
Ti mani i akova ma i kiki tepanai ibeyebeyena.’ ” a 
“Ma tami na God ina sisiya bagibagisi kovovurei ma wawaya i kiki kovovotani.”

Ma Yesu ivona meyesi bo, “Koakova kirakai da God ina sisiya bagibagisi kobarei ma tami mani ami kiki konununuri! 10 Ami bera ani mamatarei. Moses igiruma bo, ‘Ami mamai da ami maduwa kovopepetisi.’ ma bade igiruma bo, ‘Iyi ina mamai bo ina maduwa ini avaberowei na koni raboboi.’ b  11 Ma tami na ke nakanani koti beyebeyena, kovonavona da wawaya ina maduwa da ina mamai kurisi ina vona bo, ‘Ke kovokovoghina da ani vitemi. Aku mura kudubina na God rapenai, iyamna namada vonakiiyapa bagibagina aterei da kurina ana suwara yavui.’
7:11Wawaya nakanani i vonakiiyapa bagibagina iterei na berana kana vava ‘Koban.’
12 Tuna kubiine ami vibeyebeyena kamonai wawaya kotaratarapaparisi da i mamai ma i maduwa ke ini vitesi na ini kamyuyuwa. 13 Nakanani koibeyebeyena wawaya kurisi na God vonana murimiyai koterei ma ami kiki koviiya da ku maghinomi. Bera peyarisi nakanani koberaberai.”

Aviyavisina wawaya nuwanuwasi ini dadabui.

(Mat 15:10-20)

14 Ma Yesu koroto ikwatusi ipisi ma ivonesi bo, “Peyarimi, kovi yana bubuniku da akova kona viiya. 15 Aviyavisina wawaya tupuwina kupunai ina rutonai da ku kamokamona ina rui na ke nuwanuwana ini dadabui. Ma aviyavisina berona nuwanuwana kamonai ina ghetawei da berabero ina berai na tuna ina yawasa ini dadabui.”
7:16Mara katamaninai giruma damsi peyarisi ves 16 ke ita terei. Ma viya na weni nakanani igirumi: ‘Wawaya ere tinimi na aku sisiya kovi yana bogai.’


17 Muriyai Yesu koroto ikuyowesi ma irui ku numa. Ma kana kivikivina ivi tarakiiyanei da nani miibiina na iyamna avai. 18 Ma ivonesi bo, “Tami bade neghaneghami, bo? Namada kotakovi da aviyavisina tupuwita kupunai tarutonai na ke nuwanuwata ini dadabui God matanai, 19 iyamna wawaya ina kam bo inuma na inoru ku kamokamona ma karakava tupuwina kamonai ina kiibau, ma ke ku nuwanuwana ina rui.” Yesu na weni sisiyina iterei da vavai ma siya peyarina ivotawei da wawaya ina kam wapawapa.

20 Ma ina sisiya ikwapanatini bo, “Aviyavisina berona wawaya nuwanuwana kamonai ina ghetawei na tuna ini dadabui God matanai. 21 Wawaya nuwanuwana kamonai nota dadabusi egheghetawei da tuna berabero eberaberai da vipekana wapawapa, yapiyapi, kiivunuwa, vitunebo, 22 matamatigha, kayotirana, vibero, tupuwa ina kayowana dowadowasi, nuwakapi, avabero, kayotata ma bera neghaneghasi eberaberai. 23 Weni berasi beroberosi peyarina wawaya nuwanuwana ma ina nota kamonai ekiikiibau na eberaberai da wawayina na dadabuna God ku matana.”

Wavine sago Yesu ivi tumaghanei.

(Mat 15:21-28)

24 Yesu Gariri dobuna ikuyowei ma ikiibau ku Taya kwanatuna. Ma kwanatu ririnai ku numa sago irui ma ke ita kayowei da wawaya itakovi da tuna na nani dobunai. Ma ke kovokovoghina da ita kove. 25 Wavine sago ivi yana da Yesu ipisi. Wavinena natuna na wavine kikei ma gwabinai kanuma berona irunuma. Tuna kubiine yaghiyaghinai inae Yesu kurina ma maghinonai ivi tuwaporeruruwana ma maghighina ioru ku tano. 26 Wavinena na Grik wavine, ma Ponisiya dobunai itupuwa, Siriya kamonai. Ma ivi nowi Yesu kurina da kanuma berona natuna gwabinai ita kwavini. 27 Ma Yesu miibiiyai ivonapotei bo, “Kunona ededa yoghoyogho ina kam bubuna. Ke ita biibai da kii vavai taviitawei ma kukou taveresi.”

28 Ma wavinena Yesu ivonapotei bo, “Bada, kuvona bubuna, ma kegha da ededa ekamkam ririgha na kukou bade kema gaburinai ekamkam.”
7:28Weni miibiina kamonai ededa yoghoyogho na Jiu damsi, kukou na kupuna damsi, ma vavai na Yesu ina rewapana. Yesu ivonavona da tuna mani ina dam Israel kamosiyai na ina biga irakata, tuna kubiine ke kovokovoghina da ita kiibau kupuna damsi kurisi da ti yavata iti yawasisi. Ma Grik wavinena kam ririgha ivi sisiyei na ivonavona da Yesu ina rewapana irakata, tuna kubiine itekateka kirakai da natuna iti yawasi.


29 Ma vaghina, Yesu ivona bo, “Kuvonapote bubuniku. Tuna kubiine kevovira am ku numa na kuna panani da kanuma berona natum gwabinai ikiibau.”

30 Ivovira ina ku numa na ikitai da natuna ikenakena bubuna, iyamna kanuma berona ikiibutawei inae.

Yesu, tomowa ke ita viviyana ma ke ita vivisisiya na ivi yawasi.

31 Yesu ivomiiri Taya kwanatuna ikuyowei inae ku Saidon kwanatuna. Muriyai ibaba da ku Dekapolis, tuna dobuna na Gariri tokana baranai.
7:31 Dekapolis:Dobuna kana vava Dekapolis, Grik gamosiyai iyamna kwanatu imaruwa.
32 Ma wawaya viya tomowa sago irutinapiyei kurina, tomowina na ke ita viviyana ma ke ita vivisisiya. Ma wawayisi ivi nowi da imana ku tepana ita terei da iti yawasi. 33 Ma Yesu koroto kamonai tomowina irutinavurei ma imarakorakona ku tinabonaghina nevana da nevana iterei. Muriyai imana ikanui ma tomowina pepana ivotovoni. 34 Ma itepa da ku kunuma ikita. Ma yana itawei ma tomowina kurina ivona bo, Ephphatha, weni sisiyina iyamna ‘Kevotawei.’

35 Yaghiyaghinai tinina itamobau da ivi yana, ma pepana ivi kiivirei da ivi sisiya bubuna. 36 Ma Yesu koroto ivonatanisi da ke sago iyi kurina iti mamatara da avi iberai. Mara nonowa nakanani ivonavonatanisi da ke iti mamatara ma kegha da wawaya kurisi ivivi sisiya. 37 Wawaya peyarisi inotanota kavai da ivonavona bo, “Bera peyarina eberabera bubuni! Ma bade tinapotapotasi da iyana ma kawabutabutasi da isisiya!”

Copyright information for `PWG