a16:3Apos 18:2
c16:21Apos 16:1
e16:23Apos 19:29; 1Kor 1:14; 2Tim 4:20

Romans 16

Pol vikiikiiwa ivonatawei.

Aku kayowana da ani akovimi da novuta Pibi na wavine biibiina. Tuna na vitumaghana damsi Senkiriya kwanatunai kubiisi ebigabiga bubuna. Vitumaghana damta na tikitavivirana, tuna kubiine ainowi kurimi da novuta Bada avanai kovi kiikiiwei ma korutini ami ku numa. Ma aviyavisina ina kayokayowei na kovi vitei, iyamna ita wawaya ipeyari ikoyagha bubunisi ma taku yavata nakanani ikoyaghiku.

Pirisera da Akwila aikiikiiwesi. Ivi ruwa na Yesu Keriso kubiine kabiga patapata, a  ma ti damsi ivere meyesi da berona imiiripotei kubiiku ma ivi yawasiku da taku karako weni nakanani. Ke taku kava ata vivinuwabiibai da ivi yawasiku ma bade vitumaghana wawayisi kupuna damsi kamosiyai yavata inuwabiibiiyesi. Vitumaghana damsi mara nonowa Pirisera da Akwila i ku numa ikiidaburana vokavakavara kubiine na ti yavata aikiikiiwesi.

Ma Eisiya dobuna ina parata kamonai Epenetas ivi nao Keriso ivi tumaghanei ma tuna yavata aikiikiiwei, tuna na aku tomo biibiina.
Ma Meri yavata aikiikiiwei, tuna kubiimi ibiga kirakai. Dam turaturaku Andronikas da Jiuniyas yavata aikiikiiwesi. Ti yavata ku gabura iterekai da kamakii patapata. Ma aposol ti damsi na iakova bubunisi, ti na ivi Keresiyana yaghina ma taku murisiyai.

Aku tomo Ampiriyatas yavata aikiikiiwei, Bada avanai kavi nuwaviinana. Kwinaku biibiina Sitakis ma aku tomo Ubanus tuna Keriso kubiine kabiga patapata na ivi ruwa yavata aikiikiiwesi. 10 Apeles yavata aikiikiiwei, tuna nuwapoya kamonai ma patana da Keriso ivivi tumaghanei da imiirikikina. Ma Aristobulas ina rakaraka yavata kudubisi aikiikiiwesi. 11 Ma Herodiyon yavata aikiikiiwei, tuna ma taku na kakii dam sago. Ma Keresiyana damsi Nasisas gwabinai na bade aikiikiiwesi.

12 Tripena ma Triposa ti ivi ruwa Bada kubiine ebigabiga bubuna na aikiikiiwesi. Ma bade aku wavine biibiina Pesis, tuna biga ghamana Bada kubiine eberaberai na tuna yavata aikiikiiwei. 13 Ma Rupas yavata aikiikiiwei, tuna Bada ivinei da ina bigabiga. Ma bade ina maduwa aikiikiiwei, tuna nakanani ma aku maduwa vaghata. b  14 Turaturata Asinkritas, Pelegon, Hemes, Patrobasi, Hemas ma Keresiyana varevaresita yavata emakamakai na kudubisi aikiikiiwesi. 15 Ma Pilologas da Jiuriya ma bade Neriyas novuna yavata ma Orimpas, ma vitumaghana damsi gwabisiyai na kudubisi aikiikiiwesi.

16 Kamomiyai kovi kiikiiwavivirana. Weni dobunai vitumaghana damsi i kwanatu ma i ekalesiya bogii ma bogiiyai na peyarisi i vikiikiiwa evonavonatawei kurimi.

Sisiya turina.

17 Turaturaku, aku sisiya bagibagina atereterei kurimi na weni. Kokitaruvimi, iyamna vibeyebeyena vaghata koviiya ma kamomiyai wawaya viya vibeyebeyena vibero eberaberai da koitaghegheyana. Ti na iketagudugudu da kamomiyai wawaya viya i vitumaghana ina voterei. Koveruvuvuresi. 18 Iyavo kava nani berasi eberaberai na ke ita Bada Keriso ita bigebigei, ti mani i kayowanai eberaberai. Sisiya kiikiimatanisi eberaberai, ikaetina da wawaya ke notamagura gwabisiyai na i nota evowavowai. 19 Kerisiyana peyarisi iakovi da Yesu varana biibiina kovovokikini, tuna kubiine ainuwabiibii kirakiiyemi. Aku kayowana da kona nuwagiura kiimatana da biibiina kavakava kona berai, ma nuwanuwami yagharina kavakava da ke sago berabero notasi gwabimiyai. 20 God nuwanuba everevereta na ke mara gurina ma ina rewapanai Seitan ina ghegavovori ma ku kae gaburimi ina terei.

Ainowi Bada Yesu kurina da ina agabiibai gwabimiyai ina makai.

21 Ita tomo Timoti weni dobunai yavata kabigabiga na tuna ikiikiiwemi. Ma Lusiyas, Jeison, da Sosipata bade ikiikiiwemi. Ti ma taku kakii dam na sago. c 

22 Ma taku Tetiyas, aviyavisina Pol isisiyei na agirugirumi, taku bade kudubimi aikiikiiwemi.

23 Ma bade Gayas ikiikiiwemi ma taku Pol na gwabinai amakamakai. Ma Keresiyana peyarisi mara nonowa ikiidaburana ina ku numa. Weni kwanatuna badana ghamana Erastas tuna kwanatu kana mani kana koyakoyagha, ma bade kwinata Kwatas na ivi ruwa ikiikiiwemi.
16:24Mara katamaninai giruma damsi peyarisi ves 24 ke ita terei. Ma viya na weni nakanani igirumi: ‘Ita Bada Yesu Keriso ina agabiibai gwabimiyai ina makii nonowa. Amen.’
,
e 

Pol nipowanai ma vokavarai igudui.

25 Kudubita God tavokavakavari! Yesu Keriso varana biibiina adimadimei na tuna sisiyina kubiine God ina berimi da kona miirikikina. Weni varana na vonavaghata ma namadani kava gavugavunai imakamakai. 26 Ma karako ikikava peroperoveta ivi sisiyei i giruma kamonai na God ku debadebana iterekiibuwei. Ma dam ma dam nuwanuwasi itinavirei da nani sisiyina gavugavuna itakovi, iyamna God makamakii nonowina sisiya bagibagina iterei da nakanani ita tupuwa da kupuna damsi kudubisi iti tumaghanei ma ita votekatekei.

27 God na sago kava ma nuwagiura na tuna kava rapenai. Ma Yesu Keriso avanai tavokavakavara nonowei da kana kadara ina rakata! Amen.

Copyright information for `PWG