a15:4Exod 20:12, 21:17; Deut 5:16; Lev 20:9
b15:8-9Isa 29:13
d15:18Mat 12:34

Matthew 15

Kaekiki mau i vibeyebeyena.

(Mak 7:1-13)

Perisi damsi ma vonaviyoyovana vibeyebeyena wawayisi viya Jerusalem kamonai ipisi Yesu kurina da ivi tarakiiyanei bo, “Avi kubiine kam kivikivina kiki katamana ikiigiiyei? Vi imakowa ketana ke ita kivikivina bubuni. Kunona na imasi ita tepokowakowai ma muriyai da ita kam.” Ma Yesu ivonapotesi bo, “Ma tami, avi kubiine God ina sisiya bagibagisi kobarei da tami mani ami kiki kokivikivini? God ivoneta bo, ‘Ami mamai da ami maduwa kovopepetisi.’ Ma ivona bo, ‘Iyi ina mamai bo ina maduwa ini avaberowesi na kokiivunui.’ a  Ma tami na ami vibeyebeyena na weni nakanani. Tomowa ina maduwa da ina mamai ina vonesi bo, ‘Aku bera ma aku sawara peyarina God kurina asuwara. Tuna kubiine ke ani vitemi.’ Weni nakanani koibeyebeyena na God vonana kotatakuputei da ami kiki katamana kokivikivini. Tami miiriruwaruwami! Aisaya ivona bubuna, igiruma da God ivona bo,

‘Weni wawayisi kawasiyai evonavona da evovokaraviku,
Ma nuwanuwasi inetaweyana,
ke gwabikuwai.
I vokavakavara na kwebuna.
Nuwatepasiyai evovokavakavariku na iyamna kegha.
Ti mani i akova ma i kiki tepanai ibeyebeyena.’ ” b 

Aviyavisina ina berim da kuna dadabu.

(Mak 7:14-23)

10 Yesu wawaya ikwaturiyariyesi ma ivonesi bo, “Kovi yana bubuna da akova kona viiya. 11 Aviyavisina kawamuwai kekanikani ma keumumai na ke ina berim da God ku matana tam na dadabum. Ma sisiya berona kawamuwai ina kiibau na tuna ina berim da God ku matana tam na dadabum.”

12 Muriyai kana kivikivina inae Yesu kurina ma ivonei bo, “Kuakovi bo kegha da nakanani kuvi sisiya na Perisi damsi nuwanuwasi ipughu.”

13 Ma ivonapotesi bo, “Aku Mamai kunumai aviyavisina ke tuna mani imanai ita voni na ere ramramna ina tinaragutawei. 14 Kovoteresi, nani Perisi damsi ke kona notisi, ti na babada matapotapotasi. Wawaya matapotapotana ma kwinana matapotapotana ini nowei na ivi ruwa ku bonagha ina ririgha.” c 

15 Ma Pita ivona bo, “Bada, miibiina Perisi damsi kuvonesi na iyamna kuti debei kurikai.”

16 Ma Yesu ivona bo, “Te! Patana da koneghanegha bo? 17 Kade kotakovi da aviyavisina kawatiyai takanikani ma tumumai na ku kamokamota erurui ma muriyai tupuwita ina kiibutawei. 18 Nota berona wawaya nuwanuwana kamonai egheghetawei da kawanai sisiyina ekarakaratawei. Tuna ina berai da God ku matana wawayina na dadabuna. d  19 Wawaya nuwanuwana kamonai nota dadabusi egheghetawei. Kiivunuwa, vipekana wapawapa, ruwavine, rutomowa, yapi, vimamatara bero ma viavabero. 20 Weni berasi kona berai na God matanai tami wawaya dadabumi. Ma imami ke kona tepokowakowai ma kona kam na tuna ke ini dadabumi.”

Wavine sago ina vitumaghana.

(Mak 7:24-30)

21 Yesu nani dobuna ikiibutawei ma inae ku Taya ma Saidon kwantusi. 22 Ma wavine sago nani dobunai imakamakai, tuna dobu viruwa wawayina, ina karena na Keinan dobuna. Ma ipisi Yesu kurina ma ikiirara bo, “Bada, tam David Tupurereghina, kevi kamyuyuweku! Natuku wavinena gwabinai kanuma berona irunuma da evovokwarakwara kirakai.” 23 Ma Yesu ke sago ita vonapotei. Ma kana kivikivina ipisi da Yesu kurina ivi nowi bo, “Kevonatawei ina nae, ekivikivinita ma ekiikiirara kirakai.”

24 Ma Yesu wavinena kurina ivona bo, “Apisi da Israel damsi kava kubiisi. Ti nakanani ma sipu siwasiwanisi.”

25 Ma wavinena ipisi kurina da maghinonai ivi tuwaporeruruwana ma ivonei bo, “Bada, kevi viteku!”

26 Ma ivonapotei bo, “Ke ita biibai da wawaya ededa kii vavai ita viiya ma ita tawei kukou kurisi da ita kani.”

27 Ma wavinena ivona bo, “Vonavaghata Bada, ma kegha da kukou ina mamai ekamkamririgha na evovoterei da ina kukou ekanikani.”

28 Ma Yesu wavinena ivonapotei bo, “Aku wavine, am vitumaghana irakata kirakai! Am kayowana ana berai.” Ma yaghiyaghinai natuna iyawasa.

Yesu wawaya peyarisi ivi yawasisi.

29 Yesu nani dobuna ivoterei da ku Gariri tokana inae. Ma kikirai ibaba inae da ighae ku koya barana ma imakiivipika. 30 Koroto ghamana iriyei kurina ma gubagubagisi irutinaneyesi. Digadigasi, matapotapotasi, kawapotapotasi ma kii gubaga bogii ma bogiiyai. Yesu maghinonai ivi makiinisi da ivi yawasisi. 31 Ma wawaya peyarisi ivi deye kirakiiyei da kawapotapotasi ivivi sisiya, digadigasi ibababa, ma matapotapotasi ikitakita. Ma Israel i God ivi ghegheni.

Yesu wawaya 4 tausan ivi kanisi.

(Mak 8:1-10)

32 Yesu kana kivikivina ikwaturiyariyesi ma ivonesi bo, “Weni wawayisi aikamyuyuwesi, iyamna mara aroba yavata tamakamakai ma kii vavai kegha. Ke ata kayokayowei da ere vitonarisi ana vonatawesi da ketiyai ina kayoparoro.”

33 Ma kana kivikivina ivonei bo, “Wena dobu makiiwapana. Vavai imapatana tapanani da koroto ghamana tikanisi?”

34 Ma Yesu ivi tarakiiyanesi bo, “Parawa viya gwabimiyai?”

Ma ivonapotei bo, “Parawa miikovimaruwa ma iyana ruwa kikei.”

35 Ma Yesu, koroto ghamana ivonesi da tanowai imakai. 36 Ma parawa da iyana iviiya ma God ivi kiikiiwei. Ivogimagimai ma kana kivikivina iveresi da irereghi wawaya kurisi. 37 Ma peyarisi ikam da inunusi. Ikam ikovi ma murinai kana kivikivina kamtutura iyuna da kode miikovimaruwa ivi tupoi. 38 Nani korotona kamonai na tomotomowa kava ivi yavisi na ivi 4 tausan ma bade wivine ma ededa yoghoyogho yavata ikam. 39 Ma vaghina, korotona ivonatawesi inenae na Yesu ku waka igeru da idamana ku Magadan dobuna.

Copyright information for `PWG