a6:1Epe 6:5
b6:2Plm 16
c6:3Gal 1:6-9
d6:52Ti 3:8, 4:4; Tit 1:14
e6:6Pil 4:11-12; 1Ti 4:8; Eba 13:5
f6:7Iop 1:21
g6:10Epe 5:5
h6:112Ti 2:22
i6:121Ko 9:25-26; 2Ti 4:7
j6:13Ioa 18:36-37
k6:15Apa 17:14
l6:17Luk 12:20-21
m6:19Mat 6:20
n6:211Ti 1:6; 2Ti 2:18

1 Timothy 6

Arabitbit ur singin bos tám ruruna di kis án toptop

a Koner a tám ruruna má a kis án toptop, koion na hol agengen i kán konom. Auh, na tari rumrum uri narsán sang mai kunlán bál. Má ngorer kápnate mon i kándi te ngat suri para bengtai ngisán ái Káláu má aratintin er git ruruna on. b Má ngo konom kán tám toptop er a tám ruruna mul, a támin muswan ngo diar arwat no i mátán ái Káláu. Ái sár tám toptop koion na hol agengen i kán konom má kápnate lala rumrum on kabin ngo diar aratuán i Karisito. Kápte. Mái sár na longoi ngoro minái. Ngo ákte him rakrakai singin tungu, ki onin na lala him taladeng singin. Na longoi ngorer kabin ái tiklik mam kán konom, diar no diar tám ruruna i Karisito má diar lu armámna arliu i diar. Minái á tan táit una lu atintini bos tám ruruna mai má arakrakai i di suri da longoi.

Bos angagur án tám aratintin ​ má nemnem suri pirán tabal

c Iakte parai be táil sur rung er kándi aratintin kápate muswan. Kápate sormángát mai aratintin si kángit Konom Iesu Karisito má mai aratintin er a tángni matananu suri da talas uri nemnem si Káláu. Ngo tekes a lu longoi matngan aratintin ngorer, ki ái a tubán apakta pasi sang ngo a tám mánán, mái sár kápate talas muswan uri aratintin er a aratintin mai. Ái a tar kunlai kán liu suri arkipkip mai worwor má sisdoi kán mánán suri sálán tan kuir worwor a aratintin mai. Matngan tatalen ngorer a lu apturi bálsák uri mánán káián lite, mák lu apturi kis arsagil uri toltolom boh, má ák mon mul i worwor án ot bilingnai kálámul má hol sáksák ur on, d má ák apturi mul i mos arliu i rung a sák i kándi hol má muswan a bokoh pas má alar di.

Mái rung minái di lu saliu mai kándi aratintin pasi pirán tabal má dik hol on ngo ái á sál suri kip minsik.
e Di hol on ngo matngan sál erei, ái á sál suri kipi marán táit má dáng konom. Mái sár ngo una tar kunlai kam liu suri mur i nemnem si Káláu má uk gasgas suri dánih ái Káláu ákte tari singim, ki erár ukte atur páptai á minsik muswan si Káláu. f Má ngorer suri dáh gita lala kákir suri minsik án naul bim? Pákánbung ngo git páng uri naul matmatngan pokon, kápte git páng tiklik mam tekesá táit. Má pákánbung ngo gita mat, káp gita te kip tekesá táit tiklik mam git. Má uri liu main i naul bim, ngo a mon i ángit namnam má dan má ák mon i kángit sulu má rum, ki gita laes sár suri, má koion gita kon sur te táit mul. Bos kálámul di lu lala kákir ngo da konom, má ngorer dik bál tar di suri longoi toltolom sápkin tatalen. Rung minái di kai i pidir er kápdite arwat suri paska palai alar di sang. Di risgos ngo na mon i kándi pirán tabal, má namur kándi sápkin nemnem erei na long bengta di sang. 10  g Kabin nemnem suri pirán tabal, ái á nirwán á toltolom sápkin. Te kálámul di lala kákir suri pirán tabal, ki dikte han pas alari kándi ruruna, má ák tubán atabureng i di sang.

Inau uri narsá Timoteo

11  h Mái sár á iáu una lu táu alari tan ngorer kabin á iáu táir ái Káláu. Áá, una táu alari tan tatalen er, má una tiptipar namurwai bos lain tatalen minái:

  • na nokwan i ninsim,
  • má una tar kunlai kam liu uri narsán ái Káláu,
  • má una lu ruruna on,
  • má una mámnai tan kálámul,
  • má una arabálbál mai matananu,
  • má koion una puplir.
12  i I bungun máhán, tám arup káp a tini puplir. Má á iáu mul, koion una puplir. Una ruruna pagas i Káláu, má una mák ilmi mul ngo kaiam má á liu muswan er a kis áklis. Liu minái ákte tari singim ái Káláu, má una lu áslai sang i bosbos bung. Tungu sang ái Káláu ákte kilkila pas iáu ur on á liu minái i pákánbung er iáu apapos i mátán matamata ngo iáu ruruna i Karisito.

13  j Iau sung iáu ngo una utngi kam oror. Una oror i mátán táil ái Káláu, koner a káplabin á liu, má i mátán táil ái Iesu Karisito, ái koner a apapos mai muswan suri sang i mátán ái Pontiás Pilato. 14 Iau inau i iáu suri una mur kuluknai tan arabitbit iakte tari singim, má ngorer kápte kes na mon i kán ngat suri na para bengta iáu. Una lu taram i tan táit min nák han átik i bung kángit Konom Iesu Karisito na elkaleng on. 15  k Kán elkalengleng erei ái Káláu ákte puti pákánbung suri na tur soura on.

Ái Káláu kán matananu di lu árngai,
má ái masik a pinsokon tan táit no.
Ái á kabisit káián tan kabisit
má Konom Sorsorliu.
16 Ái masik sár a mon i kán rakrakai suri kápnate mat.
Má talas erei a liu imi lolon ái Káláu,
a tuan talas taladeng má kápte kes a arwat suri han pátmi.
Mátán kálámul káp a tini mák Káláu,
má kápte kes a arwat suri na mákái.
A kuluk ngo matananu no da tari rumrum uri narsán
má da para aposoi kán nagogon ákáklis kápnate wat.
A támin.
17  l Una rakrakai suri parai si di á bos tám ruruna di konom mai marán táit til main i naul bim suri koion da atri kándi ruruna i minsik má butbut mai, kabin minsik er a sangsangar i musráh. Ái sár da atri kándi ruruna i Káláu, koner a tabar git mai lalain táit mák lu káng ungleu má gitá bes mai. 18 Má una rakrakai suri parai si di ngo da lu tángni tan kálámul. Rung er dikte konom má di káng mai pirán tabal, da lu longoi mul i bos lain him. Da lu kákir suri támri bos kálámul má da lu bál tari táit singin tan lite. 19  m Ngo da longoi matngan tatalen minái, ki da ungni sang i kándi omobop, má omobop erei ái á kábutkis ur on á liu namur. Má ngorer da otoi matngan liu er a kis áklis.

20 Timoteo, bos táit er ái Káláu ákte tari singim, una lu ololoh timani má una lu him kuluk mai. Koion una patap mam rung er di lu nguruk mai armongoh kalim má worwor a lite alari lain arbin. Rung minái di kaiang pasi ngo kándi aratintin a támin, mái sár a kápte. 21  n Te á kálámul dikte ruruna i bos aratintin erei má ngorer dikte han pas alari kándi ruruna.

Ái Káláu na tangan gam no.

Copyright information for `SGZ