a6:2Ais 49:8
b6:52Ko 11:23-27
c6:61Ti 4:12
d6:92Ko 4:10
e6:131Ko 4:14
f6:14Epe 5:11
g6:16Him 26:12; 1Ko 3:16
h6:17Ais 52:11; Apa 18:4
i6:182Sa 7:14; Ier 31:9

2 Corinthians 6

Kabin gim him tiklik mam Káláu, ngorer gimá inau i gam ngoromin. Gamáte kipi artangan si Káláu. Kái má gama omlawai kán artangan ngorer i táit bia sár. a Gim inau i gam ngorer kabin ái Káláu ákte parai ngoromin i kán pinpidan,

“Ákte arwat má pákánbung án araliu, ngorer iak longra pasi kam sung.
Iak tangan iáu i pákánbung er.”
Mákái, minái má pákánbung a eran ái Káláu suri tari kán artangan! Minái má pákánbung án araliu!

Toltolom taun ​kápte a bangbang kári ​lain tatalen

A lala bop i bál gim suri ngo káp gima te long te táit er na tokoi bál kálámul má nák sák i bál uri gim, má ngorer nák su bahin uri lain arbin sur Karisito er gim arbin mai. Kápte gim nem i tekes ngo na para sáksáknai kángim him sur Karisito. I bos táit no gim áslai, kángim liu a aposoi ngo gim toptop si Káláu. Má gim inngas tar gim mai tur dik pagas i toltolom táit a long sáksákna gim ngorer i taun gim lu kipi, má rangrangas gim lu áslai, má rogorogo a lu som kusai kángim him. b Dikte rapis sáksákna gim, má dik lu kabat pas gim uri rumán batbat kalar, má dik tur kaul gim i katbán lala ororok. Gim lu lala rakrakai mai him, má kápte gim lu kip timan te boptin i libung, má gim lu áslai matpám mul. c I pákánbung gim áslai bos táit er, kángim hol má kángim tatalen a pilpil, má gim talas uri nemnem si Káláu má gimá mur on. Má gim lu bál konmi sápkin tatalen di longoi mam gim, má gim lu kuluk mam di ái rung di sák mam gim má gimá lu mámna di má tangan di mul. Má him gim lu longoi, gim lu longoi mai artangan sár káián Tanián a Pilpil, má gim lu longoi mai armámna muswan. Má gim lu arbin mai lain arbin er midán muswan ái Káláu, má gim lu him ngorer kabin i rakrakai si Káláu a kis i gim. Má gim lu top i tatalen a nokwan ngorer i unan tili mingin i gim má kápsil tili káisán i gim. Te di tátngai ngis gim, má te di para sáksákna gim. Te di ot bilingna gim, má te di para agas gim. I bos worwor no, gim lu parai muswan, mái sár te di parai uri gim ngo gim bos tám angagur. d Ái Káláu ákte tarwa gim mai midán, mái sár te kápte di ruruna i gim. Gim lu balbal mákmák arsuar mai minat, mái sár gim liu kuluk. Di lu rapis sáksákna gim, mái sár kápte di rapis bing gim. 10 Gim lu kis án tinang, mái sár gim gasgas pagas mul. Gim bos maris án kálámul, mái sár gim kipi arasosah ur singin marán. Main i naul bim káp kángim te táit, mái sár kabin gim káián ái Káláu, bos támin táit no a kángim sang.

11 Á gim gimáte para noi táit a kis i bál gim ur si gam, gam á rang buh gim til Korin. Bál gim a káng ungleu mai armámna uri narsá gam. 12 Kápte gim sas kalengnai kángim armámna alar gam, mái sár á gam gamáte hol pala gim. 13  e Ina worwor uri narsá gam ngoro gam á rang natung. Gim mámna gam, má minái gimá sung gam ngo gama kos kalengnai mai kamu armámna uri narsá gim.

Tám ruruna ​koion na patap mam rung ​kápte di ruruna

14  f Koion gama arkabat mam rung kápte di ruruna i Karisito. Kabin kápte a arwat ngo koner a lu mur i tatalen a nokwan ngo na kis án ararguna mam koner a lu hol páksi sápkin ami bál. Má kuron má talas, kápte diar lu kis tiklik. 15 Ngádáh, diara sormángát arliu i diar ái Karisito mái Satan? Auh, kápte. Má ngádáh suri tám ruruna mái koner kápte a ruruna? Diara tur talum? Kápte. 16  g Ngádáh, a arwat ngo tekes na oboi angagur án káláu i rum er git lu lotu on uri narsán Káláu muswan? Auh, kápte sang. Kabin git á rumán ái Káláu koner a liu áklis, ngorer kápate kuluk ngo gita kipi uri katbán i git á angagur án káláu. Ái Káláu ákte parai ngo

“Á iau ina longoi niang i katbán i di
má inak liu tiklik mam di.
Á iau masik ina kándi Káláu,
má á di da matananu kaiak suri inak lain ololoh i di.”
17  h Mái Konom a parai mul ngo,

“Má ngorer koion gama patap turán bos tám sápkin,
ái sár gama kis arsagil alari kándi sápkin tatalen.
Má koion gama arat i pokon kalkalung kándi ái rung di lu longoi táit iakte tur kári i gam,
má ngorer inak sormángát pas gam.”
18  i Má kes mul á worwor erei i pinpidan si Káláu, a parai ngo

“Á iau ina Kák gam,
má á gam gama rang natung káláu má rang natung tahlik.”
Erei á worwor a parai ái Káláu Tám Rakrakai Sorsorliu.

Copyright information for `SGZ