a12:1Ioa 11:1, 43
b12:2Luk 10:40
c12:3Luk 7:37-38
d12:8Nag 15:11
e12:10-11Ioa 11:45
f12:13Sak 118:25-26; Ioa 1:49
g12:15Skr 9:9
h12:16Ioa 2:22
i12:23Ioa 13:31-32, 17:1
j12:241Ko 15:36
k12:25Mat 16:25
l12:27Sak 6:3, 42:5; Mat 26:38
m12:32Ioa 3:14
n12:33Ioa 19:6
o12:34Sak 110:4; Ais 9:7; Dan 7:14
p12:35Ioa 8:12
q12:36Epe 5:8
r12:38Ais 53:1
s12:40Ais 6:10
t12:41Ais 6:1
u12:42Ioa 9:22
v12:43Ioa 5:44
w12:45Ioa 14:9
x12:47Ioa 3:17

John 12

Ái Maria a pukri keken ái Iesu

Mat 26:6-13; Mar 14:3-9

a Má awon á bung sár má suri longsit án sorliu palai, mái Iesu a kaleng urami Betani i malar si Lasaro, koner a aptur kalengnai alari minat. b Má rang turán ái Iesu dikte leget i namnam suri namnam tiklik mai. Ái Lasaro, ái mul a kis iatung suri namnam tiklik mam Iesu, mái Marta mul iatung a tulus di. c Kándi tu namnam besang, mái Maria, kukun lik ái Lasaro, a kipi átbán wel a tomtom má a pakta sang i mátán. A urai wel erei uri keken ái Iesu, má namur a salsi keken mai nihun. Má polgon rum a káng mai lain tomtomon wel er. Má kesi kalik án aratintin si Iesu, ái Iudas Iskariot, koner na agur tari, a mákái ngorer mák parai ngo, “Má suri dáh á wák minái a longoi ngoromin mai wel erei? Mátán wel er artálár mai arul kán kálámul uri kesá kunlán bet. Arwat suri na sirai pasi pirán tabal, má pirán tabal er da tari singin tan sáhár!” Ái Iudas kápate lala hol pasi tan sáhár, ái sár a parai ngorer kabin a tám siksikip sang. Ái a tám ololoh pirán tabal káián ái Iesu má kán kalilik, má i te pákán sang a lu punam sál i te pirán tabal ur káián.

Mái Iesu a longrai táit er ái Iudas a parai suri wák er, má a parai ngo, “Káksiai! Wák minái na hol pasi táit a longoi mam iau namur i bung da tahun iau on. d Tan sáhár di erei narsá gam áklis, mái sár á iau káp ina te kis áklis narsá gam.”

Má marán tan Iudáiá dikte longrai ngo ái Iesu a lu kiskis á Betani, má ngorer di han uratung. Di han suri mák Iesu, má di han mul suri mák Lasaro, ái koner a aptur kalengnai ái Iesu tili minat. 10  e Má bos pakpakta kán tan tám osmapak di mákái ngorer má dik mánán pasi ngo marán Iudáiá dik su alar di sang má dik ilang sur Iesu kabin i akiláng er a longoi suri aptur kalengna Lasaro. Má ngorer má dik nem suri up bing Lasaro mul.

Ái Iesu a kusak ​ ​ urami Ierusalem

Mat 21:1-11; Mar 11:1-11; Luk 19:28-40

12 Má arasa uri kesi bung mul, má lala matananu er dikte han ur Ierusalem suri longsit án sorliu palai, di longrai ngo ái Iesu erei mái tangrai sál suri na hut á Ierusalem. 13  f Má ngorer di kotoi tan rákán báibái má dik han suri bana Iesu. Dik lu hanhan ngorer má dik lu wakwakwak ngoromin ngo, “Huihui iá! Huihui iá! Ái Káláu na kuluk mam Koner a hut mai ngisán, wa koner a kabisit káián Israel!”

