a4:1Hib 2:18, 4:15
b4:4Deut 8:3
c4:6Psa 91:11-12
d4:7Deut 6:16
e4:10Deut 6:13
h4:15-16Isa 9:1-2
i4:17Mat 3.2
j4:23Mat 9:35; Mak 1:39

Matthew 4

Devil, Yesu iruyaghai.

(Mak 1:12-13; Luk 4:1-13)

Nani murinai Kanuma Vovokaravina Yesu irutini ku warere da Devil ita pisi da Yesu ita ruyaghai. a  Madeghai ma didibarai ivivi siya da mara 40 ikovi ma vitonara ikara kirakiiyei. Ma Devil ipisi ma ivona bo, “Tam God natuna, bo? Kevona da weni wakimisi ini parawa.”

Yesu ivonapotei bo, “Giruma katamana evonavona bo, ‘Wawaya ke parawa kava tepanai ita makamakai ma God gwabinai vonana ekiikiibau na tuna tepanai ina makai.’ ” b 

Nani murinai Devil, Yesu irutini ku Jerusalem, tuna na kwanatu vovokaravina. Ma ighae ku Taparoro Numana vovona. Ma Devil ivona bo, “Tam God natuna, bo? Ketawem kunoru. Giruma katamana evonavona bo,

‘God ina aneya ina vonesi da ina koyagha bubunim,
ma ina vokemim da kaem ke wakima ina takurei.’ ” c 
Ma Yesu ivonapotei bo, “Giruma katamana bade evonavona bo,

‘Bada God ke kuna rubui.’ ” d 
Nani murinai Devil, Yesu irutini da ku koya tepana ma dobu kudubina ina mura yavata ivi beyei. Ma Devil ivona bo, “Kuna runomeku ma kuna vokavakavariku na aviyavisina peyarina kekitakitika na ana verem da kuni badei.”

10 Ma Yesu ivonapotei bo, “Seitan, kenetaweyana! Giruma katamana evonavona bo,

‘Am Bada God ina kina kava kevokavakavari ma kevotekatekei.’ ” e 
11 Ma vaghina, Devil inae. Ma Bada ina aneya viya inekiibau ma Yesu ikoyagha bubuni.

Yesu ina biga ivi karei.

(Mak 1:14-15; Luk 4:14-15)

12 Yesu sisiya ivi yanei da Jon gabura kamonai na ivovirame ku Gariri dobuna. f  13 Ma Nasaret kwanatuna ivoterei ma inae da Kapeniyam kwanatunai imakai. Nani kwanatuna na Gariri tokana baranai, Zebulun ma Napitali damsi i dobu kamonai. g  14 Nakanani iberai da aviyavisina peroveta Aisaya igirumi na itupuwa, ivona bo,

15 “Gariri na Zebulun ma Napitali damsi i dobu.
Tuna kikirai, Jodan okowina nevanai,
ma kamonai na kupuna damsi peyarisi imakiiyana.
16 Tuna dobunai wawaya nubakutuva kamonai imakamakai,
ma yasegana ghamana ina kitai.
Iyavo kava rabobo damina eviiviiya ma nubakutuvina kamonai emakamakai na
kurisi yasegana ina nekiibau.” h 
17 Nani maranai Yesu dima ivi karei, ivonavona bo, “Ami bera beroberosi kovinimayei ma komiirikupukuputei, iyamna God ina vikiivavona enenekiibau kurimi.” i 

Yesu kana kivikivina ruwamaruwa ivinesi.

(Mak 1:16-20; Luk 5:1-11)

18 Yesu Gariri tokana kikirinai ibababa ma tomotomowa ruwa ikitisi iwiwito. Ti i biga na iyana ikonakonisi ma ivivi gimara. Sago na Saimon (kana vava sago Pita) ma sago na tina kikei Anduru. 19 Ma Yesu ivonesi bo, “Kopisi, kokiviniku. Ani beyebeyemi da wawaya kona konisi.” 20 Ma yaghiyaghinai i wito ivoterei ma Yesu ikivini.

21 Inae gisina ma tomotomowa ruwa ikitisi, ti na Zebedi natunatuna Jemes ma Jon. Waka kamonai i mamai yavata i wito iwuwurapotapotai ma Yesu ikwatusi 22 na yaghiyaghinai i mamai ma i waka ikuyowei ma Yesu ikivini.

Yesu gubagubagisi ivi yawasisi.

(Luk 6:17-19)

23 Yesu Gariri dobuna ine yavui ma kiki numasi kamosiyai ivivi beyebeyena, God ina vikiivavona idimadimei. Ma wawaya kii gubaga bogii ma bogiiyai na kudubisi ivivi yawasisi. j  24 Varana Siriya dobuna ine yavui, ma wawaya turaturasi gubagubagisi irutinisi kurina. Kii gubaga bogii ma bogiiyai. Viya na ininisi ivivi visivisiyana, viya na paroparorosi, viya na digadigasi ma bade viya kanuma beroberosi gwabisiyai irunuma. Ma Yesu peyarisi ivi yawasisi. 25 Tuna kubiine koroto ghamaghamasi ivivi kiidaburana da Yesu ikivikivini. I dobu na Gariri, Dekapolis,
4:25 Dekapolis:Dekapolis Grik gamonai iyamna ‘Kwanatu Imaruwa.’
Jerusalem, Judiya ma bade Jodan okowina nevanai.

Copyright information for `PWG