a22:1Ezek 47:1; Zech 14:8
b22:2Gen 2:9; Ezek 47:12
c22:3Zech 14:11
d22:5Isa 60:19; Dan 7:18
e22:11Dan 12:10
f22:12Isa 40:10, 62:11; Psa 28:4; Jer 17:10
g22:13Rev 1:8, 17, 2:8; Isa 44:6, 48:12
h22:14Gen 2:9, 3:22
i22:16Isa 11:1, 10
j22:17Isa 55:1
k22:18-19Deut 4:2, 12:32

Revelation of John 22

Ma muriyai na nani aneyina yawasa okowina ivi beyeku. Ma okowina na miirara kiikiina, nakanani ma garasi, ma God ma Sipu Gegeyina yavata i vikiivavo gawarina gaburinai ikiikiibau. a  Ma okowina na iverau ioru da nani kwanatuna ketana ghamana basunai iveraverau. Ma okowina nevana da nevanai na yawasa kiisi imiimiiri. Ma nawaravi nununai iamame da nawaravi sago sago duma na amesi bogii ma bogiiyai. Ma rugurugusi na gegura da dam ma dam ivivi bunama da yawasa ipanapanani. b  Rorova God dobu imagi na karako ivotawei ma ke meyani da aviyavisina sago inimaga meyei. c 

Ma God ma Sipu Gegeyina yavata i vikiivavo gawarina kava nani kwanatuna kamonai ina makamakai da ina bigabiga wawayisi ina vovokavakavari.
Ma God maghighina ina kitakitai ma kana vava na maghitepasiyai ina makamakai. Ma nani dobunai na didibara kegha tuna kubiine madegha ma yasegana ke inekwai, iyamna Bada God na i yasegana. Ma wawayisi ini kiivavo mara nonowa. d 

Yesu epipisi.

Ma aneyina ivoneku bo, “Weni bukana kamonai sisiya kudubina kevi tumaghanei, iyamna tuna na vonavaghata. Ma Bada God tuna Kanuma Vovokaravina evonavonatawei ina peroperoveta kurisi na bade nakanani ina aneya ivonatawei da ina bigabiga wawayisi kurisi idebei da mara gisina kava ma maghinotiyai aviyavisina ina tupuwa.”

Ma Yesu ivona bo, “Kovi yana. Taku gisina kava ma ana pisi. Ma iyavo kava sisiya kudubina weni bukana kamonai evovotani na God ini biibiinisi.”

Weni berasi kudubina na taku Jon tinikuwai avi yanei ma matakuwai akitai. Ma nani aneyina bera kudubina ivi beyeku ikovi na maghinonai avi tuwaporeruruwana ma ataweku da ata vokavakavari. Ma ivoneku bo, “Kevoterei. Ke kuna vokavakavariku.”

“Taku na tami vitumaghana dami nakanani. Tam ma peroperoveta turaturam ma iyavo kava weni bukana ina sisiya kovovotekatekei, kudubita na God ina bigabiga. Tuna ina kina kava kevokavakavari.”

10 Ma bade ivoneku bo, “Weni bukana kamonai aviyavisina God gwabinai kuviiya ma kugiruma na ke kuna teregavui, iyamna weni berasi kudubina na mara gisina kava ma ina tupuwa. 11 Ma iyavo kava berabero eberaberai na vaghina, berabero evokikini. Ma iyavo kava bera dowadowasi esasaghirighiriyei na bade vaghina, tuna evokikini. Ma iyavo kava iwawaya bubuna na nakanani evi wawaya bubuna. Ma bade iyavo kava yawasa vovokaravina kamonai emakamakai na bade nakanani nani yawasina kamonai emakai.” e 

12 Ma Yesu ivona bo, “Kovi yana. Taku gisina kava ma ana pisi. Ma ana pipisi na wawaya i miiya ana kavarapiyei da i bera nununai na nakanani ani miiyesi. f  13 Taku na Alfa ma Omega, taku na maghinona ma turina, bera karena ma bera damona.” g 

14 Iyavo kava kii gara dadabusi ikowataweyana na God ini biibiinisi ma ini vaghinei da nani kwanatuna vovokaravina matuketinai ina rui ma yawasa kiina amena ina kanikani. h  15 Ma kwanatuna kupunai na kukou. Ti na iyavo kava ikiirapu, ikasiko, eyapuyapune, ma iyavo kava ipekana wapawapa, ekiikiivunuwa, ma sawara yamoyamonisi evovokavakavarisi. Ma bade iyavo kava ibero ma i kayowana da vibero yawasina kamonai ina makai, na kudubisi ina gudupotesi da nani kwanatuna garina kupunai ina makai.

16 “Taku Yesu aku aneya avi yonei ioru tam kurim da weni sisiyisi vitumaghana wawayisi kurisi kuti yonayonei. Taku na David ramramna ma tupurereghina. Taku na maratomtom tughuwarina, yaghara kiikiina.” i 

17 Kanuma Vovokaravina ma Sipu Gegeyina kawana ikwatu bo, “Kepisi.” j 

Ma iyavo kava weni sisiyisi kona viviyanei na tami bade kovona bo, “Kepisi.”

Ma iyavo kava kaiyosi irugavovori na ina pisi. Ma iyavo kava ekayokayowei na yawasa vusirinai okowa inuma ma ke ina gimari.

Sisiya turina.

18 Tami iyavo kava God ina sisiya weni bukana kamonai koiyanei na kokitaruvimi, iyamna taku Jon avonavonemi da iyai tam am nota ku tepana kuna terei da iyamna kuna kiiviwapawapai na weni bukana kamonai gubaga ma nuwapoya bogii ma bogiiyai isisiyei na God ina viiya da kam kovogha ku tepana ini taratanei. k  19 Ma mikeda sisiya sago kava weni bukana kamonai kuna votawei na kwanatu vovokaravina kamonai God kam gawara ina votawei ma bade ke ini vaghinei da yawasa kiina amena kuna kani. Kwanatu vovokaravina ma yawasa kiina na weni bukana kamonai isisiyei.

20 Wawayina evonavona kiiyaragha da sisiya kudubina weni bukana kamonai isisiya na vonavaghata, na tuna evonavona bo, “Vona bubuna da gisina kava ma ana pisi.”

Amen. Kepisi, Bada Yesu.

21 Ainowi Bada Yesu kurina da ina agabiibai tami God ina wawaya kudubimi gwabimiyai ina makai.

Copyright information for `PWG