a18:2Isa 13:21, 21:9; Jer 50:39, 51:8; Rev 14:8
b18:3Isa 23:17; Jer 51:7
c18:4Isa 48:20; Jer 50:8, 51:6, 45
d18:5Gen 18:20-21; Jer 51:9
e18:6Psa 137:8; Jer 50:29
f18:7-8Isa 47:7-9
g18:9-10Ezek 26:16-17
h18:11Ezek 27:31, 36
i18:12-13Ezek 27:12, 13, 22
j18:15Ezek 27:31, 36
k18:17Isa 23:14; Ezek 27:26-30
l18:19Ezek 27:30-34
m18:20Deut 32:43; Jer 51:48
n18:21Jer 51:63-64; Ezek 26:21
o18:22Ezek 26:13; Isa 24:8
p18:22-23Jer 7:34, 25:10
q18:24Jer 51:49

Revelation of John 18

Babilon ipeku.

Weni berasi murinai akita na aneya sago kunumai iororu akitai. Tuna aneyina na ina rewapana irakata kirakai. Ma kana kadara ioru da dobu kudubina iyasegana yavui. Ma ikiirara da gamona ghamanakina, ivona bo,

“Ipeku. Babilon avatetena na ipeku.
Tuna kwanatuna na ibubu da karako na kanuma beroberosi ma dowadowasi ivi tuwakarei.
Ma bade ganibowa kamkam kiusi ma ghamoghamosi i vivirogu gawarina. a 
Dam ma dam dobuwai wavinena ina berabero ighanoghanovi ma ina wain iumuma neghanegha ma yavata ivivi pekana.
Ma bade i kiikiivavo wavinena yavata ivivi pekana wapawapa.
Wavinena aviyavisina imatamatighei ma avi kava iyaviyaviyei na dobu kana vigimagimara babadisi kudubina ikavarapiyei da ivivi gimarei kurina.
Tuna tepanai mura ghamana ipanapanani da imakamakiigheghae.” b 
Ma bade gamo sago kunumai ioru avi yanei, ivona bo, c 

“Aku wawaya, kokiibau. Babilon kokiibutawei.
Ina berabero kudubina kobarei, ke kona beraviiviiyei.
Kona barei na bade kana kovogha kona takuputei.
Ina berabero iribai ighae da ku kunuma. d 
Ma ina berabero na God enotanotai da karakava kana kovogha ina verei.”
“God, am wawaya ikikava ivivi kayotiranesi na bade nakanani biwana keviiya, e 
ma kana kovogha na kevi taratatanei.
Ma ina ku redu am nuwapughu okowina kuna tepotepoi na kevi kiikunukunui da rewapanina kava kuna tepoi,
ke okowa yavata kuna virai da kuni nubai.
Ikikava imakiigheghae da dobu yawasina ma ina mura inuwabiibiiyei
na bade nakanani kekutawei inoru da ini moyaka ma ininina ina visi ma ina vokwarakwara. f 
Tuna mani inota meyei na ikayokayotata ivona bo,
‘Taku na kiivavo wavineku.
Taku na ke meyani ana kwapura
ma kwapukwapura ikikava ikamyuyuwa na karakava ke nakanani ani kamyuyuwa tovona.’ ”
“Ina kayotata kubiine mara sago kava kamonai na nuwapoya bogii ma bogiiyai ina panani.
Gomara, vokwarakwara ma rabobo ina kamowani.
Ma keyama ina karagavovori,
iyamna Bada God rewapana kirakiina tuna ina vomiiri da kovogha ina verei.”
Ma dobu kana kiikiivavo na wavinena ina berabero ighanoghanovi ma ina mura tepanai imakamakiigheghae ma yavata ivivi pekana. Ma keyama buna kava ina kitai na inakovi da nani wavinena ekarakarai na kubiine ina tusiyasiyapa. g  10 Ma kana kovogha ina yabumana kirakiiyei da rabarabai ina miiritaweyana ma ina vona bo, “Te, te, te, da ibero ghagha. Babilon na kwanatu ghamana ma rewapanina ma kegha da mara sago kava kamonai na kana mara ivi kovi tuwanonowi.”

