a3:1-2Lál 12:7; Eba 4:14, 7:26
b3:5Lál 12:7; Nag 18:15-19
c3:7-11Sak 95:7-11
d3:8-9Kal 17:7; Lál 20:2-5
e3:11Lál 14:21-23
f3:15Eba 3:7-8
g3:16Lál 14:1-35
h3:171Ko 10:10

Hebrews 3

Ái Iesu a pakta si diar ái Moses

a Má gam á tan tám ruruna, gam rang tuang, mái Káláu ákte kilkila pas gam má iau mul suri githat buhán no githata atur páptai tan lain arasosah ái Káláu na tari si git á kán matananu. Má kabin ái Káláu a tarwa Iesu suri tangan git, ngorer gama hol kebepta Iesu, koner git lu para aposoi ngo a apostolo si Káláu má kángit tám osmapak táil mul. Ái Iesu a ngorer i Moses. Ái Káláu a tari him si Moses suri na ololoh i mát si Káláu, mái Moses a long muswan i him erei. Mái Iesu mul ngoi. Ái Káláu a akiláng on suri na longoi matngan him er, má ngorer ák long muswan on. Áá, ái Iesu diar ái Moses diar kálik arwat, mái sár ngisán ái Iesu a sorliwi ngisán ái Moses má a pakta. A ngorer i kálámul a longoi rum. Rung di mákái rum erei di mákái ngo a lain rum, mái sár kápdite lu párngai rum sang ngo kesi toros iatung a tur. Di lu párngai kálámul a longoi á rum er. Má a ngorer mul sur Iesu diar ái Moses. Rum er mát si Káláu sang. Ái Iesu, ái á kálámul a apángái á mát er. Mái Moses kesi kálámul sár tili mát er, ngorer i torson rum. Má ngorer ái Iesu a pakta si diar ái Moses. Tan mát keskeskes a mon i kálámul pakta a kátlán i di. Mái Káláu sang ái a kálámul pakta i di no. b Má on á mát si Káláu, ái Moses a long muswan on á nemnem si Káláu. Mái sár ái Moses kesi tám arardos sár on á mát er, má tan táit er a longoi a tu tártárwán sár i hutngin kamkabat er na hut namur. Ái sár ái Karisito, ái koner ái Káláu a akiláng on mák tarwai, ái Káláu a rusan tari tan táit singin kabin ngo Natun sang. Má ngorer áng kálámul pakta i mát si Káláu, má ái mul a long muswan on i táit ái Káláu a nem on suri na longoi. Má ngo gita katkatang kuluk i kángit ruruna má ngo gita ngangai suri tan lain táit er na hut namur, ki ngorer git mul gita mát si Káláu.

Tohtohpas suri matananu kápdite mur i Káláu

c Má ngorer a kuluk ngo gama longra pasi táit Tanián a Pilpil a parai suri rang támin i git. A ngoromin,

“Ngo gama longrai kaungán ái Káláu i pákánbung minái sang,
d koion gama alaklak i bál gam
ngoro rung tungu i pákánbung di ngákngák i Káláu.
I pákánbung erei, rang támin i gam di lu kis ada i bos i pokon mau,
má dik matai mur i kak worwor.
Dikte mákái lain ninsing má tan akiláng iau lu ololoh i di mai
ák artálár mai ahat á sángul á bet.
Mái sár kápate ngoi i bál di ngo da lu mur i iau,
má ngorer dik lu tohtoh iau má dik lu soksokoi balang.
10 Má iak mákái ngorer mák lala sák i balang uri ngaul matananu erei, má iak parai ngoromin,
‘Dikte mánán i kak worwor,
mái sár di lu han tepák alar iau,
má kápdite mák ilmi táit iau longoi mam di.
11  e Má ngorer iak mos uri di má iak oror
ngo ái rung er kápte da kusak uri aunges on á malar er iau eran páksi ngo ur kándi.’”
12 Má rang buhang, gama ololoh kuluk suri koion á tekes tili gam na kis á sápkin i bál, na mák pua palai kángit ruruna má nák ilang alar Káláu koner a liu áklis. 13 Má ngorer, masmasik a mon i kamu pákánbung, gama lu arakrakai arliu i gam i bosbos bung no, suri sápkin na mák agur pas tekes tili gam má nák ilang alari ruruna muswan má nák abulbul suri na bali mur i Karisito mul. 14 Tungu i tákwái, a rakrakai i kángit ruruna i Karisito má gitá katkatang on. Má ngo kápte gita puplir on, má ngo kápte gita tánlak alari pang i arahrahi, ki ái Káláu na tari si git á tan arasosah no ákte oror pagas mai ur kángit. 15  f Mákái, a ngorer sár á worwor tili Buk Tabu er a parai ngoromin,

“Ngo gama longrai kaungán ái Káláu i pákánbung minái sang,
koion gama alaklak i bál gam
ngoro rang támin i git tungu i pákánbung di ngákngák i Káláu.”
16  g Má tara dáh er di longrai worwor si Káláu ngorer, mái sár dik abulbul on? Wa di ái rung er ái Moses a lam pas di alari balis á Aigipto. 17  h Má tara dáh er di tartar mos i Káláu i katbán ahat i sángul á bet er? Wa di sang ái rung er di longoi sápkin tatalen má kápán páplun i di ák bop sara tangrai pokon mau. 18 Má tara dáh ái Káláu a oror ur si di ngo kápdate sol uri malar án aunges ákte eran páksi ur kándi? Má á di sár mul ái rung er di abulbul i kán worwor. 19 Git mákái ngo kápdite arwat suri da kusak uri malar er kabin kápdite ruruna tus i Káláu.

Copyright information for `SGZ