14 Mái Iesu a long pasi gengen dongki má ák sukis on, má a lu hanhan tangrai sál. Má minái a long artálár pasi worwor tili Buk Tabu er a parai ngo,

15  g “Matananu til Saion, koion gama mátut!
Mákái! Erei má ái kamu kabisit,
a kis i iátin gengen dongki.”
16  h I pákánbung erei sang, kán kalilik án aratintin di mákái ngorer má kápdite talas suri tan táit erei. Má namur ngo ái Iesu ákte tapam urami, ki erár di mákmák kaleng má dik hol pasi worwor er tili Buk Tabu, má dik mák ilmi mul ngo matananu dikte longoi sang mam Iesu ngorer a parai i Buk Tabu.

17 Má lala matananu er dikte hut suri mák Iesu kabin dikte longrai arbin suri akiláng a longoi er ák aptur kalengna Lasaro alari minat. Ái rung er di iatung tiklik mam Iesu i pákánbung a aptur pas Lasaro, dik lu balbal arbin suri, má ngorer marán di longrai. 19 Tan Parisaio di mákái ngorer má dik para kalengnai si di ngo, “Gam mákái má! Káp gita te long te táit sang! Naul matmatngan pokon sang ákte mur i kálámul er!”

Rung tili risán ​ ​ di nem i mák Iesu

20 Má i pákánbung er, te rung tili risán iatung Ierusalem dikte ruruna i Káláu sang má dik lu mur i tatalen káián tan Iudáiá. Di han ur Ierusalem suri lotu tiklik mai tan Iudáiá i pákánbung án longsit. 21 Má di han narsá Pilip, koner til Betesaida i balis á Galiláiá, má dik parai singin ngo, “Ai, kono mer, gim nem suri worwor mam Iesu.” 22 Ái Pilip a han mák parai si Enru, má diará han narsá Iesu má diará parai singin.

23  i Ái Iesu a longrai ngorer, má a kos diar ngoromin,

  • “Pákánbung ákte hut má, má minmáir Natun Kálámul na tur talas.
24  j A támin muswan sang ngoromin. Ngo kesá kotlin padi, má ngo kápte kes a soi, ki ngorer na táit bia. Mái sár ngo di soi uri bim, a marang mák maukut, má ngorer na tikbut namur má nák maras má na oboi marán wán. 25  k Ái sinih a lala mámnai kán liu sang mák ololoh on, kán liu na bokoh alari. Mái koner kápate lala hol pasi kán liu main i naul bim, kán liu na kelsen bul uri liu muswan er a kis áklis. 26 Ái koner a nem suri na him singing má na kak toptop, ái na lu mur i iau suri giura ekesi kis tiklik. Mái koner a him kaiak mák tangan iau, ái Kakang na durki sang.”

Ái Iesu a para tusi kán minat

27  l Mái Iesu a sopasun i kán worwor ngoromin, “A lala tabureng i balang onin, má dánih má ina longoi? Ngádáh, ina parai ngoromin si Kang ngo na long palai pákánbung án rangrangas alar iau? Auh, káp ina te parai ngorer kabin iau hut suri ina áslai pákánbung án rangrangas minái. 28 Kang, una inngas tar iáu singin matananu!”

Ái Iesu a be parai ngorer, má namur kaungán kes tilami bát a worwor mák parai ngoromin, “Iakte apos tar iau i iáu tungu, má ina bali longoi mul namur.”
29 Má matananu di sámtur iatung di longrai worwor er, má te tili di di parai ngo, “Dánih erei? Wa pár gut!” Má te bul di ngo, “Na, wa angelo er a worwor mai!”

30 A longrai ngorer ái Iesu má a parai si di ngoromin, “Worwor er gamáte longrai, kápte ngo na tangan iau, wa uri tangan gam sang. 31 Pákánbung onin sang má, nagogon uri naul matmatngan pokon na hut, má ái Káláu na tipar pala koner onin a kátlán naul matmatngan pokon. 32  m Má iau, ngo da duruk pas iau urami alari naul bim, ngorer ina talkai matananu no uri narsang.” 33  n Matngan worwor ngoromin ái Iesu a para tusi matngan minat er na áslai.

