a(Aisaiya 6:9,10)

Mark 4

Tuma tauhesuhesulu palabolena

(Mataiyo 13:1-9; Luke 8:4-8)

Na Yesu ye uyo Galili Gabwana dedekana unai na ye lauhekata. Boda lakilaki se lagegogoma iya unai, ede Yesu waga hesau unai ye gelu, na ye kahaisuwala musamusana, na boda wa nagali unai se totolo. Ginauli gwaudi ye hekatadi palabole udiyedi. Na yona lauhekata wa unai ye wane, “Kwa lapulapui! Huya hesau tauhesuhesulu ye lau witi tumadi ye hesuludi yona koya unai. Na hekadi se bekudobi keda kalona wai, na manuwa se laoma ede se kaidi. Hekadi se bekudobi debadeba wai na nige bayaona se kini. Mahana ye dalasae na ye sina hewowoyadi, matawuwuna bwatano ye yaloyalo na lamdi nige se dobi kalili. Hekadi se bekudobi gwaligwali luwadi wai. Gwaligwali kabo se kini puluhidi, ede tuma wa nige se kini namwanamwa unai nige se kaniyo. Tuma hekadi hinage se bekudobi bwatano namwanamwana unai, na se kini yo se kaniyo: Witi kewa kesega kesega hekadi kaniyodi badodi 30, 60 o 100.” Na Yesu ye hededelau udiyedi ye wane, “Kaiteya beyana unai ye lapui bena ye lapu namwanamwaei.”

Yesu palabole yona hepaisowadi wuwuna ye hemasalaha

(Mataiyo 13:10-17; Luka 8:9-10)

10 Boda wa se tatagwaligwali mulina ne unai yona hekahekatao saudoudoi-labui yo tamowai hekadiyo Yesu maiyanao se tuligogoi, na palabole kaniyona se henamaiyei iya unai. 11 Na Yesu ye hededelau udiyedi ye wane, “Yaubada yona basileiya ginauli wadawadamdi kabo ya hemasalahadi kalimiu wai. Na kaiteya Yaubada yona basileiya dagelana wai, kabo palabole mo udiyedi ya hekatadi, 12 unai

‘se kitakita,
na taba nige se kitalobai,
se lapulapui,
na taba nige se lapulobai,
madai nuwadi se buidi,
na Yaubada yodi yababa kabo ye nuwatugabaedi.’” a 

Yesu tauhesuhesulu palabolena ye hemasalaha

(Mataiyo 13:18-23; Luka 8:11-15)

13 Na Yesu ye hededelau udiyedi ye wane, “Ena palabole ta nige kwa nuwatulobai, kabo idohagi na palabole hekadi ne hinage kwa nuwatulobaidi? 14 Tauhesuhesulu Yaubada yona hedehedede ye hesulu. 15 Tamowai hekadi nuwadi doha keda, tuma se bekudobi unai. Yaubada yona hedehedede se lapui, na mahanana ne unai diyabolo ye laoma ede hedehedede wa ye haigabai. 16 Tamowai hekadi nuwadi doha debadeba, tuma se bekudobi unai. Hedehedede wa se lapui yo se hai ma nuwa namwanamwadi. 17 Na hedehedede wa nige ye dobi nuwadi wa udiyedi, unai ede yodi sunuma se basabasa. Na huyana pilipili hesau se hekalo, o tamowai siya se subudi hedehedede wa debana wai, ede yodi sunuma wa se kaiyawasi. 18 Tamowai hekadi nuwadi doha gwaligwali, tuma se bekudobi udiyedi. Siya hedehedede wa se lapui moei. 19 Na kaiyaulina ta nuwamodena yo gogo badobado nuwadi se kaidi yo ginauli hekadi gadosisidi udiyedi hedehedede wa se kini puluhidi na nige ye kaniyo. 20 Na hekadiyo nuwadi doha bwatano namwanamwana, tuma se bekudobi unai. Hedehedede wa se lapui na se kawamamohoiyei, kabo se kaniyo
4:20 kabo se kaniyo: Teina hedehedede ta kaniyona bena ku nuwatulobai Galatiya 5:22-23 ku hasili.
: hekadi 30, 60 o 100.”