11 Ma dobu kana vigimagimara babadisi Babilon ina tuwei ma ina siyapei iyamna ke sago wawaya da kurisi i sawara iti gimara. h  12 Muriyai da keyama ita karai na Babilon kamonai i sawara bogii ma bogiiyai ivivi gimara. Sawarisi na gold, da silva ma pels ma wakima vovokeyakeyusi. Ma bade gara poipoisi, yebayebarisi ma dugadugarisi, silkiyai ma lineniyai iyamona. Ma bade kii ghabughabusi viya ipapa. Ma sawara ipeyari iruyamona, viya na aivori ma viya na bronz da ayon ma mabol wakiminai iyamona. i  13 Ma bade kii bekasi ma vavai kii vovoghabughabu, viya vitava kubiine ma viya na insens kapuna kubiine. Ma muramura kii vava meya da frankinsens kii ipanai iyamona. Ma wain ma oliv oira da parawa ma whiti. Ma sipu ma hosi da kau ma seriyoti ma wawaya tupuwisi ma kanumisi ivivi gimara. 14 Ma vigimara babadisi ina vona bo, “Babilon, nuwanuwam aviyavisina kava ivadivadiyei na ikuyowem. Am mura ma dobu yawasina biibiina na kuvoyakiri da ke kovokovoghina kuna panana meyei.” 15 Ma nani vigimara babadisi Babilon kwanatuna kamonai ivivi gimara da mura ghamana ipanapanani na ina kitai da ina karakarai ma kana kovogha yabumanina na rabarabai ina miiritaweyana. Ma ina tusiyasiyapa bo, j  16 “Te, te, te, da ibero ghagha. Babilon na kwanatu ghamana ma avatetena. Kana gara poipoisi, yebayebarisi ma dugadugarisi, silkiyai ma lineniyai iyamona, ma kana monagha na wakima vovokeyakeyusi ma gold da pels ivivi kote. 17 Ma kegha da mara sago kava kamonai na nani murina ivivi makiiberowanei na kudubina iwapa tuwanonowa.”

Ma waka babadisi ma iyavo kava waka tepanai igerugeru bo tepanai evovobagibagi na kudubisi rabarabai ina miiritaweyana.
18 Ma Babilon kwanatuna ina karakarai na buna kava ina kitai ma ina kiirara bo, “Nani kwanatuna ghamana ma avatetena na ke sago meni dobunai kwanatu sago maghimaghighina ita makamakai da iti kovokovoghana.” k 

19 Ma i nuwapoya kubiine dowa popokuna ina voragaraguna da gayamisi ina dobira yavui. Ma ina tutusiyasiyapa bo, “Te, te, te, da ibero ghagha. Nani kwanatuna ghamana ma avatetena tepanai na yegai bababata kudubita tamakiigheghe yavu. Mara sago kava kamonai na ipeku tuwanonowa.” l 

20 “Kunuma makamakiimi, kovi nuwabiibai da Babilon kovogha iviiya. God ina wawaya vovokaravimi ma peroperoveta da aposol kudubimi kovi nuwabiibii kirakai, iyamna ikikava Babilon ivivi kayotiranemi na bade kubiimi na biwana God iviiya.” m 

21 Ma muriyai aneya sago rewapana kirakiina wakima ghamanakina ivoepai da ku yegai basuna itawei ma ivona bo,

“Ere ghakighakiku weni wakimina atawei na Babilon avatetena bade nakanani ina peku tuwanonowa da ke kovokovoghina meni wawayina ina kita meyei. n 
22 Ma Babilon kamonai ke meyani da nuwabiibii kwaributuna ina ghe tovoname. Ma ke meyani da tavora damsi ma i hap bo durere da ture ina vodidighi. Ma akova wawayisi imasiyai sawara iyamoyamona na ina wapa tuwanonowa. Ma ke meyani da kamomuwai whiti kana gudaguda wakimina ina raragava tovona. o, p  23 Ma bade kamomuwai na ke meyani da rampa ina karatame. Ma tavine vuvau ke meyani da gamo dadurisi ina ghe tovona. Dobuwai am vigimara babadisi na avatetesi ma ivi rewapana kirakai. Ma dam kudubina kuvi nuwatinisi da am kasiko ma vokavara vibero ku kamona irui. 24 Ma bade God ipananim da kamomuwai ina peroperoveta ma ina wawaya vovokaravisi tarasi isororo. Tam kovogha keviiviiya, iyamna God ina wawaya dobuwai kuvi kiivunuwanatawetaweyana.” q 

Copyright information for `PWG