34  o Má matananu di longrai ngorer má ding kosoi ngo, “Kángit nagogon a parai ngo Mesaia na liu áklis. Má ngádáh ngorer uk parai ngo Natun Kálámul da duruk pasi urami? Má Natun Kálámul, ái sinih?”

35  p A longrai ngorer ái Iesu máng kos di ngo, “Talas na iatung i katbán i gam i án mudán pákánbung sár. Ngorer gama láklák hanhan ngo kán tu talas be suri na máng kuron i gam tangra sál, kabin koner a láklák i kuron kápate mánán tusi ai a han ur ái. 36  q Ngorer ngo kán tu talas be, gama ruruna on suri gama rang natun ái Koner ái á talas muswan.” Io, a para noi worwor er ái Iesu, má a han mák punpunam alar di.

Tan Iudáiá kápdite ruruna

37 Ái Iesu ákte longoi marán akiláng narsán matananu, mái sár kápdite ruruna on. 38  r Má táit er a long artálár pasi worwor si Aisaia tám worwor tus er a parai ngo,

“Konom, sinih ákte ruruna i kángim worwor?
Má ái Konom ákte inngasi mingin si sinih?”
39 Má ngorer kápdite artálár suri da ruruna kabin ái Káláu a parai si Aisaia ngoromin mul,

40  s “Á iau ái Káláu iakte apedei mát di suri dik rau,
má mát di kápnate talas.
Má iakte alaklak i bál di
suri kándi hol mul na kuron.
Iau longoi ngorer suri da káp tapriu sur iau
má iau ina mák asengsegeng pas di.”
41  t Ái Aisaia a parai ngoromin kabin ái ákte mák táilnai minmáir i Iesu pasi ák worwor ngorer.

42  u Má i pákánbung erei, marán tili tan tátáil káián matananu Iudáiá dikte ruruna i Iesu. Mái sár kápdite para aposoi i mátán matananu kabin di bulat suri tan Parisaio da mák ekesi long pala di tili rumán lotu. 43  v Kápdite para aposoi kándi ruruna kabin di lala nem i párpárnga káián kálámul sár alari sorsormángát káián ái Káláu.

Pinpidan si Iesu ​ ​ na nagogon i matananu

44 Má namur ái Iesu a perek ami bát ngoromin,

  • “Ái sinih a ruruna i iau, kápate ruruna masik i iau, mái sár a ruruna mul i Koner a tarwa iau.
45  w Mái sinih a mák iau, ái a mák Koner mul a tarwa iau. 46 Iakte kusak ur main i naul matmatngan pokon ngoro talas, má iau atalsai matananu suri kápdate lu kis pagas i kuron ái rung da ruruna i iau. 47 
  • x “Má ái sinih a longrai kak pinpidan má kápate taram on, á iau káp ina te nagogon i koner. Káp iau te hut suri ina nagogon i matananu on á naul matmatngan pokon, ái sár suri ina aliu pas di.
48 Ái koner a pua iau má kápate longra pasi kak pinpidan, a mon á kesá táit na nagogon on, wa kak pinpidan sang! Ái na nagogon i kálámul erei i áwáwat i bung. 49 A muswan á min kabin táit iau parai kápate hut tili kak hol masik sár. Ái sár ái Kakang er a tarwa iau, ákte dos pala iau má ákte para talsai singing suri worwor sang ina parai. 50 Ákte dos i iau ngorer, má iak mánán ngo kán arardos ái Kakang a aliwi matananu suri dák liu áklis. Má táit iau parai, ái á táit ái Tata a bit iau on ngo ina para aposoi narsá gam.”
Copyright information for `SGZ