Lampa palabolena

(Luka 8:16-18)

21 Na Yesu yona hedehedede ye tubei ye wane, “Taba lampa ta gabu, kabo gulewa unai ta buikasini o kabakeno gunina unai ta tole? Nige! Ta tolesae kabatolena unai! 22 Gonogonowana doha hinage Yaubada yona basileiya ginauli maudoidi wadawadamdi kabo ye hemasalahadi, ginauli maudoidi Yaubada ye toletolewadamdi kabo hinage ye tole hemasalahadi. 23 Kaiteya beyana unai ye lapui bena ye lapu namwanamwaei!” 24 Na kabo ye wane, “Saha kwa lapui ta bena kwa lapu namwanamwaedi. Ena kwa lapulapui namwanamwa, kabo kwa nuwatulobai namwanamwaei. Na kabo Yaubada yomi sibasiba ye helakidi. 25 Kaniyona ede kaiteya yogu lauhekata udiyedi ye lapulapui namwanamwa, kabo yona sibasiba ye helaki. Na kaiteya nige ye lapulapui namwanamwa, saha gagilina ye lapulobaiyako kabo ye nuwaluluhiyei.”

Tuma yona kinikini palabolena

26 Na Yesu ye wane, “Yaubada yona basileiya meta doha teina: Tamowai hesau witi tumana ye hesulu bwatano unai. 27 Boniyai huyadi ye keno, na mala ye tom ye tolo, meta nige ye mode na tuma wa se bom se kini kabo se tubu. Tuma yodi kinikini meta tamowai wa nige ye nuwatulobai idohagi. 28 Na bwatano ye bom ye hekinidi: se kini baguna, kabo se kini lakilaki yo se kaniyo. 29 Witi wa kaniyodi se suna, tamowai wa kabo ye bolidi, matawuwuna ede masuli wa ye lage.”

Kaitabu tumana palabolena

(Mataiyo 13:31-35; Luka 13:18-19)

30 Yesu ye wane, “Yaubada yona basileiya kana kao kabo idohagi yoda hedehededena? O palabole saha unai kabo ta hekaigonogonowaei? 31 Basileiya ne doha kaitabu tumana.
4:31 Kaitabu tumana: Isalaela unai kaiwa hesau kaniyona na tumana gagilidi meta se kumakumaidi yodi koya udiyedi. Kalina dimdim yena kaiwa ne tumana hesana ede ‘mustard seed’. Saliba unai teina kaiwa ta hesana mustard meta nigele, unai kaiwa ‘kaitabu’ ta hepaisowa heyaheyasoni ta unai. Mata wuwuna kaitabu kaniyona tumadi se gagili yo manuwa se henuwa kaiwa ta unai se towa na se kaiyawasi.
Ye gagili kalili tuma maudoidi udiyedi.
32 Tumana ye bekudobi bwatano unai, kabo ye kini lakilaki doha kaiwa hekadiyo. Lagana lakilakidi se kini, na manuwa kabo se towa yo se kaiyawasi loguloguna ne unai.”

33 Yona lauhekata maudoidi udiyedi palabole unai ye hekatadi yodi nuwatulobai gonogonowana unai. 34 Palabole mo ye hepaisowadi yona lauhekata udiyedi. Na yona hekahekatao maiyanao se bom mo, kabo palabole kaniyodi wa ye hemasalahadi udiyedi.

Yesu wowoli ye hedede hedaumwali

(Mataiyo 8:23-27; Luka 8:22-25)

35 Meimeilahina ne unai, Yesu ye hededelau yona hekahekatao udiyedi ye wane, “Ta kawasilau halitana kawasi ne.” 36 Na tamowai maudoidi wa se laugabaedi, na Yesu yona hekahekatao waga wa unai hinage se gelu na Yesu maiyanao se lau, yo waga hekadi hinage se hemuliwatani. 37 Kabo yaumai lakilakina ye lotalu yo bagodu se iniꞌinisae waga wa kalona unai, na musamusana kabo se yoli.

38 Na Yesu waga yiuna wa unai kunuwa unai ye kenokeno. Iya se hanoi se hededelau unai se wane, “Tanuwaga! Ku nuwatui meta kabo ta mwaloi e nige?” 39 Yesu ye tolo ede ye hededelau yaumai yo bagodu wa udiyedi ye wane, “Kwa kaiyawasi yo kwa daumwali!” Kabo yaumai yo bagodu wa se kaiyawasi na ye daumwali kimkim. 40 Na ye hededelau udiyedi ye wane, “Idohagi to kwa matausi? Nuwana nige yomi sunuma?” 41 Siya se siliyata yo se matausi kalili, unai se henahenamai uyoidi, “Teina tamowai ta tamowai sahasaha? Yaumai yo bagodu iya se kawakabiyei!”

Copyright information for `SBE