Acts 24

Paulo yo tau hegiluna wa Peliki matanaena se lauhetala

Mayadai haligigi mulidi yena kabo taukaitalasam saesaena Ananiya, yo Dius babadadiyao hekadi, yo yodi tauhedehedede sonoga tamowaina Tetalusi maiyadi se dobi Sisaliya gabana Peliki unai, na Paulo kaba hegiluna hedehedededi maudoidi se hedehedededi. Yodi koigogo wa unai Paulo se yoganeiyama kana hedehedede wa Tetalusi ye hedededi ye wane, “Yauwedo lakilaki Peliki! Yom woyawoya sibasibadi ta udiyedi meta miya daudaumwali yo namwanamwa ka lobaidi yoma magai ta tehanao maudoidi udiyedi. Yom hineli namwanamwadiyao ta udiyedi kowa hekasisim ye laki kalili, unai ka lautoki kaliliyeigo. Nige ka henuwa bena ka hemode kaliliyeigo, na taba mahana kubwakubwana mo unai ku lapulaoma yoma hedehedede ta unai. Teina tamowai ta ka lobai meta iya Dius tamowaidiyao teha maudoidi udiyedi yodi miya tau hepilipilina yo kadi hetalagegagega taukabihaina, yo hinage Nasaleta tamowaina hesau tau hemuliwatanina bodana tauwoyaina hesau ede iya. Yo hinage dagela tamowaidi ye woyahemwalaedi Dius yodi Yaubada kaba tabaꞌohiuna numana unai, ede numa tabuna wa ye hebiki. Unai iya ka hai.
24:7 Kulikuli bayabeyadiyao maudoidi kalina Giliki unai se kulikulidi meta nige udiyedi lausoisoi 7, na hisa mo lausoisoi 7 se kuli:“…ka hai bena ka helauhetala,7na iyala kapinana Lisiyasi ye laoma ede kalimaiyena tamowai ta ye hai na ye hetamali dobiyeiyama kalimwai.8Na tauhegiluna hinage ye hededelau udiyedi bena se dobima.”
Taba iya ku henamaiyei kabo yoma kaba hegiluna hedehedededi maudoidi ye hededehemasalahadi kalimwai.”

Kaba koigogo wa unai Dius tamowaidiyao maudoidi se talam na se hedede gogoi se wane, “Teina hedehedede maudoidi ta meta mamohoidi.”

10 Unai gabana wa nimana ena Paulo ye koihai ede ye tolo ye hedehedede ye wane, “Yauwedo lakilaki Peliki! Kabina ya kata meta bolimai lohaloha teha Yudeya tamowaidiyao yodi lauhetala kowa taulapuhekasadi yo tautolehedudulaidi. Unai ma nuwabayaogu ya bom yogu ya tolo na ya hedehedede. 11 Lahinaidi ya sae Yelusalema na yogu nuwatu bena numa tabuna unai ya tabaꞌohu Yaubada unai. Yogu huyalage mayadaina meta gonowana ku hemamohoiyei. Mayadaina ne unai ye laoma teina meta mayadai saudoudoi-labui (12) mo ta laugabaedi. 12 Tauhegilugau ta nige sola se kitagau numa tabuna unai tamowai hesau maidagu ka haikawayagala, yo sunago udiyedi o magai lakilakina maudoina ne unai nige boda kadi hetala gegagega ya ginauli. 13 Yodi kaba hegilugau hedehedededi maudoidi ta meta nige yodi kaba hemamohoiyedi. 14 Na ginauli kesega se hedede wa meta mamohoi: Kama kulutubu yodi Yaubada yogu tabaꞌohuina unai meta Yesu tau hemuliwatanina yodi kabikabi yo yodi laulau ya hemuhemuliwatanidi. Kabikabi yo laulau ta se hedede meta nige se dudulai. Na yau meta hinage Dius yoma laugagayo yo Peloweta yodi kulikuli maudoidi ya kawamamohoiyedi. 15 Yaubaba ya sunumaei yo ya kawamamohoi kaliliyei meta tausunuma yo nige tausunuma kabo boita unai ye hetolouyoidi, doha hinage siya Yaubaba se sunumaei yo se kawamamohoiyei. 16 Unai ya kaipate bena yogu nuwanuwatu yo yogu miyamiya ya miyahedudulaidi Yaubada yo tamowai matadi yena.

17 Bolimai hisa yogu miyasuwala mulidi ne unai ya uyoma meta kainauya yo moni ya baheidima Yelusalema bena deha tamowaidiyao ya saguidi yo hinage yogu kaitalasam ya ginauli Yaubaba unai. 18 Na huyana tauhegilugau ta se kitagau numa tabuna unai meta lauheꞌaꞌa kabikabina ya ginaulidiko. Na menai nige boda hesau maiyaguwao, yo nige tamowai hesau maidagu ka haikawayagala o ka hetalagegagega. 19 Na Dius tamowaidiyao teha Eisiya unai tau laoma siya menai tau kitagau ede. Ena siya inai taba se toloma, na ena saha hesau unai se hegilugau kabo se hededehemasalaha kalimyena. 20 O taba tamowai ta ku henamaiyedi, huyana Sunedeli unai se helauhetalagau meta yababa saha se lobai kaliguyena. 21 Na nuwana ginauli kesega mo ta debanaena se hegilugau meta matadi yena ya tolo na ma kalina lakilakigu ya wane, ‘Tauboiboita kabo boita unai se tolouyo, unai ede kwa helauhetalagau ta!’”

22 Na Peliki Yesu tau hemuliwatanina yodi kawamamohoi kabina ye kata, na iyamo koigogo wa ye hekaiyawasi na ye wane, “Lisiyasi iyala kapinana ye lagema kabo yom lauhetala te ya hineli uyoi.” 23 Ye hededelau sentuliyo hesau unai ye wane, “Paulo ku lae na kwa kitahetete namwanamwaei, na gonowana ye sae yo ye dobi numa kalona wa unai, yo hinage kana kahao kabo se laoma se kita na ena ginauli saha udiyedi ye deha kabo unai se sagui.”

24 Mayadai hisa mulidi yena Peliki ma mwanena Dulusila — iya Dius waihuina hesau — se laoma se lage Heloda yona kabamiya numana wa unai. Na kalina se hetamalilaei na Paulo se woyaiyama na Yesu Keliso kawamamohoiyena yodi ye hedehedede. 25 Na Paulo ye hedehedede meta yoda miyamiya bena se dudulai Yaubada matanaena, yo tabu gadosisi yababadiyao yo nuwatu yabayababadiyao ta hemuhemuliwatanidi, yo ye hededehemasalaha meta lauhetala lakilakina sola kabo ye laoma. Peliki hedehedede wa ye lapuidi meta ye siliyata yo ye matausi kalili, unai ye wane, “Paulo, nabada, na ku lau. Na ena solasola hesau ya lobai kabo ya hedede ku uyoma.” 26 Peliki yona nuwatu meta Paulo kabo moni lakilaki ye mosei na ye yailigabaei, unai huya maudoina Peliki ye hedede Paulo ye lau na maiyana se hedehedede.

27 Bolimai labui mulidi yena Peliki teha Yudeya yodi gabana wa meta Posiyas Pestas unai se helauhedamai. Na Peliki ye henuwa bena Dius tamowaidiyao nuwadiyao ye henamwadi, ede numa tutugudu wa unai Paulo ye laugabaei.

Copyright information for `SBE